IBRANI 10

1Fano angge Allahn fobik og nisahuwon ino fahet Musa wene fam ebe fanowon yet haruk lahe fug, ahuhe hahareg lit werehon eneg yet haruk lahe. Mo ilig am wirig am turukmu hundig-hundig ap arimanowen Allah fahet emberuk angge ambi rohon eneg emberuken Musa wene inowen it Allah olohotma waharukon arimano obog toho misihim fanowap enebuk fug teg. 2Misihim fanowap eneplepma Allah fahet emberuk ane embeselep. It hubu lahaptukon arimano misihim mondabi fano alepteg nit siyag ane turuk ninap welahe ulug inindi anggar alep fug. 3Mo ilig am wirig am turukmu Allah fahet emberuk lit hubu lahaptuk ane ariyen nit siyag ninap welahe ulug ininggareg inindimu onoluk atuk. 4Wam sapi men domba men yuhambukon enemep fam aben siyag ane turukon eleg am fug teg. 5Ari fahet Kristus ino kinangma kik watfareg Allah ubam Ele hiyag Utuk lit, "Aben Hat fahet wam waroho emberuk angge men hubu lahaptuk angge men Haren hirim teg lit Nebe hebeloho og Numag ulug og Nitikin. 6Embelug indok yaltuk angge men siyag ane tulug emberuk angge men fahet Haren hindi reg lahen fug. 7Ari fahet Anden nele uruk lit, 'Nikni, An fahet suwesingga fam haharehon hikit toho An waruhukteg Haren peruk lahen ane turuk laruhuken tik-tem toho waruhuk,' ihi." 8Palimu haharehon ino, "Wam waroho emberuk angge men hubu lahaptuk angge men embelug indok yaltuk angge men siyag ane tulug emberuk angge men fahet Haren nirim peruk lit Hindi haruk lahen fug," ibag. Musa wene fam haharehon hikit toho emberuk angge famen Hindi haruk lahen fug ibag. 9Fobik haharehon ino, "An waruhukteg Allahn peruk ane turuk laruhuken tik-tem toho waruhuk." Ari uruk lit tamon eleha feseruk lit fobikon welamag ulug unduhuk feruk. 10Allahn peruk ane aru famen Yesus Kristus inggareg ebe emberuk lit we misihim tibahon ari famen mondabi welamuhukon fahet fanowap nenepfag. 11Imam inap obog toho arimanowen likiya hupmu Allah fam sembahyang uruk lit hundig-hundig emberuk angge ambi roho hubu lahaptuk angge famen emberuk angge arimano famen siyag ane aben turukon elehap tuk fug teg. 12At inowen we misihim emberuk angge ino siyag ane fahet imbibareg Allah inggik pikit fil heriyegman eneg welaruhu. 13Ketiya At ino men seli roho werehon Nuyug ahongge amag ulug Uyug alma umbuhuwon sali yet teg lit wereg. 14Allahn mumal enepfahon arimano Aren emberuk angge misihim imbibahon fam mondabi fanowap enepfag. 15Alem ari fahet Allah hime fanowon inowen oho nit hiyag nisaruk. 16Hiyag nisaruk lit, "Fobik welamuhuk li it unubam sali umbuhukon iminon aru," il laruk lit, "Anden komo eneptuk ane unundama emberuk lit inindimu hahare fuhuk. 17Iren siyag ane turuk lit hare ane turukon ari Anden nambolmayap tebesuhuk," uruk. 18Mun angge man angge siyahon obog toho Allahn ambolmayap tebeseruk halug aben siyag ane tulug nin eke umbuk fug tehen emberuk angge emberuk lamuhup fug. 19Nori, Yesus amep fam nenembong seyap neneptisimu ketiya o sabo fanowon ino fam kuruk lahe. 20Kebunggalem keron nonoluk welamuhuk abunggalem sok latuk asum ino iming isalug laruk abunggalem hal nisibag. Sok latuk asum ino Inggareg ebe wereg. 21Nit Nonowe imam onowe suwon ino Allah ibam ngi ahun wereg. 22Weregma ninindi wirik toho Allah fam tem toho wenggel haruk lit Alukema welamuhuken maniyek. Ninindimu siyag ane wenggel harukon Aren ho roho puhun turuk lit nenebe ik il wirikon fam umag nenepfag. 23Allahn fobik fanowap nenebuhu ane ninindi wirik toho seneg lit ap fag toho hiyag isaruk lamuhuk. At ele sali ibahon ino Indi wirik toho wereg. 24Niren fano ane eneg turuk lit nonori men ninindi roho welamuhuken nit-nit komo-komo atuk lamuhuk. 25Ap winonen enesupmu roho wene uruk ambeg pok atuk hag toho pok atuk lamuhup fug. Yesus waruhuwon ino horog tehen sebe roho komo-komo atuk lit nonoluk toho welamuhuk. 26Fano ane fahet ninindi anggar atuk angge famen nin siyag ane turuk lit nenenggelemon Allah fahet emberuk angge emberuk halug fanowap nenebuk fug teg. 27Allahn alem anggin anggolowon nunubam umbuhu sambil ino nenekol anggolo haruk lit yet tegman indok ambulpul humon ino ulog turuk lit ap Allah men seli roho werehon obog toho indoken han naruk lamuhup. 28Ap eke Musan alem haloho imbibahon ino nale feseruk halug ap piren hinahanen aren siyag ane tirisi uhupmu at ino inindi ha fug angge pinggi ware fesuhup. 29Ap ekeyen Allah amloho ino uyug sobir isaruk halug alem toron ubam umbuk teg ano? At ino Allahn sali imbibahon amep ino fam fanowap tibag angge famen siyaha feseruk lit Allah hime fanowon ap Indi enesuhon ino oho siyaha feserukmu ubam alem angginon umbuk teg. 30At inowen wene tu hiyag nisibahon nit nonoluk, "Ayeg watuk ane Anden eneg ili wa reg lahi, ambiyang hun isaruk ane Anden eneg ambiyang hun isa reg lahi," il laruk lit, "Allahn eneg Umalikisi fam unggum werehon kong tuhu," ulug hahareg lit wereg. 31Ap eke Allah oluk werehon ino Inggikmu atug halug indi oko larukmu akolen homhombuk turuk. 32Tam welatikip ane fahet wenggel homok. Seleg fanowon keram hunubam atisimu ap seliyonen onolok ane hunubam turuk lit alem angginon hunubam atisimu hinindi hondo reberuk latikip. 33Hunusuruk lit hininggaliyap heneptukmu aben fog heneptuk latusa. It winon hit hag toho unusurusa inap arimano oho hiren hinindi enesug lit fer enesug latikip. 34Ininggik hele war eneptuson arimano hiren ler eneptuk latikip. Henengge taluk heneptukmu fano helehesa peruk lit henehiyeg toho welatikip. Nit nenengge fanowon mondabi werehon ngi reg lahe ulug honoluk toho welatikip. 35Hinindimuwen tem toho peruk lahebon umbusuk fug angge seneg lit onggo suwon og hisahuwon fahet yet teg lit welamok. 36Allahn perukon hikit toho turuk lit og hisahuk ulug sali ibahon ino hit ngi amuhuben hinindi imbik wamburuk lit welamuhup. 37"We tot il misig welamuhukteg At waruhu urukon ino pok atmin puk fug angge waruhu. 38An not eke pikir ane turukon ino indimu wenggel haruk ane ariyen oluk welaruhu. Ap ekeyen An ambol yig Nutuk halug Anden oho ap ino Nambol yig uruhuk," ulug hahareg lit wereg. 39Nit welaheyon At nenembol yig Utuk lit siyag amuhukon welahe fug, nit nunundama At ubam wenggel haruk lit nonoluk welamuhukon welahe.

will be added

X\