WAHYU 13

1Anden yet harukmen pak wimbi hahon suwon misig saho ahik famen wilip atukmu yet harikik. Pak wimbi hahon ino andimbuk numen teg lit unggul sabiren teg lit andimbuk numen arimano fene aliliyangge lahabeg latisi. Unggul fam Allah abug uruk ane hahareg latisi. 2Pak wimbi hahon ino ebe pak su humon hag teg lit uyug tabi uyug hag tegma ambilik olomene ambilik teg latisi. Pak wimbi hahon ino inam atisimu manu inowen at ineyap turuk lit at lehoma heriyeg ambeg hiyag itisireg palimu unduhuk ferisi. 3Anden yet harukmen unggul misig yowilangge humon teg lit war am hag teg latisi angge famen fanowap tarisi. Fanowap tarisimu ap kinangmon obog tohowen yihi uruk lit at ele holtuk latusa. 4Manu inowen pak wimbi hahon ineyap tirisi ane fahet ap kinangmon obog tohowen manu wel turuk lit ubam sembahyang uruk latusa. Sembahyang uruk lit wimbi ino oho wel turuk lit, "Pak wimbi aru men ap sa men wirim teg? Ap san pak wimbi aru men ambi roho tog abuk teg?" uruk latusa. 5Pak wimbi hahon ino ambilikmuwen wilip atuk ane hemet til laruk lit Allah abug il laruk latisi. Ari til norukmen pikalem teng misig nubam hilag nuwal fumahen (empat puluh dua bulan) lahu ulug ineyap tirisi. 6Ineyap tirisimu Allah unuk men At wereg ambeg men poholma werehon obog toho men enebug uruk lit siyahap enepmin ulug ambilik husirisi. 7Ap fano ane turuk inap men tog aptuk lit it apmayap enebukag ulug ineyap tirisi. O pumbuk obog toho men ununggul unuk obog toho men enele wal taneg urukon men inibam wal taneg werehon obog toho arimano apmayap turuk lit at palimu atisi. 8Ap obog toho kinangma werehon at wel turuk lamuhup. Domba umalik senggeltuson ino asuwesingga fanowon ino fam atam pohol kinang wal tibag sambilen ununuk hahatfag fuhon arimanowen eneg wimbi ino wel turuk lamuhup. 9Ap sa isanggo wereg halug at inowen hol hawag. 10Ap sa inggik hele wabukag ulug hiyaho feruk halug at ino inggik hele wabuhup. Ap sa karog fam wabukag ulug hiyaho feruk halug at ino karog fam pinggi wabuhup. Alem palimu werehon aru: Ap Allahn mumal eneptisiyon arimanowen inindi wirik toho unduhuk lit wenggel haruk lamuhup. 11Anden yet harukmen pak wimbi hahon eke kinang elman wilip atuk lit andimbuk piren domba andimbuk hag tegma ele manu ele hag toho uruk latisi. 12Wimbi atamon suwon inowen fobikon ino ineyap turukmu alukema oweyen turuk ane ambi roho turuk latisi. Aren turuk latisi ane ari famen ap kinangma werehon obog tohowen pak wimbi atamon yowilangge reg latisireg fano atisiyon ino ubam sembahyang uruk lit wel turuk latusa. 13Ap obog toho onolohotma enehane ineyon inowen tehek ukag ulug indok poholman lisoho kinangma pilabik waharuk latisi. 14Enehane ineyon turuk lahi perisiyon ino fam pak wimbi tamon ino olohotman turuk lit ap kinangmon inindi nina feseruk latisi. Wimbi karohen ti reberuson fano atisiyon ino aben wel turuk lamuhuben wirimangge laltihip ulug hiyag isarisi. 15Hiyag isarisimu at ineyap turusama wirimangge ino olukap tirisimu ele uruk latisi. Ele uruk latisimu ap winon at wel turuk elehon arimano pinggi unusiyek ulug hiyag isarusama obog toho pinggi unusurusa. 16Ap obog toho toron men suwon men enenggengge elehon men werehon men amu wirik toho werehon men ap enemingmingangge werehon men it arimano unubam ininggik pikiron fam ano ilag uwag fam ano enehangge hunubam umbat tomok ulug hiyag isarisi. 17Ap misihen oho onggo paloho waruk ambeg ayeg waroho hilamin ulug la fug tegma we it enehangge unubam werehon eneg wa reg latusa. Enehangge ino wimbi hahon unuk ano unuk winag haruk ane ano wereg latisi. 18Onoluk atuk ane alem tuma hahareg lit werehon fahet yami ruruk lamuhup. Ap sa indi anggat teg halug at ino pak wimbi fahet winag haruk ane roho winaharuk laruhu. Winag haruk ane ari ap kinangmon winag haruk ane roho wereg. Winag haruk ane ari teng-teng angge teng falfaliken (enam ratus enam puluh enam).

will be added

X\