2 PETRUS 3

1Nori, anden hit nindi henesug lit suwesingga hit fahet emberuk lahiyon tu pirenehon haharoho emberuk lahi. Suwesingga pirenehon aru fam hit hinindimu seleg toho kim haruk lamag ulug honolukap heneptuk lahi. 2Ap Allahn tam mon enepfahon nabi arimanowen fobik teko lahu ane fahet hiyag isibag ane hinindimu honoluk toho welamuhup. Nonowe windat nenepfahon inowen Otsi hiyag isibag ane iren hiyag hisibahon wenggel haruk lamuhup. 3Alem palimu rohon tam honoluk atmisi ane iminon tu: Obog aruhu ane horog aruhu sambil ap inindimuwen tila peruk ane eneg turuk lit wene fahet abug il noruk inap inam amuhup. 4Inam amuhupteg it arimanowen, "Waruhu uruk lahebon ino kema waharuk? Nunumbusagsi tam welatfahon war atfag angge famen tam pohol kinang wal tibag sambilen welatfag angge arimano ketiya oho wereg," uruk lamuhup. 5Keram wal tibag sambil ino Allah ele famen pohol wal tibareg ik famen oho kinang wal tibag ane ari it arimano onoluk angge famen holtuk ane ninirim peruk lamuhup. 6Ik Allahn monde fibagma kinang tam welatfahon ino hondo ribagma siyag atfag. 7Pohol men kinang men ketiya werehon aru fobik indoken nahuwon fahet Allahn ibahon fam kultuk lit foroho. Allahn unggum kong tuhu sambil ino ap Allah wene enepeleg inap siyahap eneptuk lit teko lahu ane fahet foroho. 8Nori, anden nindi henesug lahiyonen alem misig iminon tu henepeleg am fug. Allah olohotma wereg ane o sakan misig eneg mo ilig am wirig am turukmu teng-teng angge (seribu tahun) atukon hag toho ambi roho wereg. Mo ilig am wirig am turukmu teng-teng angge atukon sakan turukmu unukoho misig hag toho wereg. 9Ap winonen Allah sali imbibahon ari Ele si peruk angge famen tahan aruhuwon fahet imbibag fug. Allahn ap winon siyag atuk ane Nirimen it arimano obog toho siyag ane embeselug An nalukema wamag ulug Indi imbik wamburuk lit wereg. 10Nonowe Yesus waruhu sambil ino yoholiyangge waruk ahun laruk hag toho waruhu. O ino sambil pohol sup toho talalang turukmu kinang ineyabangge werehon arimano indoken wiyaloho lin urukmu kinangma wereg angge obog toho eleg aruhu. 11Mun angge man angge ari roho turuk lit elehap turuk halug hiren Allahn peruk ane hikit toho fano ane turuk lit nangginoho welamuhup? 12Hunubabut fano roho wereg lit fobik teko lahu ane ino fahet hiren folo-folo walep peruk lit mangno ruruk lamuhup. O ino sambil pohol indoken naruk lit eleg aruhumu kinang ineyabangge werehon indoken halog toho lin uhup. 13Allahn sali imbibahon hikit toho pohol keron men kinang keron men inam amuhubon mangno ruruk lahe. Pohol kinang keron ino fam werehon fano ane inam aruhu. 14Nori, anden nindi henesug lahiyon arimanowen obog toho ihi ane aru mangno ruruk lamuhup. Allah alukema wereg lit hunubam siyag angge singon tag teg eleg angge welamuhuk ulug yami ruruk lit Hinikni Allah men hininggik ahandip toho welamuhup. 15Nonowe Yesus indi imbik wamburuk lit uwan waharuk elegma hiren fano amuhuk peruk ane alem yami ruruk lamuhup. Ari hag toho nenere Paulus ninindi rohon ino Allahn ineyap turukmu hit fahet suwesingga haharoho emberisi. 16Suwesingga haharoho emberisiyon arimano obog toho alem ino fahet hiyag nisaruk. Alem suwesingga arimano fam werehon kim haruk angge famen winon folo-folo seleg am fug teg. Suwesingga arimano fahet inindi nonghong uruk lit wirik toho wereg elehon arimanowen un ane eneg uruk lit ininggareg siyahap taruk. Ari hag toho suwesingga ap winonen haharehon fam oho kim haruk lit it arimanowen un ane uruk. 17Nori, anden nindi henesug lahiyon alem ino uwan teko la fugmu hit tam honoluk toho welahep. Allahn komo eneptuk ane enepeleg inap arimanowen hininggik lit henebuhupteg un ke hondog heneplug lahup tohon kahal enesug lit welamuhup. Hinine roho unduhuk lahep angge famen siyahonen miyal hisarukmu yingguhup tohon. 18Nonowe Yesus Kristus windat nenepfahon inowen Indi henesug ane mondabi su aruhu. Hiren ninindi anggar amag ulug At ubam fano wenggel haruk lamuhup. At lehoma wereg ulug ketiya oho wel turuk lahe hag toho fobik oho wel turukmen eneg welamuhuk.

will be added

X\