WAHYU 19

1Tot wereg lit hol harukmen ap anggolo poholma palu roho wereg lit enele along toho urukmu holtikik. Enele uruk lit, "Haleluya, Ninikni Allah ine roho werehon ino lehoma wereg lit Aren ap fanowap eneptuk. 2At tem toho wereg lit unggum ap unubam werehon pikit toho eneg kong turuk. Pabi ane til noruk lit kinang siyahap turuk latisi hiyap ino Aren alem ubam emberuk lit unggum kong tirisi. Amingmingangge enemep saplangge hililtuson fahet at ino men ayeg war isarisi," urusa. 3Ari urusareg sini pirenehon wiliptuk lit, "Haleluya, o harep naruk lit hubu laharukon ino likiya hupmu eleg am fug angge welaruhu," urusa. 4Ap iniknisi roho welatuson uhaneg fumahen arimano men lebe ruruk angge uhan itano menen Allah lehoma heriyeg lit werehon ino Alukema enelenggen fam hur atusareg sembahyang uruk lit, "Amin! Haleluya!" urusa. 5Ari urukmu itano hur atuk angge ino famen ele misig uruk lit, "Hit Amingmingangge welahebon toron suwon obog toho arimanowen henekol toho wereg lit Ninikni Allah wel turuk lamuhup," irisi. 6Anden hol harukmen ap anggolo palu roho wereg lit enele along toho uruk lit ik aplohok mi-mi uruk hag toho ululu suwon sipuk turuk hag toho urukmu holtikik. Enele uruk lit, "Haleluya, Ninikni Allah mun angge man angge seneg lit werehon ino At mondabi palimu atisi. 7Nit nenehiyeg toho wereg lit sini yunggultuk lit At wel turuk lamul. Domba umalik inowen hiyap hilamin peruk ane horog ahama hiyap oho indimu oluk ahama anggengge tug toho embehekteg wereg. 8Weregma sum yanggowon il wiyihon umbagpag turukon wan timihin ulug og utusa," urusa. Sum il wiyihon ino Allah umalikisiyen fano ane turuson fahet urusa. 9Enele urusama malaikaren an nubam te, "Hahatuk lamin," il laruk lit, " Domba umalik inowen hiyap hilamin irisiyon fahet seni esetukmu wol eneptisiyon arimano enehiyeg toho welamag," irisi. Ari irisireg nin eke hiyag nutuk lit, "Uruk lahi ane aru tik-tem toho Allahn irisi ane uruk lahi," irisi. 10Ari irisimu anden at ubam sembahyang imin ulug uyug alma nelenggen fam hur atikikmu aren an nubam te, "Ari hag toho timihin fug, an oho hat men hori men hag toho At amingmingangge welahi. An oho Yesusen fag toho hiyag nisarisi ane ngi reg lahi. Allah fam eneg sembahyang uruk lamin. Haren fulu roho harikin ane ari Yesusen hiyag hitisiyon eneg harikin," irisi. 11Anden yet harukmen pohol husigmu wam kuda kuron misig welatisi. Wam kuda ino emberimu heriyeg latisiyon ino Unuk te "Indi wirikon" men "Ele tem toho urukon" men suwaleg latisi. At inowen tog aptuk halug fano ane turuk, unggum kong turuk halug pikit toho kong atuk. 12Il indok ambulpul kiyog teg lit Unggul hobog anggolo pug teg latisi. At ubam unuk haharehon ap winon onoluk am fug tegma Inggareg eneg Oluk teg latisi. 13At asum wan teg latisiyon ino mep fam yuhulihon wan teg latisi. Unuk te "Allah wene" suwaleg latisi. 14Ari reg lit weregma ap poholma sehen seneg inap asan-asan angge At ombolim laruk latusa. It arimano wam kuda kuron fam heriyeg lit sum yanggowon il wiyihon wan teg latusa. 15Karog olokon Ambilik ele ke wilip atuk lit ap obog toho unusuruk laruhu. Ap obog toho arimano Aren wanggun ineyon fam fer enesug lit kinang habulig ambeg hele anggur anggen pete roho pilaptuk laruhu. Hele anggur pete roho pilaptukon ari hag toho Allah mun angge sen enesuhon inowen Olok haruk ane wereg. 16Asum men aho men fam Unuk haharohon aru re, "Palimu welahe perukon arimano An palimu welahi, ap iniknisi roho werehon Inikni An welahi," ulug Unuk hahareg latisi. 17Anden yet harukmen malaikat misig mo fam unduhuk lit suwe obog toho pohol ke larukon arimano fam ele hi roho uruk lit, "Allahn seni suwon eserehekon ambiyeg nulen hit obog toho tuma luhal arik maniyek. 18Seni eserehekon aru: ap suwon ununu, sehen seneg inap onowesi ununu, sehen seneg inap ununu, wam kuda ununu, emberimu hur atuk inap ununu men, ap obog toho iniknisi roho werehon men enemingmingangge men ununu, suwon toron ununu isag hesehekon nalihiben maniyek," irisi. 19Anden yet harukmen pak wimbi hahon men ap suwon kinangma werehon men onotsi sehen seneg inap men misigmu luhal atusareg wam kuda kuron palimu heriyehon ino men Otsi men tog abul ulug enele sahaltuk latusa. 20Enele sahaltukmu pak wimbi hahon ino senetusareg ele si uruk ahun ino oho senetusa. Ele si uruk ahun inowen ap inil fam aben tuk fug teg ane turuk lit ap unubam wimbiyen tohon enehangge werehon wirimangge ino fam sembahyang uruk lamuhup ulug inindi ninap eneptuk latisiyon ino oho senetusa. It piren itano onoluk angge ik sene ahe laharuk lit indok ambulpul turuk ambeg ino hik isarusa. 21Wam kuda kuron fam heriyeg ahun ino ambilikmuwen karog olokon wilip atisiyon inowen ap obog toho unusirisimu suwe waharusareg ununu hindil heheg narusama suwe arimano enehum ouk atisi.

will be added

X\