KISAH RASUL-RASUL 5

1Ap misig unuk Ananias uhe Safira men welatfag. Kinang iren tohon ap unubam ayeg watfag. 2Uang kinang onggo og isibahon arimano abir angge Yesus otsi ininggikmu umbuk angge famen uhe oho oluk atfag angge famen minggiroho fimag umbat tibareg fimag fil Yesus otsi ininggikmu imbik libag. 3Imbik libagma Petrusen Ananias fam, "Ananias, Iblisen hindi siyahap haptukmu Allah hime fanowon Olohotman hele si ane nungge fahet uruk lahen? Si ane uruk lit kinang fahet og hutuson minggiroho nungge fahet umbat tarikin? 4Kinang ari ninggarehen tohon ap og isamin fug pelenteg halug ayeg watlen fug. Ayeg watikinmu onggo og hutuson ari hinggareg eneg umbat telen. Nungge fahet hindimu ari roho tuhuk ulug wenggel harikin? Ap kinangmon fam hele si ehen fug, Allah fam hele si ehen," ibag. 5Ibag ane ari Ananiasen hol hibareg sat eleg atuk lit kinangma waroho ying atfag. Ananias war atfag ane ari hol hibareg ap obog toho arimano enekol anggolo atfag. 6Ap kabiniyon arimano watfareg elenggen pug toho sum fam hililip tibareg paya roho walug wilip atfareg ap warehon kilaptuk ambeg kilabik libag. 7Tot weregman hun Ananias war atfag ane ino uhe apeleg toho kik watfag. 8Kik watfagma Petrusen at ubam kapal haruk lit, "Kinang ino fahet onggo og hisaruson hahunen walug wahayon ita ano, haren oho hiyag nimin," ibagma hiyap inowen, "We tem obog toho walug waha ita," ibag. 9Ari ibagma Petrusen, "Hit piren nungge fahet Allah hime fanowon wal hul ulug hinindimu ari roho tuhuk perikip? Ap hahun salik lahasa inap arimano sokolma wahasareg hat paya haplug wilip amul ulug werehen yer isimin," ibag. 10Ari urukmen hiyap ino Petrus uyug alma kinangma fuk toho war atuk lit sat eleg atfag. Ap kabiniyon arimano olma kibareg hiyap ino waregma kim hibareg paya rulug wilip atfareg ahun kilapfag ambeg ino uhe oho ambiyeg kilabe fisibag. 11Ari tibag ane fahet Allah wene holtuk inap men ap winon obog tohowen hol hibareg enekol anggolo haruk latfag. 12Yesus otsi arimanowen ap anggolo hihir eneptuk lit fano ane anggolo turuk latfag. Ari turukmu ap Yesus fam wenggel haruk latfahon arimano obog toho enebe mangno roho wereg lit Allah ibam hili misig unuk Salomo ino fam palu atuk latfag. 13Ap anggolowen it wel eneptuk latfag angge famen ap winon arimano misihen oho ambong se roho it min ambiyeg welatmin perukon eke eleg latfag. 14Welatfagma ap men hiyap men Allah fam wenggel harukon anggolo it men mangno atukmu anggolo atuk latfag. 15Anggolo atuk latfagma ap arimanowen ap ouk warukon Petrus kema larikim ahuhe unubam atmisireg fano amusa ulug ilit heniye tuwaloho kebunggalem ke imbik waharuk latfag. 16Imbik waharuk latfagma o Yerusalem pumbuk walinggoho welatfag inaben ouk warukon men nenek turukon men hondog eneplug watfagma it obog toho Yesus otsiyen hihir eneptuk latfagma fano atuk latfag. 17Fano atuk latfagma imam onowe suwon men at ibil welatfahon Saduki inap menen enehummu siyag atfareg 18Yesus otsi sen enepfareg ininggik hele waroho og eneplug libareg penjara kilap enepfag. 19Kilap enepfagma hubanggo malaikat misig Ninikni Allahn monde fibagma wambik watfareg kilap enepfag ibam ino sok hur enepfareg ininggik lole fisibareg wilip enepfag. 20Wilip enepfareg ele hiyag isaruk lit, "Allah wene uruk ibam lalihipteg wene fanowon mondabi onoluk welamuhup ane fahet ap anggolo arimano hiyag isa lalihip," ibag. 21Malaikaren ibag ane hol hibareg hubet-habet Allah wene uruk ibam libareg wene hiyag isaruk latfag. Hiyag isaruk lit weregma imam onowe suwon ino at men welatfahon arimanowen ap suwon obog toho Yahudi inap iniknisi suwon obog toho wol enepfareg palu enepfag. Palu enepfareg, "Ketiya Yesus otsi sono kilap eneptukukon arimano penjara lalihipteg hondog eneplug watihip," ulug enemingmingangge mon enepfag. 22Mon enepfagma libareg kim isarukmen Yesus otsi o penjara eleg latfagma suhuloho watfareg 23iniknisi hiyag isaruk lit, "O penjara sok fano roho lareg laha angge famen it fer enesug lit wereg inap sokolma wereg lahasa angge famen sok husoho kim esehema ap itano eleg lahasa," ulug hiyag isibag. 24Hiyag isibagma imam onowesi men Allah ibam foroho inap onowe ino menen hol hibareg, "Yesus otsi ari tehesa angge re iren fobik nangginoho tuhup," ulug inindi su atfareg enekol haruk lit enele sahaltuk latfag. 25Enele sahaltukmu ap misig watfareg, "Nori, ap hiren ininggik hele waroho kilap eneptikibon arimanowen Allah wene uruk ibamen ap anggolo wene hiyag isaruk," ulug hiyag isa watfag. 26Hiyag isa watfagma Allah ibam foroho inap onowe men amingmingangge men libareg ininggik lisoho hondog enebul halug ap anggolo arimanowen helep fam nunusuk nowen ulug we fano roho hondog eneplug watfag. 27Ap suwon palu roho wereg ambeg hondog eneplug watfagma imam onowe suwon inowen kapal isaruk latfag. 28Kapal isaruk lit, "Nori, Yesus unuk ap hiyag isa fug ulug nenele ine roho komo heneptukuk fug? Komo heneptukuk angge famen hiren o Yerusalem aruwen wene suwap tirikipmu aben we ari ane eneg uruk. Ap ino Amep hiren hinanggirikip ulug aben nit nunubam uhup tohon," ulug Yesus otsi unubam ari ibag. 29Ari ibagma Petrus men Yesus otsi arimanowen, "Ap kinangmon enele holuk fug teg, we Allah ele eneg hol ha reg," ibag. 30"Hiren Yesus e fam teloho ware feserikibon ino nunumbusagsi Inikni Allah inowen Olukap tirisi. 31At ino Israel inap Inikni roho wereg lit fanowap enebuhu ulug Allahn inggik pikiron fam palimuwap tirisi. Israel inap siyag ane turuk latuson umbusuhupmu Allahn ambolma umbusuhu ulug At unduhuk ferisi. 32Allahn ari nit ninil fam tirisi ane harukukteg ap hiyag isaruk lahe. Allah hime fanowon ino At ele holtuk inap og isarukon inowen oho ap hiyag isaruk," ibag. 33Petrusen ari urukmu hol hibareg enehummu het-pet haruk lit inindimu onolok hibareg unundaman ap arimano pinggi unusuhuk pibag. 34Unundaman unusuhuk peruk latfagman Farisi ahun misig unuk te Gamaliel ino Musa wene oluk ahun it sehelimu welatfag. Yerusalem inaben at fano ulug wel turuk latfag. Gamaliel ino in atfareg, "An nele iminen Yesus otsi tot selma lalusa," ibag. 35Yesus otsi selma libagma Gamaliel inowen ap palu roho welatfahon arimano hiyag isaruk lit, "Israel hinap nori, ap aruma unusul pehep ane fano roho alem hale felug famen unusilihip. 36Hun Teudas ino an suwon palimu welahi ulug in atfahon wenggel hemek. An palimu welahi ibagma at ele holtukon ap teng-teng angge (empat ratus) arimanowen at ele holtuk latfag. At ino aben ware fisibagma at ele holtuk latfahon arimano linggik-longgo ibareg turuk latfag ane eleg atfag. 37Teudas ino eleg atfagma ap winag isahuk ulug ununuk imbil noruk latfag li Yudas Galilea ahun ino in atfag. Yudas ele holtukon ap anggolo atfareg kinang seneg inap arimano unusul ulug turuk latfag. Unusul ulug turuk latfagma hebeloho Yudas ware fisibagma at ele holtuk latfahon arimano oho linggik-longgo ibag. 38Ari fahet anden hiyag hisaruk lahiyon te ap aruma unubam hiren siyag ane tuk fug angge embeselihip ulug hiyag hisaruk lahi. Iren turuk ane aru aben perukon fam turuk halug amu eleg aruhu. 39Allahn peruk ane fam turuk halug ap aruman turuk ane hiren elehap tuk fug teg lahep. Hiren ari tila peruk lahep angge famen Allah ele ying turuk hag toho telep," ulug hiyag isibagma ap arimanowen at ele holfag. 40Ele holfareg Yesus otsi olma kik maniyek ulug wol enepfareg e paleg fam unusibareg Yesus unuk ap hiyag isa fug ulug enele ine roho komo enepfareg lalihip ibag. 41Lalihip ibagma ap suwon palu roho wereg ambeg embeselug laruk lit, "Nit fahet Yesus otsi ulug nunuseheson fano nunusehesa," ulug enehiyeg toho laruk latfag. 42Laruk latfareg Allah wene uruk ibamen oho ap inibamen oho likiya hupmu Yesus ino Allahn monde ferisi ulug fag toho hiyag isaruk latfag.

will be added

X\