Brɩm Tɔnɔ 18

1Malɛka kam na tagɩ kʋntʋ ka ti tɩn, amʋ ma na malɛka kadoŋ na nuŋi Wɛ-sɔŋɔ nɩ ka maa bɩɩnɩ lʋgʋ baŋa. Ka maa jɩgɩ dam, yɩ ka tiini ka nyɩɩna ka pa pooni zǝŋi lʋgʋ baŋa maama nɩ. 2Ka ma tɔɔlɩ baŋa baŋa dɩ kwǝr-dɩa ka wɩ: «Tʋ-kamunu kʋlʋ yɩrɩ na yɩ Babilɔnɩ tɩn tʋa. Kʋ tʋ kʋ ti. Tɩʋ kʋm laan jigi ciciri-balwaarʋ jǝgǝ mʋ, yɩ ciciri-zɔɔna dwi maama zʋʋrɩ da. Zunǝ balʋ nɔɔna na culi yɩ ba ba laɩ tɩn dwi maama laan zʋʋrɩ dáanɩ mʋ. 3Lʋgʋ baŋa dwi maama ma tʋ tɩʋ kʋm kʋntʋ boorim cwe sɩm wʋnɩ, nɩ ba nyɔgɩ kʋ sa-dɛɛra mʋ ba su te. Lʋgʋ baŋa pwa bam ma tɔgɩ ba kɩ boorim dɩ kʋ. Lʋgʋ baŋa pipimpiinǝ ma tiini ba ji nadunǝ tɩʋ kʋm kʋntʋ ŋwaanɩ, bɛŋwaanɩ kʋ nɔɔna bam soe sɩ ba taa cɔgɩ sǝbu zanzan.» 4Amʋ laan ma ni kwǝrǝ kadoŋ na ŋɔɔnɩ Wɛ-sɔŋɔ nɩ ka wɩ: «Amʋ nɔɔna-ba, nuŋi-na tɩʋ kʋm wʋnɩ, sɩ á yɩ tɔgɩ kʋ wo-balwaarʋ cwe sɩm, sɩ á yɩ tɔgɩ á na kʋ cam dɩm. 5Bɛŋwaanɩ kʋ wo-balwaarʋ tɩm daga zanzan, tɩ daŋɩ da-baŋa nɩ tɩ yi wɛyuu. Wɛ nan ye kʋ kǝm-lwaanʋ tɩm maama ni nɩ. 6Cɔgɩ-na tɩʋ kʋm sɩ kʋ maŋɩ dɩ kʋntʋ na cɔgɩ nɔɔna badonnǝ te tɩn. Pa-na kʋ cɛ kʋ yɩra nɩ sɩ kʋ dwǝni kʋ na pɛ kʋ cɛ nɔɔna yɩra nɩ te tɩn. Fɩ-na-kʋ sɩ kʋ nyɔ sa-dɛɛra balʋ na tiini ba dana ba dwe kʋntʋ sana kam kʋ na paɩ nɔɔna nyɔ tɩn. 7Pipiri-na tɩʋ kʋm ywǝǝni dɩm dɩ kʋ wo-laarʋ tɩm, sɩ tɩ joori tɩ ji cam dɩ yaara kʋ tɩtɩ ŋwaanɩ. Bɛŋwaanɩ tɩʋ kʋm nyɩ dɩ kaanɩ wʋlʋ na yǝni o tɛ o wɩ: ‹Amʋ di paarɩ mʋ, yɩ kʋlʋkʋlʋ bá yaarɩ-nɩ. Amʋ daɩ kadǝm, yɩ a yigǝ bá fɔgɩ ka nywanɩ.› 8Tɩʋ kʋm na brɩ kʋ tɩtɩ kamunni tɩn ŋwaanɩ, yaara dwi maama wʋ́ da yi-kʋ bɩdwɩ baŋa nɩ. Yawɩ-balwaarʋ dɩ yi-nywana dɩ kana wʋ́ ba tɩ ja-kʋ. Mini dɩ ma wʋ́ di-kʋ. Yuutu Baŋa-Wɛ jɩgɩ dam-fɔrɔ, yɩ dɩntʋ mʋ lagɩ DƖ di tɩʋ kʋm sarɩya.» 9Kʋ na yɩ lʋgʋ baŋa pwa balʋ na tɔgɩ ba kɩ tɩʋ kʋm boorim kikiǝ yam yɩ ba di ywǝǝni daanɩ tɩn, ba na nɛ tɩʋ kʋm na jɩgɩ mini tɩn, baá ta keerǝ yɩ ba frɩ ba tɩtɩ kʋ ŋwaanɩ. 10Ba na kwarɩ kʋ yaara tɩn ŋwaanɩ, baá ta zɩgɩ yigǝ yigǝ yɩ ba nii kʋ nyʋa kam. Baá ta coosǝ ba wɩ: «Ei. Lɛɛrʋ, lɛɛrʋ! Babilɔnɩ yɩ tʋ-kamunu mʋ, yɩ kʋ tiini kʋ jɩgɩ dam. Kʋ laan nan tu kʋ cɔgɩ lɩla, maŋa fɩnfɩɩn wʋnɩ.» 11Lʋgʋ baŋa pipimpiinǝ bam dɩ wʋ́ ta keerǝ yɩ ba nywanɩ ba yigǝ tɩʋ kʋm cɔgɩm dɩm ŋwaanɩ, bɛŋwaanɩ nɔɔn-nɔɔnʋ daa tǝrǝ sɩ ba taa yǝgi ba zɩla yam. 12Zɩla yalʋ ba na jɩgɩ ba yǝgi tɩn yɩ sǝbu-sɩŋa wǝǝnu dɩ can-na-poŋo wǝǝnu dɩ kandwa-ŋʋna, kʋ wǝli dɩ gwaarʋ dwi tǝri tǝri, kʋ na yɩ gwar-ŋʋnnʋ tɩlʋ na yɩ fɩfalɩ, dɩ gwaarʋ tɩlʋ na nyɩɩna, dɩ gwar-sʋnnʋ tɩlʋ na yɩ cwɛn cwɛn tɩn. Ba ta maa jɩgɩ da-ŋwɩ dwi maama, dɩ wǝǝnu tɩlʋ zanzan ba na mɛ tuu yǝlǝ dɩ da-laarʋ dɩ can-na dɩ luguru dɩ kandwa yalʋ kaana na pui ba jɩa nɩ ba kɩ tɩn. 13Ba ta maa kwǝri ba jɩgɩ tralɩ dwi maama, dɩ wǝǝnu tɩlʋ ba na zwɛ yɩ tɩ lwǝm ywǝnǝ tɩn, kʋ wǝli dɩ sana dɩ nugǝ dɩ dɩpɛ muni dɩ kamaana, kʋ wǝli dɩ naanɩ dɩ peeni dɩ sise dɩ sɩ trǝkooru. Ba ta jɩgɩ gambɛ dɩ ba yǝgǝ da. 14Ba laan ma wʋ́ ta dɩ tɩʋ kʋm ba wɩ: «Wo-laarʋ tɩlʋ maama nmʋ fra na zʋ tɩn daa tǝrǝ. Nmʋ jɩjɩgɩrʋ tɩm dɩ n nɩnwaŋa kam maama laan je. Nmʋ daa n bá na wǝǝnu tɩm kʋntʋ maŋa dɩ maŋa.» 15Pipimpiinǝ balʋ na tiini ba na nyɔɔrɩ tɩʋ kʋm baŋa nɩ tɩn wʋ́ ta zɩgɩ yigǝ yigǝ, ba na kwarɩ kʋ yaara yam tɩn ŋwaanɩ. Ba ma wʋ́ ta keerǝ, 16yɩ ba coosi ba wɩ: «Ei. Lɛɛrʋ, lɛɛrʋ! Tʋ-kamunu kʋntʋ tiini kʋ jɩgɩ nɩnwaŋa. Kʋ nɔɔna bam maa zʋʋrɩ gwaarʋ tɩlʋ na nyɩɩnɩ tɩn, dɩ tɩlʋ na yɩ nasʋnnʋ cwɛn cwɛn tɩn, yɩ ba pu sǝbu-sɩŋa wǝǝnu dɩ kandwa-ŋʋna ba yɩra nɩ. 17Kʋ jɩjɩgɩrʋ tɩm maama laan ma ba tɩ cɔgɩ lɩla, maŋa fɩnfɩɩn má wʋnɩ.» Kʋ nan na yɩ balʋ maama na co nabwǝǝru tɩn dɩ ba yum tiinǝ, dɩ balʋ na tɔgɩ nabwǝǝru tɩm ba pipi tɩn, dɩ balʋ na zʋʋrɩ nabwǝǝru ba ve je tɩn, ba maama wʋ́ ta zɩgɩ yigǝ yigǝ mʋ ba nii tɩʋ kʋm. 18Bantʋ na nɛ nyʋa kam na zaŋɩ tɩʋ kʋm baŋa nɩ tɩn, baá ta dɩ kwǝr-dɩa ba wɩ: «Tʋ-kamunu kʋntʋ ya ba jɩgɩ doŋ.» 19Ba ma wʋ́ ta pɛ puuri ba lo ba yum nɩ, yɩ ba keeri ba coosi ba wɩ: «Ei. Lɛɛrʋ lɛɛrʋ! Tʋ-kamunu kʋntʋ jɩjɩgɩrʋ tɩm ŋwaanɩ mʋ pɛ balʋ maama na te nabwǝǝru tɩn ji nadunǝ. Kʋ nan cɔgɩ maŋa fɩnfɩɩn má wʋnɩ.» 20Abam balʋ na zʋʋrɩ Wɛ-sɔŋɔ nɩ tɩn taá kɩ-na wʋpolo tɩʋ kʋm cɔgɩm dɩm ŋwaanɩ. Abam balʋ na yɩ Wɛ nɔɔna tɩn, taá kɩ-na wʋpolo, kʋ wǝli dɩ Wɛ tɩntʋŋna bam dɩ DƖ nijoŋnǝ bam. Wɛ mʋ di tɩʋ kʋm sarɩya, yɩ DƖ pa abam bʋra. 21Wɛ malɛka kadoŋ kalʋ na tiini ka dana tɩn laan ma kwe kandwɛ kamunu nɩ nɔŋ-zɔŋɔ na yɩ te tɩn. Ka ma dʋlɩ-kʋ ka yagɩ na-fara bam wʋnɩ yɩ ka wɩ: «Baá kwe tʋ-kamunu Babilɔnɩ dɩ ba dʋlɩ ba yagɩ kʋntʋ doŋ mʋ, yɩ nɔɔn-nɔɔnʋ daa bá na kʋ je. 22Nɔɔna daa bá ta wʋ kʋ wʋnɩ sɩ ba taa magɩ kwaanʋ naa ba taa leenǝ, naa ba taa wui wi naa nabwaanʋ. Gɔgɔ naa tɩtʋŋɩ dwi maama dɩ daa bá ta wʋ kʋ wʋnɩ, yɩ nɔŋɔ kwǝri dɩ daa bá ta zaŋɩ kʋ wʋnɩ. 23Min-zoŋo mini dɩ daa bá tarɩgɩ kʋ wʋnɩ. Kadiri sɔɔ dɩ daa bá kɩ kʋ wʋnɩ. Tʋ-kamunu Babilɔnɩ pipimpiinǝ bam dɛɛn mʋ yɩ lʋgʋ baŋa dɩdɛɛra yigǝ tiinǝ. Kʋ maa ma kʋ liri kikiǝ yam kʋ ganɩ lʋgʋ baŋa dwi tiinǝ maama. 24Kʋ na yɩ Wɛ nijoŋnǝ dɩ Wɛ nɔɔna balʋ maama ba na gʋ tɩn, ba tʋʋnɩ dɩm zɩgɩ tɩʋ kʋm kʋntʋ yɩra nɩ mʋ. Balʋ maama ba na gʋ lʋgʋ baŋa nɩ tɩn caa wʋ́ jǝni tɩʋ kʋm kʋntʋ yuu nɩ mʋ.»


Copyright
Learn More

will be added

X\