Rom 9

1Amʋ na yɩ Zezi Krisi nɔɔnʋ tɩn, a ŋɔɔnɩ cɩga mʋ sɩ kʋ daɩ vwan. Wɛ Joro kʋm na wʋ a bɩcarɩ nɩ tɩn mʋ paɩ a ye nɩ kʋ sɩɩnɩ kʋ yɩ cɩga mʋ, 2dɩ a na brɩ nɩ a wʋ tiini kʋ cɔgɩ yɩ a jɩgɩ liə maŋa maama amʋ tɩtɩ dwi tiinə bam ŋwaanɩ dɩ ba na wʋ sɛ Zezi Krisi tɩn. 3A ya w'ʋ ta lagɩ sɩ Wɛ cɔgɩ amʋ tɩtɩ DƖ daarɩ DƖ pɔɔrɩ-nɩ Zezi Krisi tee nɩ, dɩ kʋ na w'ʋ wanɩ kʋ pa a ko-biə Zwifə bam na vrɩm. 4Ba yɩ Yisɩrayɛlɩ dwi tiinə mʋ. Kʋ yɩ bantʋ mʋ Wɛ dɛɛn pɛ ba ji DƖ biə, yɩ DƖ pa-ba DƖ paarɩ-zulə yam. DƖ ma go ni nɩ DƖ w'ʋ ta wʋra dɩ ba, yɩ DƖ daarɩ DƖ kɩ DƖ cullu tɩm ba jɩŋa nɩ. DƖ ma brɩ-ba ba na maŋɩ sɩ ba taa zuli-DƖ te tɩn. DƖ ma daarɩ DƖ go niə dɩ ba. 5Ba dwi dɩm kuri nuŋi dɩbam nabaarʋ Abraham dwi dɩm wʋnɩ mʋ. Ba na lʋgɩ Zezi Krisi lʋgʋ baŋa nɩ tɩn, kʋ yɩ bantʋ dwi dɩm wʋnɩ mʋ ba lʋg-o. Wʋntʋ mʋ yɩ wəənu maama Tu. O maa yɩ Wɛ yɩ o maŋɩ dɩ zulə sɩ kʋ taa ve maŋa kalʋ na ba ti tɩn. Amina. 6A nan ba lagɩ a ta nɩ Wɛ na goni DƖ ni sɩ DƖ kɩ kʋlʋ tɩn jigi kafɛ. Bɛŋwaanɩ kʋ daɩ nɩ Yisɩrayɛlɩ dwi tiinə bam maama mʋ sɩɩnɩ ba yɩ Yisɩrayɛlɩ tiinə cɩga cɩga Wɛ yigə nɩ. 7Abraham dwi tiinə bam maama nan daɩ o biə cɩga cɩga Wɛ yigə nɩ. Wɛ dɛɛn tagɩ dɩ Abraham DƖ wɩ: "Nmʋ bu Yizakɩ dwi dɩm yɩranɩ mʋ w'ʋ ta yɩ n dwi tiinə cɩga cɩga." 8Kʋ brɩ nɩ Wɛ tee nɩ, kʋ daɩ biə balʋ maama Abraham na lʋgɩ tɩn mʋ yɩ Wɛ biə cɩga cɩga. Kʋ nan yɩ biə balʋ Wɛ na goni ni ba ŋwaanɩ tɩn mʋ sɩɩnɩ ba yɩ DƖ biə cɩga cɩga. 9Bɛŋwaanɩ Wɛ dɛɛn goni ni DƖ wɩ: "Maŋa kam kʋntʋ na joori ka yi, amʋ w'ʋ joori a ba dɩ Sara lʋgɩ bəkərə." 10Kʋ dɛ kʋntʋ mʋ yɩ dɩbam nabaarʋ Yizakɩ kaanɩ Rabɛka dɛɛn ja pugə o lʋ yiywa bale. 11- 12Maŋa kam Rabɛka ta na wʋ lʋgɩ o biə bale bam yɩ ba daa ta yəri lanyɩranɩ naa balɔrɔ tɩn, Wɛ dɛɛn tagɩ dɩd-o DƖ wɩ: "Nakwɩ wʋm mʋ w'ʋ ta yɩ o nyaanɩ wʋm tɩntʋŋnʋ." Kʋ kɩ kʋntʋ sɩ Wɛ na kuri-ba daanɩ te tɩn mʋ tɔgɩ DƖ na maŋɩ DƖ lɩ wʋbʋŋa te tɩn. Kʋ brɩ nɩ Wɛ kurim dɩm tɔgɩ DƖ na bəŋi wʋlʋ sɩ o taa yɩ DƖ nɔɔnʋ tɩn mʋ, sɩ kʋ daɩ nɔɔnʋ wʋm tɩtʋŋa ŋwaanɩ, 13nɩ kʋ daa ta na pʋpʋnɩ Wɛ tɔnɔ kʋm wʋnɩ kʋ wɩ: "Amʋ soe Zakɔbɩ, yɩ a daarɩ a yagɩ Ezayu." 14D'ɩ nan w'ʋ ta nɩ bɛɛ mʋ? D'ɩ b'a wanɩ d'ɩ ta nɩ Wɛ ba jɩgɩ cɩga dɩ DƖ na kɩ te tɩn. 15Bɛŋwaanɩ Wɛ dɛɛn tagɩ dɩ Moyisi DƖ wɩ: "Amʋ w'ʋ ja nɔɔnʋ wʋlʋ ŋwaŋa a na lagɩ tɩn mʋ, yɩ a daarɩ a duri nɔɔnʋ wʋlʋ yibwənə a na lagɩ tɩn." 16Kʋntʋ brɩ nɩ kʋ maama tɔgɩ Wɛ na jɩgɩ nɔɔna ŋwaŋa te tɩn mʋ, sɩ kʋ daɩ nabiinə wʋbʋŋa na lagɩ kʋlʋ tɩn naa ba tɩtʋŋa na yɩ te tɩn ŋwaanɩ. 17Kʋ pʋpʋnɩ Wɛ tɔnɔ kʋm wʋnɩ, nɩ Wɛ dɛɛn tagɩ dɩ Ezipi pa-farʋ wʋm DƖ wɩ: "Amʋ pɛ n di paarɩ sɩ a wanɩ a tɔgɩ nmʋ ŋwaanɩ mʋ a brɩ nɔɔna amʋ dam dɩm na maɩ te tɩn, sɩ kʋ pa nɔɔna taa zəŋi amʋ yɩrɩ dɩm lʋgʋ baŋa maama nɩ." 18Kʋ brɩ nɩ Wɛ duri balʋ ŋwaŋa DƖ na lagɩ tɩn mʋ, yɩ DƖ daarɩ DƖ pa badonnə ta kʋ ba wʋrʋ nɩ DƖ na lagɩ te tɩn. 19Abam wʋ dɩdʋa waɩ o bwe amʋ nɩ: "Kʋ na yɩ kʋntʋ, bɛɛ mʋ yɩ Wɛ nan brɩ nɩ nɔɔna kɩ ba cɔgɩ? Nɔɔn-nɔɔnʋ nan b'a wanɩ o vɩn kʋlʋ Wɛ na lagɩ sɩ o kɩ tɩn." 20Nabiinu yɩ wɔɔ mʋ sɩ o wanɩ o magɩ kantɔgɔ dɩ Wɛ? Kʋntʋ tɩn, kamɔgɔ w'ʋ wanɩ kʋ bwe kʋ mɔrʋ wʋm nɩ: "Bɛɛ mʋ yɩ n mɔ-nɩ tɩntʋ doŋ" na? 21Bɛŋwaanɩ kamɔ-mɔrʋ wʋm jɩgɩ cwəŋə sɩ o kwe dɔgɔ o ma mɔ kamwarʋ tɩlʋ dwi maama o na lagɩ tɩn. O waɩ o cɛ dɔgɔ kʋm kʋntʋ o maa mɔɔnɩ kamɔgɔ sɩ kʋ taa yɩ lʋnnɩ nyɩm, yɩ o daarɩ o mɔɔnɩ kʋdoŋ sɩ kʋ taa yɩ tɩtʋŋa nyɩm. 22Kʋ nan yɩ kʋntʋ mʋ dɩ Wɛ. DƖ na lagɩ sɩ DƖ brɩ nɔɔna DƖ ban-zɔŋɔ kʋm dɩ DƖ dam dɩm na maɩ te tɩn, DƖ jɩgɩ cwəŋə sɩ DƖ kɩ kʋntʋ. DƖ nan pɩɩnɩ DƖ banɩ mʋ dɩ balʋ na pɛ DƖ banɩ zaŋɩ yɩ ba maŋɩ dɩ cɔgɩm tɩn, 23sɩ DƖ daarɩ DƖ pa nɔɔna balʋ DƖ na jɩgɩ ba ŋwaŋa tɩn tɔgɩ ba na DƖ paarɩ dɩm na tiini dɩ jɩgɩ zulə te tɩn. Bantʋ mʋ yɩ balʋ DƖ na maŋɩ DƖ lɩ sɩ ba zʋ DƖ paarɩ zulə yam wʋnɩ tɩn. 24Kʋ nan yɩ dɩbam mʋ kʋntʋ. Wɛ mʋ kuri dɩbam nabiinə dwi maama wʋnɩ, yɩ kʋ daɩ Zwifə dwi dɩm yɩranɩ m'a wʋnɩ, 25nɩ kʋ na maŋɩ kʋ pʋpʋnɩ Oze tɔnɔ kʋm wʋnɩ te tɩn. Wɛ dɛɛn tagɩ DƖ wɩ: "Nɔɔna balʋ ya na daɩ amʋ nɔɔna tɩn, mʋ a laan w'ʋ bəŋi-ba nɩ amʋ nɔɔna. Dwi tiinə balʋ amʋ ya na ba soe tɩn, mʋ a laan w'ʋ bəŋi-ba nɩ amʋ nɔn-sonnu." 26"Je sɩlʋ nɩ n'ɔɔ Wɛ ya na tagɩ dɩ ba DƖ wɩ, ba daɩ DƖ nɔɔna tɩn, kʋ yɩ d'aanɩ mʋ ba laan w'ʋ bəŋi-ba nɩ Ŋwɩa Tu Baŋa-Wɛ biə." 27Ezayi dɩ dɛɛn tagɩ Yisɩrayɛlɩ tiinə bam taanɩ o wɩ: "Yisɩrayɛlɩ tiinə bam na maŋɩ ba tiini ba daga nɩ bugə ni kasʋllʋ na daga te tɩn, ba fɩnfɩɩn yɩranɩ mʋ w'ʋ na vrɩm. 28Bɛŋwaanɩ Yuutu Baŋa-Wɛ b'a daanɩ sɩ DƖ kɩ kʋlʋ maama DƖ na maŋɩ DƖ lɩ wʋbʋŋa sɩ DƖ kɩ tɩn lʋgʋ baŋa nɩ." 29Kʋ ta yɩ nɩnɛɛnɩ Ezayi na maŋɩ o ta te o wɩ: "Dam-fɔrɔ Tu Baŋa-Wɛ ya na wʋ daarɩ dɩbam biə badaara DƖ yagɩ, sɩ kʋ pa d'ɩ dwi dɩm toŋi, d'ɩ ya w'ʋ ti mʋ, nɩ Sodɔm dɩ Gomɔɔrɩ tiinə bam dwi dɩm dɛɛn na ti te tɩn." 30D'ɩ nan w'ʋ ta nɩ bɛɛ mʋ? Dwi-gɛ tiinə balʋ ya na ba kwaanɩ sɩ ba na cɩga Wɛ tee nɩ tɩn laan mʋ tu ba na cɩga Wɛ tee nɩ, ba na kɩ ba wʋ-dɩdʋa dɩ Wɛ tɩn ŋwaanɩ. 31Kʋ daarɩ, Yisɩrayɛlɩ tiinə bam na tiini ba kwaanɩ sɩ ba na cɩga Wɛ tee nɩ DƖ cullu tɩm tɔgɩm ŋwaanɩ tɩn, ba wʋ nɛ. 32Bɛɛ mʋ yɩ ba nan wʋ nɛ cɩga Wɛ tee nɩ? Bantʋ ya bʋŋɩ sɩ ba na cɩga ba kəm-laarʋ tɩm ŋwaanɩ mʋ, yɩ kʋ daɩ nɩ ba kɩ ba wʋ-dɩdʋa dɩ Wɛ. Ba na vɩn sɩ ba sɛ Wɛ kʋntʋ tɩn, kʋ maa nyɩ dɩ ba magɩ ba naga mʋ dɩ kandwɛ dɩlʋ na paɩ nɔɔna tri ba tʋɩ tɩn, 33nɩ kʋ na maŋɩ kʋ pʋpʋnɩ Wɛ tɔnɔ kʋm wʋnɩ kʋ wɩ: "Nii-na, amʋ Wɛ lagɩ a cwi kandwɛ mʋ Siyɔn nɩ. Dɩ maa yɩ kandwɛ dɩlʋ nɔɔna na w'ʋ magɩ ba tɩtɩ dɩ dɩ ba tʋ tɩga nɩ tɩn. Kʋ daarɩ nɔɔnʋ wʋlʋ na kɩ o wʋ-dɩdʋa dɩ wʋlʋ na yɩ kandwɛ dɩm kʋntʋ tɩn, cavɩɩra b'a fɔgɩ ya ja kʋntʋ tu."

will be added

X\