WAHYU 20

1Anden yet harukmen malaikat eke poholman wambik waharuk lit turuhun ele ap war atuk ambeg sok husuruk angge men yunggal kumbi men inggikmu seneg angge wambik waharukmu yet harikik. 2Wambik waharisireg manu pisanggo sabalon ino unuk Iblis men Setan men urukon ino senetisireg hele watisimu hele waroho weregma mo ilig am wirig am turukmen teng-teng angge (seribu tahun) aruhu. 3Hele watisireg turuhun elma ino pilaptisireg turuhun ele sok lare feruk lit enehangge tag teberisi. Mo ilig am wirig am turukmu teng-teng angge (seribu tahun) sali obog am fugmu wilip aruhureg ap o pumbuk wal taneg werehon inindi ninap enebuhu rohon ulug enehangge tag teberisi. Sali obog atuk halug eneg il misig wilip amag ulug lole fesuhup. 4Wereg lit yet harukmen hur atuk angge fam ap lehoma heriyehon yer isarikik. Iren unggum kong turuk lamag ulug lehoma in eneptisi. Allah wene men Yesus wene fag toho hiyag isaruk latuson fahet enenggolop ke kong eneptuson arimano enehime yer isarikik. It arimanowen pak wimbi ino men wirimangge ino men unubam sembahyang urusa fuhon enehangge ininggikmu ano inilahuwagma ano hahatusa fuhon eneg weregma yer isarikik. It arimano onoluk atusareg ap suwon atusareg Yesus men ambiyeg mun angge man angge sen enesug lit weregma mo ilig am wirig am turukmen teng-teng angge (seribu tahun) atisi. 5Mo ilig am wirig am turukmen sali obog am fugmu ap winon war atuson arimano onoluk atusa fug. Ap warehon onoluk atuk ane atamon tu wereg. 6Ap warehon onoluk atuk ane atamon tu fam onoluk atuk inap arimano enehiyeg toho welamag. Inggik pirenehon fam war atuk ane su atuk halug it arimano fobik war amuhup fug. It arimano Allah men Kristus men ler eneptuk inap imam hag toho amuhupteg Yesus men ambiyeg mun angge man angge sen enesug lit weregma mo ilig am wirig am turukmen teng-teng angge (seribu tahun) aruhu. 7Mo ilig am wirig am turukmen (seribu tahun) sali obog aruhumu Iblis ino hele lole fesuhumu wilip aruhu. 8Wilip aruhureg lahureg ap o pumbuk kinang atogman atogma werehon inindi ninap eneptuk laruhu. Inindi nin atuk inap ununuk Gog men Magog men suwalehon itano onotsi men tog abul ulug palu enebuhumu ik yinggi mondeg hag toho anggolo welamuhup. 9Anden yet harukmen it palu eneptisiyon arimano ik yinggi mondeg hag toho wereg lit kinang tonggo reg ambeg lahik waharusareg Allah umalikisi o sabo ke werehon men o pumbuk Aren indi rohon fam werehon men arimano walinggoho kilap eneptuk latusa. Walinggoho kilap enesugmen indok poholman wambik waharuk lit it arimano harep wiyaloho lin urusa. 10Manu inindi ninap eneptuk latisiyon ino ik ahum ahe laharuk lit indok ambulpul turuk ambeg ino hik isarusa. Hik isarusa ambeg ino pak wimbi hahon men ele si uruk ahun men tam hik isarusama it ambiyeg weregma likiya hupmu indoken fato eneptukmu nenek turuk lit ouk eleg am fug turukmen mondabi welamuhup. 11Anden yet harukmen hur atuk angge suwon yanggowon misig fam Ap eke palimu heriyegma yet harikik. Pohol men kinang men At alukeman eleg atisimu ubale eneg latisi. 12Anden yet harukmen ap war atfahon suwon men malik toron men hur atuk angge alukema unduhukmu yer isarikik. It wereg lit suwesingga anggolo wirili ferusama nin winon misig oho suwesingga mondabi onoluk welamuhubon ino wirili ferusa. Ap war atfahon arimano ininggarehen turuk latfag ane suwesingga fam haharoho imbibahon ino hikit toho enebe wal taneg unggum unubam emberusa. 13Ikman war atuk latfahon arimano ik undama welatfag angge arimano wili feserukmu winon war atuk latfahon ap warehon wereg ambeg inowen wili feserukmu it obog toho ininggarehen siyag ane turuk latfahon hikit toho wal taneg unggum unubam emberusa. 14War atuk angge ino men war atuk ambeg ino men ik sene ahe wilip atukmu indok naruk ambeg ino hik isarusa. Ik sene ahe wilip atukmu indok naruk ambeg inowen war amuhubon ino pireneg angge war amuhup. 15Ap sa suwesingga mondabi onoluk welamuhubon ino fam ununuk eleg latisiyon arimano ik ahum indok ambulpul turukon fam hik isarusa.

will be added

X\