FILIPI 2

1Kristus unuk uruk lit hit-hit komo-komo atuk lahep. Kristus inowen Indi hisaruk lit weregma hinindi yuwag toho welahep. Allah hime fanowon fam mangno roho wereg lit hit-hit honori men hinindi roho welahep. 2Ari roho welahepma anden iminon tu turuk lamuhupmu an nahiyeg anggolo haruk lit welaruhuk: Hinindi misig toho wereg lit hit-hit honori hinindi reg lit welamuhup. Henebe mangno roho wereg lit misig ane eneg tul peruk lamuhup. 3Hiren mun angge man angge fahet og nisawag ulug henele hemet toho il noruk lamuhup fug. Hininggareg apmayap taruk lit honori fahet it palimu wereg peruk lamuhup. 4Hininggareg hiniyabuk eneg wituk lamuhup fug, honori iniyabuk oho let toho wituk lamuhup. 5Hiren oho Yesus Kristus inowen peruk ane hikit toho peruk lamuhup. 6At ino Allah min ambi roho welatfag. Iraroho welatfag angge famen mondabi ari roho welaruhuk pibag fug. 7Mondabi ambi roho welamuhuk puk fug angge Inggik kobog isibareg Ninggareg apmayap tamin ulug ap kinangmon atfag. Ap enemingmingangge hag atfareg it men ambi roho welatfag. 8Inggareg apmayap taruk lit Allah ele holtuk lit weregman eneg ware feseruk lit e fam telfagma war atfag. 9Ari fahet Allahn At ino mondabi leho fibareg Ineyap turuk lit Unuk suwap tibareg it winon ninine roho welahe perukon torap enepfag. 10Ari tibagma poholma werehon kinangma werehon kinang apma werehon obog toho At suwon Apma welahe ulug At unuk uruk lit wel turuk lamuhup. 11It obog toho arimanowen, "Nonowe suwon Yesus Kristus wereg," ulug fag toho uruk lit Allah wel turuk lamuhup. 12Nori, anden hit nindi henesug lahiyon inowen tot imin. An weregma nele holtuk latikip hag toho ketiya hit men wereg elegma oho nele fano roho holtuk lamuhup. Allahn nit fanowap nenebuhu ano ulug hinindi anggin toho wereg lit til noruk lamuhup. 13Allahn henesukun fanowap heneptuk lit hininggik ineyap heneptukmu Allahn fano peruk ane eneg turuk lamuhup. 14Mun ane man ane turuk lit hinindimu ninirim puk fug angge hinindimu oho nonghong uk fug angge wereg lit til noruk lamuhup. 15Henebe puhun toho wereg lit fano ane turuk lamuhup. Inindi hare reg lit un ane turuk inap sehelimu hit Allah umalikisi hinindi wirik toho wereg lit suhal umbagpag turuk hag toho it arimano unubam selehap turuk lit welamuhup. 16Wene hit fanowap heneptukon ino hininggik ine roho senetuk lamuhup. Senetuk lamuhupmu Kristus waruhu sambil ino anden, "Wene fahet turuk lit lisag anggolo saplangge haruk latikik fug," ulug nele si ane uk fug angge wel ta reg laruhuk. 17An nuwatukmu namep wilip alebon ino Allah fahet wam isag Utuk hag toho tele. Hiren oho Allah fam hinindi wenggeltuk lahebon ariyen henebe Allah og Utuk lahep. Ari roho teko lahu halug an men hit men nenehiyeg toho welamuhuk. 18Ari roho wereg lit hir oho henehiyeg haruk lamuhupmu an oho nahiyeg toho welaruhuk. 19Nonowe Yesus inowen an let naptukmu Timotius folo-folo henembeg monde fik waruhuk peruk lahi. Hit henembeg waruhureg nin suhuloho an nambeg waruhumu hit welahep ane fahet hiyag nuruhumu an nindi yuwag aruhu. 20Anden wenggel haruk lahiyon hag toho ap tuma an men werehon misig oho eleg, we Timotius eneg wereg. We aren eneg hit fahet likiya hupmu anggolo wenggel haruk lit wereg. 21Ap winon an men werehon arimano ininggarehen tohon fahet eneg wenggel haruk lit Yesus Kristus inowen tohon fahet wenggel haruk eleg. 22Amlohowen ikni let turuk hag toho an wene hiyag isarukmu aren let naptuk latisi. Misihim pok am fug angge likiya hupmu ubabut fano roho let naptukmu hiren harikip. 23An hele wat naptuson ino nubam tuhup ane seleg atuk halug at ino folo-folo henembeg monde fik waruhuk ulug nundaman peruk lahi. 24Nonowe inowen an let nabuhumu ninggareg eke hit henembeg folo-folo waruhuk ulug nindi se roho wenggel haruk lahi. 25Nenere Epafroditus ino hiren an let naptuk laruhu ulug nambeg monde fik waharikibon ino hit henembeg suhuloho waruhuwen anden monde fik waruhuk. An yabuk asengseng toho warukmu ar oho asukun fano roho let naptuk latisi. 26At ouk waruk ulug hit honoluk atisi ane fahet at indi anggin toho wereg lit nin hit henembeg lahuk ulug indi wenggel haruk. 27At ouk anggolo waruk lit war aruhu perusa angge famen Allahn indi harisireg fanowap tirisi. At fanowap turuk lit an eke indi siyag aruhu fug ulug Allahn indi niyarisi. 28Ari fahet at ino hit henembeg waruhuwen folo-folo monde fik waruhuk. Monde fik waruhukmu at yet hahupteg hinindi se aruhumu an oho nindi se aruhu. 29Niren Nonowe fam wenggel haruk lahe hag toho ar oho Nonowe fam wenggel haruk lit waha ulug hi ruhupteg hinibam hondoko kilabuhup. Ap ari hag toho wenggel harukon obog toho hinindi enesug lit hi eneptuk lamuhup. 30Kristus awene fahet til norukmen ouk waruk lit war am hag teg latisi. Hiren an let nabukon famen at hit hunubalma atisireg an let naptuk lit an nahiyeg toho welaruhuk peruk latisi fug.

will be added

X\