1 Ñani‑da ku'a‑da, ña ndoñu'u‑n xa ja'an koio‑da nada kuia ya'a‑ro, antecas xa ndixi Xto'o‑ro Jesús. Ña ndoñu'u‑n xa ja'an‑da nax koo, antecas xa ndixi‑ia. Du'a ma kadava'a‑da nuu‑n. 2 Va'a xna'a mee‑n xa danaa xee kɨu ndadandaa Xto'o‑ro Jesús ntdaa xa io. Xna'a‑n xa xee kɨu ijan, ná xee ɨɨn ñadu'u xakuaa. 3 Hora ka ja'an ñayiu: “Xtuu va'a‑ro, ña tuu nax kuu”, te danaa, hora ijan ni, danaa Ianyuux ñayiu jan. Ná kuu xa danaa ni kixe'e xa xaxia'an hora kaku da'ya ɨɨn ñadɨ'ɨ, da kixe'e Ianyuux xa danaa‑ia ñayiu jan. Te mayo‑i kaku. 4 Ko mee‑n, ñani‑da ku'a‑da, ñatu ka xika‑n nuu nee, xa na'i xee kɨu ijan, ná na'i kɨu ɨɨn ñadu'u ɨɨn ve'e. 5 Ka kuu mee‑n, ntdaa‑n, ñayiu ka jandixa Xto'o‑ro Jesús. Ka xika‑n nuu kanda va'a. Ñatu kuu‑ro ñayiu xakuaa, ña ka xika‑ro nuu nee. 6 Ná kuu ñayiu ka kidi kuu ñayiu jan. Xijan kuu xa maxku kidi mee‑ro, ná ka kidi mee‑i. Na kunde'a‑ro xa ndixi‑ia. 7 Ñayiu kidi, kidi‑i xakuaa, ñayiu xini, xini‑i xakuaa. 8 Ñayiu ka xika nduu kuu‑ro. Io xa koo tu'a‑ro. Ná kuu soldado kuu‑ro, te io xa dada'u ña'a. Ná kuu xa dada'u soldado pechu‑s, kuu xa jandixa‑ro Ianyuux te xemani‑ro ñayiu. Ná kuu xa dada'u soldado dɨkɨ‑s, kuu xa xndetu‑ro xa dakaku ña'a Xto'o‑ro Jesucristu, xa kutuu va'a‑ro xi'in‑ia. 9 Chi ña n‑nduku ña'a Ianyuux mee‑ro, xa kada u'u ña'a‑ia. N‑nduku ña'a‑ia, xa ni'i‑ro xa kutuu va'a‑ro xi'in mee‑ia, xaxe'e Xto'o‑ro Jesucristu. 10 N‑xi'í Jesucristu xaxe'e‑ro, te juini ndito‑ro o n‑xi'í‑ro, ko dani kutuu‑ro xi'in‑ia. 11 Xijan kuu xa, juña'a tna'a‑n tnu'u kanu ini, te chindee tna'a‑n xa kundee ini koio‑n. Nani ka kida‑n vitna, dani kada koio ka‑n. 12 Ñani‑da ku'a‑da, ka xijan‑da xa koo koio‑n xañu'u nuu se ka kidatniu xi'in‑n. N‑kaxí Xto'o‑ro Jesús mee‑sɨ, xa taxnuni koio‑s nuu‑n, te dakua'a ña'a‑s. 13 Koo koio‑n xañu'u nuu‑s, te yo va'a juemani koio‑n‑sɨ, xaxe'e tniu ka kida‑sɨ. Te kutuu mani‑n, ntdaa‑n, ɨɨn‑n xi'in ɨka‑n. 14 Ñani‑da ku'a‑da, ka xijan‑da nuu‑n, xa du'a kada koio‑n. Kudeen koio‑n nuu ñayiu ña ka juini xa kadatniu‑i. Juña'a koio‑n tnu'u kanu ini nuu ñayiu ka yu'u. Chindee koio‑n ñayiu ña ndaku. Kundetu kuee koio‑n nuu ntdaa ñayiu. 15 Kunde'a tna'a‑n, xa ni ɨɨn‑n maxku kada xa u'u nuu ñayiu ka kida xa u'u nuu mee‑n. Kada koio‑n xava'a, nani nuu ntna'a mee‑n, dani nuu ntdaa ñayiu. 16 Ntdaa kɨu kuvete koio‑n. 17 Kɨu xi'in kɨu, kajan ta'u koio‑n nuu Ianyuux. 18 Hora kuvete‑n, hora tnau ini‑n, dava'a nga xa ya'a‑n, ko juña'a koio‑n xa n‑kuta'u‑n nuu Ianyuux. Du'a kunduu na'i ka‑n xi'in Cristu Jesús, te du'a kada‑n xa juini Ianyuux xaxe'e‑n. 19 Ná kuu ɨɨn ñu'u koko kidatniu anu‑n, da kuu Espíritu Ianyuux. Juejoon koio‑n, ɨɨn ɨɨn‑n, xa kadatniu ka‑ia. 20 Nux kachitnu'u ɨɨn ñayiu tnu'u Ianyuux nuu‑n, te io xa chinuu koio‑n tnu'u jan. 21 Kototnuni koio‑n ntdaa xa teku‑n, te kueka va'a koio‑n xa kuu xava'a. 22 Dandoo koio‑n ntdaa xa kuu xa u'u. 23 Kida Ianyuux xa kutuu va'a‑ro. Xá n‑ja'an ña'a‑ia mee‑ro xa ku kuu‑ro ñayiu mee‑ia, xá n‑kida dɨɨn ña'a‑ia. Na kada‑ia xa kada koio mee‑n ntdaa xa juini mee‑ia. Na kuneva'a ña'a‑ia mee‑n, anu‑n xi'in xaxtnuni‑n xi'in yɨkɨ kuñu‑n, xa ma kua'a xa tekuechi ña'a ni ɨɨn, hora ndixi Xto'o‑ro Jesucristu. 24 Ja'an ña'a Ianyuux mee‑n xa kutuu va'a koio‑n xi'in‑ia, te du'a koo. Kua'a‑ro xa koo koio‑ro confianza nuu‑ia, xa du'a kada‑ia. 25 Ñani‑da ku'a‑da, kajan ta'u koio‑n nuu Ianyuux xaxe'e mee‑da. 26 Juña'a koio‑n xa ndajan tnu'u‑da ntdaa ñani‑ro ku'a‑ro xtuu ijan. 27 Xaxe'e xa ta'u tniu ña'a Xto'o‑ro Jesucristu mee‑da, ka ta'u tniu ña'a mee‑da mee‑n, xa ka'u koio‑n carta ya'a nuu ntdaa ñani‑ro ku'a‑ro xtuu ijan. 28 Na taxi Xto'o‑ro Jesucristu xamani‑ia nuu‑n. Du'a na koo.
