Rom 5

1D'ɩ na kɩ d'ɩ wʋ-dɩdʋa dɩ Zezi tɩn mʋ pɛ d'ɩ na cɩga Wɛ tee nɩ. Kʋntʋ, dɩbam dɩ Wɛ fɔgɩ daanɩ d'ɩ Yuutu Zezi Krisi ŋwaanɩ mʋ. 2Zezi mʋ pɛ dɩbam yi Wɛ yigə, yɩ Wɛ kɩ dɩbam yu-yoŋo d'ɩ na kɩ d'ɩ wʋ-dɩdʋa dɩd-o tɩn ŋwaanɩ. Kʋntʋ tɩn, d'ɩ jɩgɩ tɩɩna nɩ d'ɩ w'ʋ na paarɩ-zulə Wɛ tee nɩ, yɩ kʋ paɩ dɩbam jɩgɩ wʋpolo lanyɩranɩ. 3D'ɩ nan ta jɩgɩ wʋpolo d'ɩ yaara yam wʋnɩ, bɛŋwaanɩ d'ɩ ye nɩ yaara waɩ ya paɩ d'ɩ fɔgɩ d'ɩ zɩgɩ dɩ pu-dɩa. 4D'ɩ pu-dɩa kam yaara yam wʋnɩ tɩn laan maa pa d'ɩ zɩgɩ kəŋkəŋ maŋɩm wʋnɩ. D'ɩ na zɩgɩ kəŋkəŋ maŋɩm wʋnɩ tɩn laan maa pa d'ɩ jɩgɩ tɩɩna Wɛ tee nɩ. 5D'ɩ na jɩgɩ tɩɩna kʋntʋ tɩn, kʋ b'a pa d'ɩ na d'ɩ cavɩɩra, bɛŋwaanɩ Wɛ tiini DƖ kɩ DƖ sono dɩbam bɩcara nɩ, dɩ DƖ na pɛ DƖ Joro kʋm wʋ dɩbam wʋnɩ tɩn. 6Dɩbam na bwənə yɩ d'ɩ warɩ d'ɩ joŋi d'ɩ tɩtɩ tɩn, mʋ Zezi Krisi tɩga o ma vrɩ dɩbam na yɩ nɔn-balwaarʋ tɩn, maŋa kalʋ Wɛ wʋbʋŋa na lagɩ tɩn. 7Kʋ cana sɩ nɔɔnʋ sɛ o tɩ o doŋ ŋwaanɩ, dɩ o na w'ʋ tɩ wʋlʋ ŋwaanɩ tɩn na maŋɩ o yɩ cɩga tu te dɩ. Kʋ nan waɩ kʋ kɩ sɩ nɔɔnʋ b'a kwarɩ fʋʋnɩ sɩ o tɩ nɔn-ŋʋm ŋwaanɩ. 8Kʋ nan na yɩ Baŋa-Wɛ, dɩntʋ brɩ dɩbam DƖ na tiini DƖ soe dɩbam te tɩn, dɩ DƖ na pɛ Zezi Krisi ba o tɩ dɩbam ŋwaanɩ maŋa kalʋ d'ɩ ya ta na yɩ lwarɩm kərə tɩn. 9Zezi na tɩga yɩ o jana kam nuŋi tɩn mʋ pɛ d'ɩ na cɩga Wɛ tee nɩ. Kʋ nan na dwe dɩdɩ tɩn, o laan w'ʋ joŋi dɩbam Wɛ ban-zɔŋɔ kʋm wʋnɩ. 10Dɩbam ya yɩ Wɛ dʋna mʋ. DƖ Bu wʋm tʋʋnɩ dɩm nan mʋ pɛ dɩbam dɩ Wɛ fɔgɩ daanɩ. Kʋ nan na dwe dɩdɩ, dɩbam laan na jigi Wɛ nɔɔna tɩn, DƖ Bu wʋm w'ʋ vrɩ dɩbam, o na joori o bi o yagɩ tʋʋnɩ tɩn ŋwaanɩ. 11Kʋlʋ ta na wəli da tɩn, d'ɩ jɩgɩ wʋpolo lanyɩranɩ dɩ Wɛ, dɩ d'ɩ Yuutu Zezi Krisi na pɛ dɩbam dɩ Wɛ fɔgɩ daanɩ tɩn ŋwaanɩ. 12Nabiinu dɩdʋa ŋwaanɩ mʋ pɛ lwarɩm ba lʋgʋ baŋa, yɩ lwarɩm dɩ ja tʋʋnɩ dɩ wəli da dɩ ba. Kʋntʋ tɩn, nabiinə maama maŋɩ sɩ ba tɩ mʋ, ba maama na kɩ lwarɩm tɩn ŋwaanɩ. 13Kʋ na w'ʋ loori sɩ Wɛ kɩ DƖ cullu tɩm DƖ nɔɔna bam jɩŋa nɩ tɩn, dɩ lwarɩm maŋɩ dɩ wʋ lʋgʋ baŋa nɩ mʋ. Cullu tɩm nan ya ta na tərə tɩn, Wɛ ba jeeli nɔɔna lwarɩm. 14Kʋ na zɩgɩ Adam maŋa kam nɩ sɩ kʋ vu kʋ yi Moyisi maŋa kam tɩn, tʋʋnɩ ya maŋɩ dɩ wʋra mʋ yɩ dɩ waɩ nabiinə. Dɩ maa waɩ balʋ dɩ na kɩ ba tusi, yɩ kʋ daɩ nɩ Adam dɛɛn na kɩ lwarɩm o vɩn Wɛ ni te tɩn. Adam nan brɩ dɩbam Zezi na lagɩ o ba tɩn nyɩnyʋgʋ mʋ. 15Ba nan daɩ bɩdwɩ. Bɛŋwaanɩ Adam dɛɛn na kɩ lwarɩm dɩlʋ tɩn daɩ bɩdwɩ dɩ Wɛ na pɛ dɩbam pɛɛrɩ dɩlʋ zaanɩ tɩn. Nabiinu dɩdʋa kam kʋntʋ lwarɩm dɩm ŋwaanɩ mʋ pɛ nɔɔna zanzan tɩ. Wɛ zaanɩ dɩm nan dwe kʋntʋ, yɩ DƖ tʋŋɩ nabiinu dɩdʋa, wʋntʋ mʋ yɩ Zezi Krisi, sɩ o kɩ nɔɔna zanzan yu-yoŋo kʋ ja gaalɩ. 16Wɛ na pɛ pɛɛrɩ dɩm nɔɔna zaanɩ kʋntʋ tɩn, kʋ daɩ bɩdwɩ nɩ Adam na kɩ lwarɩm te tɩn. Wʋntʋ na kɩ lwarɩm o vɩn Wɛ ni bɩdwɩ tɩn mʋ pɛ Wɛ di nɔɔna sarɩya. Kʋ daarɩ nɔɔna zanzan na kɩ ba tusi tɩn, Wɛ pɛɛrɩ dɩm nan pɛ ba lwarɩm zanzan ti yɩ ba na cɩga DƖ tee nɩ. 17Nabiinu dɩdʋa kam lwarɩm ŋwaanɩ mʋ pɛ tʋʋnɩ tɔgɩ da dɩ jaanɩ nɔɔna. Kʋ nan na dwe dɩdɩ tɩn, balʋ maama Wɛ na kɩ-ba yu-yoŋo kʋ ja gaalɩ, yɩ DƖ kwəri DƖ pa ba na cɩga DƖ tee nɩ tɩn, mʋ w'ʋ ta ŋwɩ Wɛ paarɩ dɩm wʋnɩ nabiinu dɩdʋa wʋlʋ na yɩ Zezi Krisi tɩn ŋwaanɩ. 18D'ɩ nan lwarɩ nɩ Adam na kɩ o tusi bɩdwɩ tɩn mʋ pɛ nabiinə maama na cɔgɩm Wɛ tee nɩ. Zezi Krisi yɩranɩ kəm-laa kʋm dɩ nan mʋ pɛ nɔɔna na cɩga yɩ ba jɩgɩ ŋwɩa Wɛ tee nɩ. 19Nabiinu dɩdʋa kam na vɩn Wɛ ni dɩm tɩn mʋ pɛ nɔɔna zanzan yɩ lwarɩm kərə. Nɔɔnʋ dɩdʋa kam na yɩ Zezi Krisi tɩn nan na sɛ Wɛ ni tɩn dɩ w'ʋ pa nɔɔna zanzan na cɩga Wɛ tee nɩ. 20Wɛ dɛɛn kɩ DƖ cullu tɩm nɔɔna jɩŋa nɩ, sɩ kʋ pa lwarɩm fɔgɩ dɩ puli. Lwarɩm nan na puli kʋntʋ tɩn, Wɛ na kɩ nɔɔna zaanɩ te tɩn w'ʋ tiini kʋ puli zanzan kʋ dwəni. 21Kʋntʋ tɩn, lwarɩm tɔgɩ tʋʋnɩ ŋwaanɩ mʋ dɩ maa te nɔɔna. Wɛ zaanɩ dɩm nan tɔgɩ DƖ na paɩ nɔɔna cɩga te tɩn ŋwaanɩ mʋ dɩ maa di paarɩ nɔɔna tɩtarɩ nɩ, sɩ ba taa jɩgɩ ŋwɩa kalʋ na ba ti tɩn Wɛ tee nɩ d'ɩ Yuutu Zezi Krisi ŋwaanɩ.

will be added

X\