Matiyu 28

1Ba siun dɛ dɩm na kɛ tɩn, tɩ-bra-pʋra nɩ Mari wʋlʋ na nuŋi Magɩdala tɩn dɩ Mari wʋdoŋ wʋm ma zaŋɩ ba vu yibeeli dɩm jəgə kam sɩ ba nii. 2Tɩga ma da ka sisiŋi zanzan. Baŋa-Wɛ malɛka ma nuŋi wɛyuu nɩ, ka tu ka ba ka bibili kandwɛ kamunu kʋm ka yagɩ daa nɩ, yɩ ka daarɩ ka jəni dɩ baŋa nɩ. 3Ka yibiyə maa tiini ka nyɩɩna nɩ dʋa na pɩpɩlɩ te tɩn, yɩ ka gwaarʋ tɩm dɩ tiini tɩ pɩɩrɩ parɩ parɩ. 4Nɔɔna balʋ na wʋra ba yɩrɩ yibeeli dɩm tɩn ma bəri dɩ fʋʋnɩ nɩnɛɛnɩ ba tɩgɩ mʋ te. 5Malɛka kam laan ma ta dɩ kaana bam ka wɩ: "'A yɩ ta'a kwarɩ fʋʋnɩ. Amʋ ye nɩ abam lagɩ sɩ 'a na Zezi wʋlʋ ba na jaanɩ ba pa tʋʋn-dagara kam baŋa nɩ ba gʋ tɩn mʋ. 6O nan təri yo. O joori o bi o yagɩ tʋʋnɩ, nɩnɛɛnɩ o ya na maŋɩ o ta kʋlʋ dɩ abam tɩn. Nan ba-na 'a nii o yɩra yam ya na tigi mɛ tɩn. 7Abam nan kɩ lɩla 'a vu 'a ta dɩ o karabiə bam nɩ, Wɛ pɛ o joori o bi o yagɩ tʋʋnɩ, yɩ o laan w'ʋ da yigə o vu o taa cəgi abam Galile nɩ. D'aanɩ mʋ 'a w'ʋ vu 'a na-o. Mʋ kʋlʋ a na lagɩ a ta a brɩ abam tɩn." 8Malɛka kam na tagɩ kʋntʋ tɩn, kaana bam ma kɩ lɩla ba nuŋi yibeeli dɩm jəgə kam nɩ ba maa kɛa, yɩ fʋʋnɩ dɩ wʋpolo kamunu jɩgɩ-ba. Ba ma duri ba vu sɩ ba ta dɩ Zezi karabiə bam kʋlʋ na kɩ tɩn. 9Ba na maa kɛ tɩn, Zezi ma da o jeeri-ba, yɩ o kɩ-ba le. Ba ma vu ba yi o te, ba kuni doonə ba ja o nɛ yɩ ba zul-o. 10Zezi ma ta dɩ ba o wɩ: "'A yɩ ta'a kwarɩ fʋʋnɩ. Ve-na a ko-biə bam te, sɩ 'a ta dɩ ba sɩ ba vu Galile, sɩ d'aanɩ mʋ ba'a na amʋ." 11Kaana bam na nuŋi yibeeli dɩm jəgə kam nɩ kʋntʋ tɩn, nɔɔna balʋ na wʋra ba yɩrɩ-dɩ tɩn badaara ma zaŋɩ ba joori ba vu tɩʋ kʋm wʋ, yɩ ba ta kʋlʋ maama na kɩ tɩn ba brɩ Zwifə kaanɩm yigə tiinə bam. 12Kaanɩm yigə tiinə bam laan ma vu ba ŋɔɔnɩ dɩ tɩʋ kʋm nakwa bam. Ba ma kɩ ni daanɩ yɩ ba kwe səbu-fɔrɔ ba pa pamaŋna bam, 13yɩ ba wɩ: "Abam maŋɩ sɩ 'a ta nɩ, Zezi karabiə bam mʋ tu tɩtɩɩ nɩ, ba ŋɔ o yɩra yam ba kwe ba ja viiri, yɩ abam tigi 'a dɔa. 14Gʋvɩrma tu wʋm nan na tu o lwarɩ kʋ ni nɩ, yɩ kʋ na jɩgɩ taanɩ, dɩbam w'ʋ ŋɔɔnɩ d'ɩ joŋi abam d'ɩ yagɩ, sɩ liə yɩ taa jɩgɩ abam." 15Pamaŋna bam ma joŋi səbu kʋm, yɩ ba sɩɩnɩ ba kɩ kʋlʋ ba na tagɩ-ba sɩ ba kɩ tɩn. Mʋ taanɩ dɩntʋ mʋ Zwifə bam jɩgɩ ba tɛa, kʋ ba kʋ yi zɩm maama. 16Zezi karabiə fugə-dɩdʋa kam laan ma zaŋɩ ba vu Galile, piu kʋlʋ yuu nɩ o na maŋɩ o ta dɩ ba sɩ ba vu tɩn. 17Ba ma sɩɩnɩ ba vu ba na-o, yɩ ba kuni doonə ba zul-o. Badaara maa ta jɩgɩ bʋbwɛa dɩd-o. 18Zezi laan ma vu o yi ba te, yɩ o ta dɩ ba o wɩ: "Wɛ pɛ-nɩ dam sɩ a taa te wɛyuu dɩ tɩga baŋa wəənu maama. 19Kʋntʋ ŋwaanɩ, nan ve-na lʋgʋ baŋa dwi tiinə maama te, sɩ 'a pa ba ji amʋ karabiə, sɩ 'a daarɩ 'a miisi-ba na wʋnɩ dɩ amʋ Ko Wɛ yɩrɩ, dɩ amʋ na yɩ DƖ Bu tɩn yɩrɩ, dɩ DƖ Joro kʋm yɩrɩ ŋwaanɩ, 20sɩ 'a daarɩ 'a brɩ-ba sɩ ba sɛ woŋo kʋlʋ maama amʋ na pɛ abam ni sɩ 'a kɩ tɩn. Nan ta'a ye-na nɩ, amʋ w'ʋ ta wʋra dɩ abam maŋa maama, sɩ kʋ vu kʋ yi lʋgʋ tiim maŋa."

will be added

X\