1 TESALONIKA 1

1An Paulus men Silwanus men Timotius menen Allah umalikisi o Tesalonika welahebon fahet suwesingga aru emberuk lahe. Ninikni Allah men Nonowe Yesus Kristus men mangno roho welahebon ari fahet hit hi heneptuk lahe. Allahn hit fahet Indi henesug lit hit hinindi yuwahap heneptuk laruhu ulug sembahyang uruk lahe. 2Hit obog toho hunubahet Allah fam Ninikni ulug wel turuk lit likiya hupmu sembahyang uruk lahe. 3Yesus fam hinindimu wenggel haruk lit mun ane man ane turuk lahebon oho henesukun fano roho turuk lit honori oho hinindi enesug lahep. Nonowe Yesus Kristus Ninikni Allah alukema wereg lit fanowap nenebuhu ulug hinindi yuwag toho wereg lit mangno ruruk lahepma niren hit fahet likiya hupmu wenggel haruk lahe. 4Nori, Allahn hit Indi henesug lit hiyag heneptisireg mumal heneptisiyon ari nit nonoluk. 5Wene fanowon tam hit hiyag hisaruk latukukon nenembilik fam eneg hiyag hisaruk latukuk fug. Allah hime fanowon inowen nit ninineyap neneptukmu tik-tem toho aruhu ane fahet hiyag hisaruk latukuk. Nit hit sehelimu wereg lit hit fahet turuk latukuk ane hit honoluk. 6Hit nit nonombolim laruk lit Yesus ombolim oho laruk latikip. Aben hunubam angginon emberuk latusa angge famen Allah hime fanowon inowen henehiyehap heneptisimu wene fanowon holtuk latikip. 7Ap obog toho Allah fam inindi wenggel harukon o Makedonia men o Akhaya men werehon unubahet hit wirimangge welatikip. 8Hit famen wene fanowon wilip atisireg Makedonia kinangmon men Akhaya kinangmon men o pumbuk werehon eneg wene saho ririsi fug. O pumbuk obog toho hit Allah fam hinindimu wenggel haruk lahep ane onoluk atusama niren alem ari fahet nungge-nungge hiyag isa fug teg lahe. 9It arimanowen hiren nit hondoko kilap neneptikip ane fahet ap obog toho hiyag isaruk. Usa ane turuk latikip ane embeselug Allah tem ane uruk lit mondabi Oluk werehon ino Apma waharikibon fahet eke enele uruk. 10Ap war atukon wereg ambehen Allah amloho Yesus olukap tibahon ino poholman wambik waruhu ulug mangno ruruk lahebon fahet eke enele uruk. Allahn fobik Olok ane ap unubam umbuhumu At Yesus inowen nit windat nenebuhu.

will be added

X\