Marɩkɩ 7

1Farizɩan tiinə badaara dɩ Wɛ cullu karanyɩna tiinə badonnə dɛɛn ya nuŋi Zeruzalɛm ba ba, ba gilimi Zezi tee nɩ. 2Ba ma na o karabiə badonnə na je ba di wʋdiu, yɩ ba wʋ sanɩ ba jɩa sɩ kʋ tɔgɩ bantʋ cullu tɩm cwəŋə. 3Bɛŋwaanɩ Farizɩan tiinə bam dɩ Zwifə bam maama ba fɔgɩ ba di wʋdiu, yɩ ba wʋ sanɩ ba jɩa sɩ kʋ tɔgɩ cullu tɩlʋ ba nabaara bam na pɛ-ba tɩn. 4Ba na yəni ba zɩgɩ yaga nɩ ba ba sɔŋɔ, ba'a kɩ na mʋ ba ma zarɩ ba tɩtɩ sɩ ba ji lanyɩranɩ, yɩ ba laan daarɩ ba di wʋdiu. Ba ta jɩgɩ cullu tɩdonnə zanzan ba na tɔgɩ-tɩ ba wəli da. Ba yəni ba fɔgɩ ba sɩn ba zwɩ dɩ ba kɔɔra dɩ ba luu-kambi, yɩ ba laan daarɩ ba kɩ wʋdiu da. 5Kʋ yɩ kʋntʋ ŋwaanɩ mʋ Farizɩan tiinə bam dɩ Wɛ cullu karanyɩna tiinə bam dɛɛn bwe Zezi ba wɩ: "Bɛɛ mʋ yɩ n karabiə bam yəni ba di wʋdiu, yɩ ba wʋ sanɩ ba jɩa nɩ dɩbam nabaara bam na pɛ dɩbam cullu tɩlʋ tɩn?" 6O ma ləri-ba o wɩ: "Abam yɩ pipiri-nyɩna mʋ. Wɛ nijoŋnu Ezayi dɛɛn jɩgɩ bʋra dɩ o na maŋɩ o ta abam taanɩ faŋa faŋa te tɩn. Kʋ pʋpʋnɩ Wɛ tɔnɔ kʋm wʋnɩ kʋ wɩ: 'Nɔɔna bantʋ zuli amʋ Wɛ dɩ ba niə mʋ, yɩ ba wʋbʋŋa baŋwɛ dɩ amʋ. 7Ba na paɩ amʋ zulə yalʋ maama tɩn yɩ kafɛ mʋ. Ba yəni ba brɩ nabiinə wʋbʋŋa cullu, yɩ ba paɩ tɩ yɩ amʋ zaasɩm dɩm mʋ.' 8Kʋntʋ, abam kwe Wɛ niə yam na brɩ te tɩn 'a yagɩ mʋ, yɩ 'a daarɩ 'a tɔgɩ nabiinə cullu." 9O daa ta ma ta dɩ ba o wɩ: "Abam yəni 'a vɩn Wɛ niə yam, yɩ 'a daarɩ 'a jɩgɩ 'a tɩtɩ wʋbʋŋa cullu mʋ 'a tɔga. 10Faŋa faŋa tɩn, Moyisi dɛɛn brɩ Wɛ ni dɩm o wɩ, nɔɔnʋ maŋɩ sɩ o taa zuli o nu dɩ o ko. O daa ta brɩ nɩ, nɔɔnʋ na ŋɔɔnɩ ta-balɔrɔ dɩ o nu naa o ko, kʋntʋ tu maŋɩ sɩ ba gʋ-o mʋ. 11Kʋ daarɩ abam nan yəni 'a ja Wɛ taanɩ dɩm 'a gugwəli mʋ yɩ 'a wɩ, nɔɔnʋ na jɩgɩ woŋo kʋlʋ o ya na w'ʋ ma o zəni o nu dɩ o ko tɩn, yɩ o na tagɩ dɩ ba o wɩ, woŋo kʋm kʋntʋ yɩ 'Kɔrɩban' mʋ (kʋ kuri mʋ kʋ yɩ Wɛ nyɩm), 12kʋ brɩ nɩ kʋntʋ tu daa wʋ maŋɩ sɩ o kwe woŋo kʋm o ma zəni o nu dɩ o ko. 13Abam na brɩ nɔɔna sɩ ba taa tɔgɩ 'a tɩtɩ cullu tɩn paɩ Wɛ taanɩ dɩm daa ba jɩgɩ kuri abam tee nɩ. Abam nan ta yəni 'a kɩ wo-balwaarʋ tɩntʋ donnə zanzan 'a wəli da." 14Zezi daa ta ma bəŋi nɔn-kɔgɔ kʋm sɩ ba ba o te, yɩ o ta dɩ ba o wɩ: "Abam maama cəgi lanyɩranɩ sɩ 'a ni a taanɩ dɩm kuri. 15Kʋ daɩ woŋo kʋlʋ na tɔgɩ nɔɔnʋ ni kʋ zʋ o wʋ tɩn mʋ w'ʋ wanɩ kʋ cɔg-o. Kʋ yɩ woŋo kʋlʋ na tɔgɩ nɔɔnʋ ni kʋ nuŋi tɩn mʋ w'ʋ cɔg-o. (( 16'A nan fɔgɩ 'a cəgi a taanɩ dɩm lanyɩranɩ.))" 17O laan ma vu o zʋ sɔŋɔ o daarɩ nɔn-kɔgɔ kʋm pooni nɩ. O karabiə bam ma bwe-o taanɩ dɩm kuri. 18O ma ta dɩ ba o wɩ: "Abam dɩ ba jɩgɩ wʋbʋŋa na? 'A maŋɩ sɩ 'a ta'a ye nɩ, woŋo kʋlʋ maama nɔɔnʋ na w'ʋ kwe o pa kʋ tɔgɩ o ni kʋ zʋ o wʋ tɩn b'a wanɩ kʋ cɔg-o. 19Bɛŋwaanɩ kʋ b'a wanɩ kʋ zʋ o wʋbʋŋa. Kʋ nan w'ʋ tu o kana yɩranɩ mʋ, yɩ o laan daarɩ o tɔ-kʋ o yagɩ." Zezi dɛɛn na tagɩ cɩga kam kʋntʋ tɩn, o brɩ nɩ wʋdiiru maama maŋɩ sɩ nɔɔna taa di-tɩ. 20O daa ta ma ta o wɩ: "Kʋ yɩ kʋlʋ na maŋɩ kʋ wʋ nɔɔnʋ wʋnɩ yɩ kʋ laan nuŋi tɩn mʋ cɔg-o. 21Bɛŋwaanɩ kʋ yɩ nɔɔnʋ wʋbʋŋa mʋ paɩ o lagɩ wo-balwaarʋ kəm, kʋ na yɩ boorim wo-zɔɔna dwi maama, dɩ ŋwɩɩnɩ, dɩ nɔn-gʋra, 22dɩ wo-swənə zanzan, dɩ pu-sɩŋa, dɩ kampinə, dɩ wo-digiru kikiə, dɩ wʋ-gʋrʋ, dɩ bɩbara dɩ nɔn-tʋra, dɩ kamunni, dɩ jwərim. 23Wo-balwaarʋ tɩntʋ maama nuŋi nɔɔnʋ wʋnɩ mʋ yɩ tɩ cɔg-o." 24Zezi dɛɛn ma nuŋi je sɩm kʋntʋ nɩ o vu Tiiri nawurə yam seeni. O maa vu o zʋ sɔŋɔ kʋdoŋ. O ma ba lagɩ sɩ nɔɔna lwarɩ nɩ o wʋra, yɩ o wʋ wanɩ o səgi o tɩtɩ dɩ nɔɔna bam. 25- 26Kaanɩ wʋdoŋ maa wʋra, o na yɩ dwi-gɛ tu. Ba ya lʋg-o Siiri nɩ mʋ, je sɩlʋ yɩrɩ na yɩ Fenisi tɩn. Cicirə maa jɩgɩ o bukɔ ka yaara. O maa na ni Zezi ŋwa tɩn, o ma kɩ lɩla o vu o te, yɩ o kuni doonə o yigə nɩ o loor-o, sɩ o zəli cicirə kam o pa ka yagɩ o bukɔ wʋm yɩra. 27Zezi ma ta dɩd-o o wɩ: "Biə bam mʋ maŋɩ sɩ ba da yigə ba di ba daarɩ. Kʋ wʋ maŋɩ sɩ nɔɔnʋ joŋi o biə wʋdiu o dɩ kakuri yigə nɩ." 28Kaanɩ wʋm maa ləri o wɩ: "Amʋ tu, n tagɩ cɩga. Kakuri sɩlʋ nan na tigi taabʋlʋ kuri nɩ tɩn waɩ sɩ twɛ wʋdiu kʋlʋ biə bam na di yɩ kʋ siiri tɩga nɩ tɩn sɩ di." 29O laan ma ta dɩ kaanɩ wʋm o wɩ: "Nmʋ lərə yam na lana tɩn ŋwaanɩ, a sɛ n loro kʋm. Joori n vu sɔŋɔ. Cicirə kam maŋɩ ka yagɩ n bukɔ wʋm yɩra." 30Kaanɩ wʋm ma sɩɩnɩ o joori o vu sɔŋɔ. O ma na o bukɔ wʋm o tigi o tigə je nɩ, dɩ cicirə kam nuŋi ka daar-o. 31Zezi laan ma zaŋɩ o nuŋi Tiiri nawurə yam nɩ o da Sidɔn o kɛ. O laan ma tɔgɩ je sɩlʋ ba na bə nɩ 'Tɩɩnɩ Fugə' tɩn o vu o yi Galile nɩnɩʋ kʋm je sɩm. 32Nɔɔnʋ ma wʋra o na yɩ zwa-kɔgɔ yɩ o warɩ o ŋɔɔnɩ lanyɩranɩ. Ba ma ja-o ba vu Zezi te. Ba ma loor-o sɩ o kwe o jɩŋa o daŋɩ nɔɔnʋ wʋm baŋa nɩ sɩ o pa o na yazurə. 33Zezi ma ja-o o vu daa o yɩranɩ o daarɩ kɔgɔ kʋm. O ma kwe o nwa o tʋrɩ nɔɔnʋ wʋm zwa nɩ, yɩ o daarɩ o twɩ lileeru o kɩ o nʋa nɩ o ma dwe o dindəlimi. 34O ma kwəni o yuu o nii wɛɛnɩ, yɩ o suuri. O ma ta dɩ nɔɔnʋ wʋm o wɩ: "Efata", kʋ kuri mʋ 'Pʋrɩ!'. 35O na tagɩ kʋntʋ tɩn, o zwa yam ma sɩɩnɩ ya pʋrɩ, yɩ o dindəlimi dɩ waɩ dɩ pipirə. O maa waɩ o ŋɔɔnɩ lanyɩranɩ. 36Zezi ma kaanɩ nɔɔna bam maama, sɩ ba yɩ ta kʋlʋ na kɩ tɩn ba brɩ nɔɔn-nɔɔnʋ. O na kaanɩ-ba kʋntʋ tɩn, mʋ ba laan fɔgɩ ba tɛ dɩ nɔɔna bam. 37Kʋ ma tiini kʋ sʋ balʋ maama na ni tɩn zanzan. Ba maa wɩ: "Woŋo kʋlʋ maama o na kɩ tɩn yɩ lanyɩranɩ mʋ. O paɩ zwa-kwarʋ joori tɩ ni, yɩ mɩmaarʋ dɩ waɩ tɩ ŋɔɔna."

will be added

X\