Marɩkɩ 16

1Ba siun dɛ dɩm ma ba dɩ kɛ. Mari wʋlʋ na nuŋi Magɩdala dɩ Mari wʋlʋ na yɩ Zakɩ nu tɩn dɩ Salomɩ ma zaŋɩ ba nuŋi ba vu ba yəgi tralɩ nugə, sɩ ba ma turi Zezi yɩra yam. 2Dɛ dɩlʋ na saŋɩ siun dɛ dɩm tɩn, ba maa zaŋɩ ba go tɩga dɩ wɛ wʋra dɩ pulə, ba vu yibeeli dɩm jəgə kam. 3Ba na maa ve tɩn, ba ma bwɛ daanɩ ba wɩ: "Wɔɔ mʋ w'ʋ bibili kandwɛ dɩlʋ na pɩ yibeeli dɩm ni tɩn o yagɩ daa nɩ o pa dɩbam?" 4Kandwɛ dɩm na yɩ kamunu tɩn mʋ te ba ŋɔɔnɩ kʋntʋ. Ba na yi jəgə kam tɩn, ba ma fɔgɩ ba nii ba na dɩdaanɩ kandwɛ dɩm bibili dɩ tigi daa nɩ. 5Ba ma vu ba zʋ bɔɔnɩ dɩm wʋ. Ba na zʋ tɩn, ba ma na nɔn-dʋŋʋ, kʋ na je ba jazɩm seeni. O zʋ gwar-poŋo dɩdɔrɔ mʋ. Ba na nɛ-o tɩn, kʋ ma pa ba yɩra sɔɔrɩ. 6O ma ta dɩ ba o wɩ: "'A yɩ ta'a kwarɩ fʋʋnɩ. Abam lagɩ sɩ 'a na Nazarɛtɩ tu Zezi wʋlʋ ba na jaanɩ ba pa tʋʋn-dagara kam baŋa nɩ ba gʋ tɩn mʋ. O nan təri yo. O joori o bi. Nii-na ba ya na tiŋi o yɩra yam mɛ tɩn. 7Nan ve-na 'a ta dɩ Pɩyɛɛrɩ dɩ Zezi karabiə bam maama nɩ, o lagɩ o da yigə o vu o taa cəgi abam Galile nɩ. D'aanɩ mʋ abam w'ʋ vu 'a na-o. Kʋ'ʋ kɩ nɩ o na maŋɩ o ta kʋlʋ o brɩ abam tɩn." 8Kaana bam na ni kʋntʋ tɩn, fʋʋnɩ maa pa ba yɩra saɩ, yɩ ba wʋbʋŋa vugimi. Ba ma nuŋi bɔɔnɩ dɩm wʋnɩ ba duri ba kɛ. Fʋʋnɩ na jɩgɩ-ba kʋntʋ yɩ ba maa ve tɩn, ba ma wʋ tagɩ kʋlʋ na kɩ tɩn ba brɩ nɔɔn-nɔɔnʋ. (( 9Dɛ dɩm Zezi na bi tɩtɩɩtɩ tɩn maa yɩ dɛ dɩlʋ na saŋɩ Zwifə bam siun dɛ dɩm tɩn. O na bi tɩn, o ma puli o brɩ o tɩtɩ Mari wʋlʋ na nuŋi Magɩdala tɩn tee nɩ. Wʋntʋ mʋ yɩ kaanɩ wʋlʋ o ya na zəli ciciri sɩrpɛ o yɩra nɩ tɩn. 10Mari laan ma vu o ta o brɩ balʋ ya na tɔgɩ dɩ Zezi tɩn. O yi ba te dɩ ba wʋrʋ cɔgɩ zanzan yɩ ba keerə. 11Ba na ni nɩ Mari wɩ, Zezi joori o bi o ŋwɩ yɩ wʋm na-o tɩn, ba wʋ sɛ o taanɩ dɩm. 12Kʋ kwaga seeni, Zezi ma ləni o yibiyə yɩ o brɩ o tɩtɩ o karabiə bale. Ba ya nuŋi Zeruzalɛm mʋ ba maa ve tɩ-balaŋa kadoŋ. 13Ba na nɛ-o tɩn, ba ma joori ba vu Zeruzalɛm ba ta ba brɩ ba donnə karabiə bam. Ba maa daa ta wʋ sɛ nɩ kʋ yɩ cɩga. 14Kʋntʋ kwaga nɩ, Zezi laan ma ba o brɩ o tɩtɩ o karabiə fugə-dɩdʋa kam, ba na wʋra ba di wʋdiu maŋa kalʋ tɩn. O ma kaanɩ-ba dɩ ba wʋbʋŋa na muri yɩ ba wʋ sɛ Wɛ cɩga kam tɩn, bɛŋwaanɩ ba vɩn sɩ ba sɛ balʋ na tagɩ ba brɩ-ba nɩ wʋntʋ joori o bi yɩ ba na-o tɩn. 15O laan ma ta dɩ ba o wɩ: "Zaŋɩ-na 'a vu lʋgʋ baŋa je maama, sɩ 'a tɔɔlɩ Wɛ kwər-ywəŋə kam 'a brɩ nabiinə maama. 16Wʋlʋ maama na kɩ o wʋ-dɩdʋa dɩ amʋ yɩ o daarɩ o pa ba miis-o na wʋnɩ Wɛ ŋwaanɩ tɩn, Wɛ w'ʋ vrɩ kʋntʋ tu ŋwɩa. Kʋ daarɩ balʋ maama na wʋ sɛ tɩn w'ʋ ga bʋra yɩ ba na cam Wɛ tee nɩ. 17Balʋ na sɛ amʋ tɩn w'ʋ wanɩ ba taa kɩ wo-kɩnkagɩla yalʋ na brɩ Wɛ dam tɩn. Ba'a da amʋ yɩrɩ ŋwaanɩ ba zəli ciciri nɔɔna yɩra nɩ. Ba'a ta ŋɔɔnɩ ta-gɛ. 18Ba na jaanɩ bɩsankwɩ dɩ ba jɩa, sɩ b'a kɩ-ba kʋlʋkʋlʋ. Ba na nyɔgɩ coŋo, kʋ b'a kɩ-ba kʋlʋkʋlʋ. Ba na daŋɩ ba jɩa yawɩɩna baŋa nɩ, ba'a na yazurə." 19D'ɩ Yuutu Zezi na ŋɔɔnɩ o brɩ-ba kʋntʋ tɩn, Wɛ laan ma pa o zaŋɩ o di DƖ sɔŋɔ. O ma vu o jəni Baŋa-Wɛ jazɩm nɩ. 20O na diini Wɛ-sɔŋɔ kʋntʋ tɩn, o karabiə bam ma nuŋi ba vu ba beeri je maama nɩ ba tɔɔlɩ Wɛ kwərə kam ba brɩ nɔɔna. D'ɩ Yuutu wʋm maa wʋ ba tee nɩ o tʋŋa. O ma pa-ba dam sɩ ba taa kɩ wo-kɩnkagɩla, sɩ kʋ brɩ nɩ o taanɩ dɩlʋ ba na brɩ tɩn sɩɩnɩ dɩ yɩ cɩga.))

will be added

X\