Marɩkɩ 8

1Kantʋ maŋa kam nɩ kɔgɔ zanzan daa ma joori kʋ gilimi daanɩ Zezi tee nɩ. Ba maa ba jɩgɩ kʋlʋkʋlʋ sɩ ba di. Zezi ma bəŋi o karabiə bam yɩ ba ba o te. O ma ta dɩ ba o wɩ: 2"Nɔɔna bantʋ ŋwaŋa jɩgɩ-nɩ, dɩ ba na tu ba wʋ a tee nɩ zɩm da yatɔ yɩ ba daa ba jɩgɩ wʋdiu sɩ ba di tɩn. 3A na pɛ ba viiri yɩ ba wʋ di kʋlʋkʋlʋ, kana w'ʋ pa ba bəri cwəŋə nɩ, bɛŋwaanɩ ba badaara nuŋi yigə yigə mʋ ba ba amʋ te." 4O karabiə bam ma lər-o ba wɩ: "D'ɩ nan w'ʋ kɩ ta mʋ d'ɩ na wʋdiu gaa kʋntʋ wʋnɩ sɩ kʋ yi ba maama dim?" 5O ma bwe-ba o wɩ: "Abam jɩgɩ dɩpwa yagra mʋ?" Ba ma ləri ba wɩ: "Ya yɩ yarpɛ mʋ." 6Zezi laan ma ta dɩ kɔgɔ kʋm sɩ ba maama jəni tɩga nɩ. O ma kwe dɩpwa yarpɛ yam yɩ o kɩ Wɛ le ya ŋwaanɩ. O ma ja-ya o fɔ fɔ o pa o karabiə bam, yɩ bantʋ dɩ laan joŋi ba ja vu ba pa nɔɔna bam. 7Ba dɛɛn jɩgɩ kaləŋ-balɛ fɩnfɩɩn ba wəli da. Zezi ma kwe-sɩ o kɩ Wɛ le, yɩ o daarɩ o ta dɩ o karabiə bam sɩ ba kwe sɩntʋ dɩ ba maŋɩ ba pa nɔɔna bam maama. 8Ba maama ma di ba su ba daarɩ. Ba laan ma twɛ cicwəəru tɩlʋ na daarɩ tɩn ba su tɩtwarʋ tɩrpɛ. 9Balʋ dɛɛn na di kʋntʋ tɩn yɩ baara mʋrr-tɩna mʋ (4.000), kʋ wəli dɩ kaana dɩ biə dɩ. Zezi laan ma pa kɔgɔ kʋm viiri. 10O ma daarɩ o vu o zʋ naboro dɩ o karabiə bam. Ba ma vu ba yi jəgə kalʋ yɩrɩ na yɩ Dalɩmanuta tɩn. 11Farizɩan tiinə badonnə dɛɛn ma ba Zezi te ba ma puli ba magɩ kantɔgɔ dɩd-o, yɩ ba lagɩ sɩ ba maŋ-o ba nii. Ba ma ta dɩd-o, sɩ o kɩ wo-kɩnkagɩlɩ dɩlʋ na w'ʋ brɩ-ba nɩ o dam dɩm nuŋi Wɛ tee nɩ tɩn. 12O ma tiini o suuri o wʋnɩ, yɩ o ta o wɩ: "Bɛɛ mʋ yɩ zɩm nɔɔna bam lagɩ sɩ a kɩ wo-kɩnkagɩlɩ a brɩ-ba? A lagɩ a ta cɩga mʋ dɩ abam sɩ, a b'a kɩ wo-kɩnkagɩlɩ a brɩ-ba." 13O na tagɩ kʋntʋ tɩn, o ma yagɩ ba te, yɩ o joori o vu o zʋ naboro kʋm sɩ ba vu ba bɛ bubɛ dɩdɩm dɩm. 14Ba dɛɛn na wʋ naboro kʋm wʋnɩ ba maa ve ba bɛ tɩn, Zezi karabiə bam ya swe sɩ ba ja dɩpɛ ba wəli da, dɩpɛ dɩdʋa yɩranɩ mʋ ba ya jɩga. 15Zezi ma ta dɩ ba o wɩ: "Fɔgɩ-na 'a cɩ 'a tɩtɩ sɩ 'a yɩ pa Farizɩan tiinə bam dɩ Pɛ Erɔdɩ dɩ abam ba dabɩlɩ dɩm." 16O na tagɩ dɩ ba kʋntʋ tɩn, ba ma ŋɔɔnɩ daanɩ ba wɩ: "Kʋ yɩ dɩpɛ taanɩ mʋ o tɛa, d'ɩ na ba jɩgɩ tɩn ŋwaanɩ." 17Zezi ma lwarɩ ba na jɩgɩ kʋlʋ ba ŋɔɔnɩ tɩn, yɩ o wɩ: "Bɛɛ mʋ yɩ 'a ŋɔɔnɩ daanɩ 'a wɩ, 'a na ba jɩgɩ dɩpɛ tɩn mʋ te a ŋɔɔnɩ kʋntʋ? Abam ta wʋ lwarɩ Wɛ na jɩgɩ dam te tɩn na? 'A wʋbʋŋa tɩgɩ mʋ na? 18Abam jɩgɩ yiə yɩ ya ba naɩ Wɛ cɩga kam. 'A jɩgɩ zwa yɩ 'a ba ni Wɛ taanɩ dɩm kuri. 19Abam maŋɩ 'a swe a dɛɛn na kwe dɩpwa yanu mʋ a fɔ fɔ a pa baara mʋrr-tɩnu tɩm yɩ ba di na? Ba na di ba ti tɩn, abam twɛ cicwəəru tɩm 'a su tɩtwarʋ tɩgra mʋ?" Ba ma lər-o ba wɩ: "Tɩtwarʋ fugə-tɩle." 20O daa ma bwe-ba o wɩ: "A daa ta na kwe dɩpwa yarpɛ yam a fɔ fɔ a pa baara mʋrr-tɩna tɩm yɩ ba di tɩn, 'a twɛ cicwəəru tɩm 'a su tɩtwarʋ tɩgra mʋ?" Ba ma lər-o ba wɩ: "Tɩtwarʋ tɩrpɛ." 21O laan ma ta dɩ ba o wɩ: "Abam nan daa ta ba ni kʋ kuri mʋ na?" 22Ba dɛɛn ma vu ba yi Betisayida. Nɔɔna badonnə ma ja lilwe ba ja vu Zezi te, yɩ ba loor-o sɩ o ma o jɩŋa o dwe-o, sɩ o na yazurə. 23O ma ja lilwe wʋm jɩŋa o vaŋɩ o ja nuŋi tɩʋ kʋm daa. O ma twɩ lileeru o kɩ o yiə nɩ, yɩ o daŋɩ o jɩa lilwe wʋm baŋa nɩ. O laan ma bwe-o o wɩ: "Nmʋ naɩ woŋo na?" 24Lilwe wʋm ma puri o yiə o nii, yɩ o wɩ: "A naɩ nɔɔna mʋ. Ba nan nyɩ dɩ tweeru mʋ te yɩ ba veə." 25Zezi daa ma daŋɩ o jɩa nɔɔnʋ wʋm yiə nɩ. O laan ma fin o yiə yam, yɩ ya joori ya naɩ. O maa waɩ o naɩ woŋo maama lanyɩranɩ. 26Zezi laan ma ta dɩd-o o wɩ, o yɔɔrɩ o vu sɔŋɔ, sɩ o daa yɩ joori o zʋ tɩʋ kʋm wʋ. 27Zezi dɩ o karabiə bam daa ma kɛ, ba vu ba yi Sezaarɩ kʋlʋ na yɩ Filipi tɩʋ tɩn. Ba na maa ve tɩn, o ma bwe-ba o wɩ: "Nɔɔna yəni ba tɛ ba wɩ, amʋ yɩ wɔɔ mʋ?" 28Ba ma ləri ba wɩ: "Badaara tɛ ba wɩ, nmʋ yɩ Zan wʋlʋ dɛɛn na miisi nɔɔna na wʋnɩ tɩn mʋ. Babam dɩ maa tɛ ba wɩ, nmʋ yɩ Wɛ nijoŋnu Eli mʋ. Badonnə dɩ maa tɛ ba wɩ, nmʋ yɩ faŋa faŋa Wɛ nijoŋnə bam dɩdʋa mʋ." 29O laan ma bwe-ba o wɩ: "Kʋ nan na yɩ abam, abam bʋŋɩ sɩ amʋ yɩ wɔɔ mʋ?" Pɩyɛɛrɩ ma lər-o o wɩ: "Nmʋ yɩ Krisi wʋm Wɛ na tʋŋɩ tɩn mʋ." 30Zezi laan ma kaanɩ-ba sɩ ba yɩ ta kʋntʋ ba brɩ nɔɔn-nɔɔnʋ. 31Kʋ na zɩgɩ kantʋ maŋa kam nɩ, Zezi ma ŋɔɔnɩ o brɩ-ba o wɩ: "Amʋ Nabiin-bu wʋm maŋɩ sɩ a na yaara zanzan. Zwifə nakwa bam dɩ ba kaanɩm yigə tiinə bam dɩ ba cullu karanyɩna tiinə bam mʋ w'ʋ culi amʋ. Ba'a gʋ-nɩ, yɩ da yatɔ dɛ nɩ a laan w'ʋ joori a bi." 32O maa ŋɔɔnɩ kʋntʋ jaja o brɩ-ba. Pɩyɛɛrɩ ma ja-o o vu daa, yɩ o kaan-o o wɩ, o yɩ taa ŋɔɔnɩ kʋntʋ doŋ. 33Zezi ma guni o nii o karabiə bam seeni, yɩ o bagɩ Pɩyɛɛrɩ o wɩ: "Sʋtaanɩ, ve daa a tee nɩ! Nmʋ wʋbʋŋa yam yɩ nabiinə nyɩm mʋ, sɩ ya ba tɔgɩ Wɛ na lagɩ te tɩn." 34Zezi laan ma bəŋi nɔn-kɔgɔ kʋm maama dɩ o karabiə bam sɩ ba ba o te. O ma ta dɩ ba o wɩ: "Nɔɔnʋ wʋlʋ maama na lagɩ sɩ o taa tɔgɩ amʋ kwaga tɩn, kʋntʋ tu maŋɩ sɩ o vɩn o tɩtɩ wʋbʋŋa sɩ o sɛ yaara nɩ wʋlʋ na zɩŋɩ tʋʋn-dagara o maa ve o tʋʋnɩ jəgə te tɩn, sɩ o laan taa tɔgɩ-nɩ. 35Wʋlʋ maama nan na lagɩ sɩ o yɩrɩ o ŋwɩa tɩn, kʋntʋ tu w'ʋ ga-ka mʋ. Kʋ daarɩ, wʋlʋ maama na sɛ sɩ o ga o ŋwɩa amʋ ŋwaanɩ dɩ Wɛ kwər-ywəŋə kam ŋwaanɩ, kʋntʋ tu w'ʋ na ŋwɩa Wɛ tee nɩ. 36Nɔɔnʋ nan na nɛ lʋgʋ baŋa wəənu tɩm maama, yɩ o laan na gɛ ŋwɩa Wɛ tee nɩ, bɛɛ nyɔɔrɩ mʋ o nɛa? 37Kʋlʋkʋlʋ nan tərə nɔɔnʋ na w'ʋ wanɩ o ma ləni o ŋwɩa Wɛ tee nɩ. 38Kʋntʋ tɩn, nɔɔnʋ wʋlʋ maama na kwarɩ cavɩɩra amʋ ŋwaanɩ dɩ amʋ taanɩ dɩm ŋwaanɩ zɩm nɔɔna bam tɩtarɩ nɩ, ba na yɩ nɔn-balwaarʋ yɩ ba yigə tərə dɩ Wɛ tɩn, amʋ Nabiin-bu wʋm dɩ w'ʋ kwarɩ kʋntʋ tu cavɩɩra, maŋa kam a na w'ʋ joori a ba lʋgʋ baŋa dɩ a Ko Wɛ paarɩ-zulə dɩ DƖ malɛsɩ sɩm tɩn."

will be added

X\