1 TIMOTIUS 2

1Atam hiyag hisaruk lahiyon Allah ubam henele uruk lit heng taruk lamuhupteg ap obog toho fahet sembahyang uruk lit Allahn og nisarukon fahet hi ruruk lamuhup. 2Ap obog toho fahet sembahyang uruk lit nit welamuhuk ane fahet yuwag toho fano roho Allah fam wenggel haruk lit nonori men mangno roho welamuhuken pemerintah men ap suwon men fahet sembahyang uruk lamuhup. 3Ihiyon ari eneg Allah windat neneptisiyon inowen fano peruk lit Ahiyeg haruk. 4Ap obog toho Yesusen fanowap enebuhumu pikir ane onoluk aruhu ulug Allahn fano peruk lit wereg. 5Allah we misig weregma ap men Allah men mangnowap eneptukon we misig eneg Kristus Yesus ap kinangmon atfahon ino At eneg wereg. 6Ap obog toho ininggik hele warehon lol amuhup ulug Inggareg ayeg waroho og isibag. Ihiyon ari atam sali watfahon ino hikit toho inam atisi. 7Wene inam atisiyon aru yonggo laruk laruhun ulug Allahn an unduhuk nubaharisiyon inowen tem toho uruk lahi, nele si uruk lahi fug. Yahudi inap fuhon o pumbuk yatma werehon arimano Allah fam nindi pikit toho wenggel haruk lit hiyag isaruk lahi. 8O kema-kema aben sembahyang uk oho lit ininggik fanowon unug haruk lit unundama ahe lahuk fug angge onori men hili roho welam fug angge sembahyang uruk lamuhup. 9Hiyaben wenema kul ulug sum se roho wan tuk hahon eneg wan turuk lamuhup. Honorukmu fano-fano angge kilabuk fug angge umbagpag turuk angge wan tuk fug angge sum onggo anggolo fam warukon wan tahup fug. 10Sum wan turuk hag toho inindi fanowon eneg wenggel harukon Allah wene holtuk hiyap ariyen wan tuk tehon wan turuk lamuhup. 11Wene hiyag isarikim hiyap eneplohok eleg angge apma wereg lit hiyag isarukon holtuk lamuhup. 12Hiyap enele hemet toho wene hiyag isarukon arimanowen ap hiyag isahup fug. Ininggareg enewelwel tubat taruk lit nenehunsi nit nenepma wereg puk fug angge enele eleg angge welamuhup. 13Allahn ap wal tibag sambil Adam tam wal tibareg Hawa fobik wal tibag. 14Hun Adamen Iblis ele holfag fug, he Hawan eneg ele holfareg siyag ane tibag. 15Siyag ane tibag angge famen hiyaben malik indag eneptuk lit Allah fam wenggel haruk lit ap inindi isaruk lit fano ane turuk halug tuk teg ane eneg turukmu Allahn fanowap enebuhu.

will be added

X\