1 TIMOTIUS 1

1Yesus Kristus inowen yonggo laruk laruhun ulug an Paulus nubam hiyag nitisiyon inowen suwesingga aru haharoho emberuk lahi. Hat an namloho Timotius haret andet Yesus Kristus fahet ambi roho wenggel haruk laheyon ariyen namloho yuhon hag teg lahenma hubam suwesingga aru emberuk lahi. Ninikni Allah windat neneptisiyon ino men Yesus Kristus nonolukap nenebuhu ulug tem toho peruk laheyon ino menen an mon naptusa. Ninikni Allah men Nonowe Yesus Kristus ino menen hat fahet Inindi hasug lit hat hindi yuwahap haptuk lamuhup ulug hat fahet sembahyang uruk lahi. 3An o Makedonia kinangma lik oho lit hat o Efesus wereg lit ap o ino werehon arimano amu-amu ane ap fam hiyag isa fug ulug komo eneptuk lit welaruhun ulug hiyag hitikik. 4It arimano sibiling-sibiling ane uruk lit iniknisi unumbusagsi welatfag ane fahet eneg enele si-sahal ane saplangge uruk lit siyahon eneg wenggel harukmu Allahn teko lahu peruk ane su aruhu fug. Aren hiyag isarukmu wenggel haruk inap eneg onoluk amuhup. 5Ap arimano inindi fano wenggel haruk lit inindi piren toho wenggel ha fug angge enele si hiyag isa fug angge Allah fam tem toho peruk lit ap inindi enesug lit welamuhup ulug komo eneptuk laruhun. 6Ap arimanowen ke fanowon embeselug ke hareyon laruk lit sibiling-sibiling ane ari saplangge uruk. 7It arimanowen wene hiyag isaruk ninap nununuk guru welahe peruk angge famen hiyag usul ulug peruk ane ininggareg unundama enepeleg anggeyen alem onoluk inap hag toho hiyag isaruk. 8Musa wene fam haharoho imbibahon hikit toho aben turuk lamuhup halug Musa wene fahet fano peruk lamuhup. 9Wene ari fano ane eneg turuk inap fahet haharoho imbibag fug, niren te wene fam seli roho wereg inap fahet eneg imbibag peruk lahe. Wene fam seli roho wereg inaben turuk ane fahet tuma hiyag hisamin: Sokowa feseruk lit Allah unuk enepeleg inap men, siyag ane turuk inap men, Allah fam wenggel haruk eleg lit kinangmon fahet eneg wenggel haruk inap men, iniknisi inisingasi unusuruk inap men, ap winon pinggi unusuruk inap men, 10yaying turuk inap men, ap eneg yarog atuk inap men, ap uwan wat taruk inap men, enele si uruk inap men, tuhuk fug uruk angge famen apmane laruk inap men, Allah wene fam tuk hahon wereg angge famen turuk eleg inap fahet ihi. 11It arimano wene fam seli roho werehon wene fanowon holukag ulug Allah palimu werehon inowen fano roho hiyag isa lahun ulug an nubam emberisi. 12Nonowe Yesus Kristus inowen an fahet indi wirik teg peruk lit nineyap naptisireg yabuk aru hiyag nitisimu anden At wel turuk lahi. 13An atam welatikik ane Allah wene apmaya feseruk lit Yesus otsi ininggaliyap eneptuk lit unusimin ulug mug eneplug laruk latikik. Nundama het-pet toho peruk lit it men seli roho welatukuk. Ari roho turuk lit welatikik angge famen Ubam wenggel harukon napeleg tegma yet niyarisireg Indi niyarisi. 14Yesus Kristus Nonowe suwon inowen Indi anggolo niyarisireg Aren Apma numbaharisimu anden At ubam tem toho wenggel haruk lit ap winon nindi enesug lahi. 15Wene haharehon iminon tu tem toho fanowon ap obog tohowen holukag ulug uruk lahi, "Kristus Yesus inowen ap siyag ane turuk latfahon fanowap enebuhuk ulug kinangma wambik watfag." Ap winonen oho siyag ane turuk latusa angge famen anden eneg siyag ane anggolo tirikik. 16Siyag ane anggolo tirikik ane fahet Yesus Kristus indi niyarisireg Aren siyag ane turuk inap Indi isaruk ane inama ferisi. Inama feruk lit ap siyahon an hahon Ubam wenggel haruk halug mondabi fanowon onoluk welamuhubon og isahuk ulug an wirimangge numbaharisi. 17Ninikni suwon ino welatfahon men welamuhubon men seneg lit werehon ino Allah mondabi oluk welaruhuwon ino At misig werehon aben yet ha fuhon ino eneg hi ruruk lit likiya hupmu wel turuk lamuhup. Amin. 18Timotius, namloho, in haptusa sambil wene uruk inaben hiyag hutuson hikit toho yabuk aru turuk laruhun ulug hiyag hutuk lahi. Wene hiyag hutuson ariyen hat hineyap haptisimu wene aru seneg lit fano ane ap unubam turuk lit lisag toho yami ruruk laruhun. 19Yami ruruk lit Allah fahet we tem peruk lit hindi se roho wereg lit yami ruruk laruhun. Ap piren hinahan Allah fam ninindi fano roho peruk ane ninirim urusama it inindimu wenggel harukon kubag halog toho lin uruk hag toho wereg. 20Ihiyon ari Himeneus men Aleksander men itanowen Allah inggaliyap turuk latusa ane umbusuhup ulug Iblisen unusuruk laruhuwen Iblis weregma hik isarikik.

will be added

X\