MATIUS 20

1"Allah ap obog toho Inikni aruhuwon ino ap misig yabuk ngi ahun hag toho wereg. Ap ino hubet-habet hele anggur yabuk wibusan ap mingming enepmin ulug wilip atisi. 2Hiyag eneptisireg, 'Uang inggila misig og hisamin,' irisimu iren fano urusama, 'Yabuk anden toho wirik lalihip,' ulug hiyag isarisi. 3Hiyag isarisireg mo lahik waharisimu nin wilip atisireg yet harukmen ap winon eke saplangge silimu wereg latusa. 4Wereg latusama, 'Hir oho anggur yabuk anden tohon wirik lalihipmu onggo anden og hesele perukon og hisamin,' irisimu ir oho larusa. 5Larusama welatisireg mo anum pulmu weregma ap winon eke hondog enebik oho wilip atisi. Hupmu mo haya regma nin eke ap hondog enebik oho wilip atisi. 6Nin eke sinal ele ik ohoma oho wilip atisireg silimu ap anggolo luhalegma larisireg, 'Nori, hit nungge fahet fahe angge heriyeg lit welahep?' irisimu 7iren te, 'Hondog nenebik wahasa fugmu welahe,' urusama aren, 'Hir oho anggur yabuk anden toho wirik lalihip,' irisi. 8Mondabi hup atisimu ap inowen amingmingangge fam, 'Yabuk wituk inap wol enepmihinteg onggo og isamihin. Fobik wahason tam og isamihinteg tam wahason fobik og isamihin,' irisi. 9Ari irisimu it sinal ele ik ohoma waharuson oho wal taneg uang inggila misig-misig og isarisi. 10Og isarisimu it tam waharuson arimanowen, 'Nit tot anggolo og nisamisi,' perusa angge famen ir oho wal taneg uang inggila misig-misig og isarisi. 11Misig-misig og isarisimu yabuk ngi ahun fam enele onolok toho uruk lit, 12'It fobik wahason yabuk we tot wirehesa angge famen nit atam waheyon yabuk anggolo wituk lit molok anggolo hehe angge famen nungge fahet it nim wirim toho og nesehen,' urusa. 13Ari urusama ap suwon inowen it obog toho weregma ap misig fam, 'Nare, anden siyag ane hubam tihi fug. Uang inggila misig og hitmin ihimu fano ehen anggeyen nungge fahet uruk lahen? 14Haren tohon hilalug lag. An nindiyen te it fobik wahason men hit tam wahebon men ambi roho og hisamin pihireg og hisihi. 15An nanggengge nindiyen ap og isa fug teg lahi? Anden ap nindi enesug lahi ane fahet holok haruk lahen?' ulug pet tirisi. 16Ari hag toho ap fobikon atam amuhupmu ap atamon fobik amuhup," ulug Yesusen hiyag isibag. 17Yesus o Yerusalem lahakuk ulug kema laruk lit Otsi nisanggowen enemu hondog enepfareg hiyag isaruk lit, 18"Ketiya nit o Yerusalem luk oho lahe. Lahakukmu At ap kinangmon atfahon ino imam usane onoluk inap men Musa wene onoluk inap men ininggikmu og isahupmu pinggi ware fusukag ulug unggum Ubam umbuhup. 19Ubam umbuhupteg Allah unuk enepeleg inap ininggikmu umbuhupmu Inggaliyap turuk lit Ebe siyag toho wabuhupteg e fam tele fesuhupmu At o hinahaneg angge Oluk aruhu," ulug Otsi hiyag isibag. 20Zebedeus uhe inowen Yesus fam heng angge heng timin ulug umalikisi men Ambeg watfareg Alukema hur atfag. 21Hur atfagma Yesusen, "Nungge heng Napmin ulug wahen?" ibagma hiyap inowen, "Nowe, Hat palimuwap Habuhu ambehen an numaliki ariya misihon ninggik pikit fil misihon ninggik hare fil hur arik maniyek uhunen hiyag hitmin ulug wahi," ibag. 22Ari ibagma Yesusen, "Heng Nabehep ane ari henepelehen ehep. Ik kubag Anden nahukon ari fam hir oho nenggep ha reg lahep?" ulug umung isibagma iren te, "Nir oho nengge ha reg lahe," ibag. 23Ari ibagma Yesusen te, "Ik kubag Anden nahukon ari hiren oho nahup angge famen ninggik pikit fil hare fil hur arik maniyek uruk ane ari Anden uk fug teg lahi. Nikniyen unubale hale fuhureg tiya hur arik maniyek ulug Aren perukon eneg wol enebuhu," ibag. 24Ibag ane ari Otsi numen itano hol hibareg onolok haruk lit ap piren itano per enepfag. 25Per enepfagma Yesusen wol enepfareg hiyag isaruk lit, "Ap suwon kema-kema werehon onotsi enele ine roho apmayap eneptuk ane hit honoluk. Ap suwon it sen enesug inap arimanowen oho enele ine roho onotsi mingming enebil laruk. 26Hiren oho ari roho tuhup fug. Hit sehelimuwon misihen an suwon welaruhuk peruk halug at ino henemingmingangge amag. 27Hit sehelimuwon misihen an palimu aruhuk peruk halug at ino henemingmingangge wereg lit let heneptuk laruhu. 28At ap kinangmon atik ibahon ino hiren At let tuhuben waharisi fug, Aren hit let heneptuk laruhuk ulug waharisi. Aren ap anggolo windar enebuhuk ulug Inggarehen oho Nuwabukag peruk," ulug Yesusen hiyag isibag. 29Yesus otsi men o Yerikho embeselug kema larukmen ap anggolo mondeg angge Yesus ombolim laruk latfag. 30Ombolim larukmen ap inil hupnihon piren funggalem ilanma heriyeg lit Yesus it pisan isalug laruk urukmu hol hibareg enele hi roho, "Nonowe, Hat Daud amloho welahenma nit Hindi nisimin," uruk latfag. 31Ari uruk latfagma ap anggolo arimanowen henele imbisiyek ulug per eneptuk latfag. Per eneptuk latfag angge famen enele nin eke hi roho uruk lit, "Nonowe, Hat Daud amloho nit Hindi nisimin," uruk latfag. 32Ari uruk latfagma Yesus in atfareg tiya maniyek ulug wol enepfag. Watfagma Yesusen, "Nungge nunubam timisi ulug uruk lahep," ulug kapal isibagma 33iren te, "Nonowe, ninil fano alepma yet haruk lala peruk lit uruk lahe," ibag. 34Ari ibagma Yesusen indi isibareg inilmu Inggik tung harukmu inil fano atfag. Fano atfareg yet haruk latfareg Yesus men ambiyeg laruk latfag.

will be added

X\