IBRANI 1

1Indam Allahn ninikni umba fam mun ane man ane roho hiyag isamin peruk lit tam wene hiyag isaruk inap nabi arimano mon eneptuk latfag. 2Ketiya nit obog-obohon welaheyon oho hiyag nisamin peruk lit Amloho monde fibag. At ino pohol kinang ngi amag ulug Allahn unduhuk fibag. At ino famen Allahn mun angge man angge obog toho wal timin pibareg wal tibag. 3Allah mo ebe umbagpag turukon hag toho weregma At ino asinandi hag toho wereg lit Allah ebe weregma At pingganet hag toho wereg. At ele ine roho uruk ane ino fam mun angge man angge seneg lit wereg. Aben siyag ane turukon Aren puhunap tibareg At ino Allah inggik pikit fil mondabi lehoma heriyeg lit wereg. 4At ino malaikat apma weregma At palimu wereg hag toho malaikat ununuk apma regma At unuk Allahn suwalfahon ino palimu reg. 5"Anden yoho Hat An namloho ulug indag Haptuk lahi," ulug malaikat sa fam ari ibag? "An Ikni aruhukmu At ino Namloho aruhu," ulug ap sa fam ari ibag? 6Allah inowen Amloho wandabon kinangma hondoholug watfareg Ele uruk lit, "Allah otsi malaikat obog toho arimano At wel turuk lit Ubam sembahyang uruk lamuhup," ibag. 7Ari ibareg malaikat fahet Ele uruk lit, "Otsi malaikat homhomo amag ulug emberuk lit Amingmingangge indok ambulpul hag amag ulug in eneptuk," ibag. 8Malaikat fahet ari ibareg amloho fahet ele uruk lit, "Allah suwon, Hat hur atuk ambeg mondabi weregman eneg welaruhu. Ap suwon uwanggun Hat suwon Hinggikmu seneg lahenon ino tem toho uruk ane seneg lahen. 9Pikir ane turukon Hindi reg lit hare ane turukon Haren hirim teg lahen. Hori men ambi roho welatikip angge famen Hikni Allah inowen Hahiyehap haptuk lit ahaluwe Hunggulmu hilil Haptisireg it sehelimu Hat palimu unduhuk Hubaharisi," ibag. 10Nin eke ibag ane aru, "Nikni, Haren kinang ubale hale feruk lit Hinggiken pohol wal tirik inag. 11Mun angge man angge sum miningon tararag turuk hag toho siyag amuhup angge famen we Hat eneg mondabi welaruhun. 12Aben sum yinggiloho emberuk hag toho pohol kinang haren yinggiloho umbuhun. Aben sabiyap miningon embeselug keron wan turukmu nin atuk hag toho mun angge man angge nin aruhu angge famen we Hat eneg nin am fug angge weregma mo ilig am wirig am turuk laruhu," ibag. 13"Hat men seli roho welahebon Huyug ahongge amag ulug imbisik waruhuken An ninggik pikit fil hur arik ma," ibag ane ari malaikat sa fam ibag? 14Malaikat arimano Allahn mingming eneptuk laruhuk ulug in enepfag fug? Ap Allahn fanowap enebuhuwon ler eneptuk lamuhup ulug it arimano mingming eneptuk.

will be added

X\