Luki 24

1Dɛ dɩlʋ na saŋɩ siun dɛ dɩm tɩn, kaana bam ma zaŋɩ ba go tɩga ba vu yibeeli dɩm jəgə kam. Ba ma jɩgɩ tralɩa nwi sɩlʋ ba na lagɩ ba ma turi Zezi yɩra yam tɩn. 2Ba na yi jəgə kam tɩn, ba ma na kandwɛ dɩlʋ ya na pɩ bɔɔnɩ dɩm ni tɩn bibili dɩ tigi daa nɩ. 3Ba ma vu ba zʋ bɔɔnɩ dɩm wʋ. Ba wʋ nɛ d'ɩ Yuutu Zezi da. 4Ba wʋbʋŋa ma vugimi, yɩ ba yəri ba na w'ʋ bʋŋɩ kʋlʋ. Ba na zɩgɩ da kʋntʋ tɩn, nɔɔna bale ma da ba nuŋi ba zɩgɩ ba tee nɩ, yɩ ba zʋ gwaarʋ tɩ nyɩɩnɩ pʋgʋ pʋgʋ. 5Fʋʋnɩ ma ja kaana bam. Ba ma cɔɔlɩ ba yum tɩga nɩ. Nɔɔna bam laan ma ta dɩ ba ba wɩ: "Bɛŋwaanɩ mʋ 'a karɩ 'a beeri wʋlʋ na ŋwɩ tɩn twa wʋnɩ? 6O nan təri yo. O joori o bi. Guli-na kʋlʋ o dɛɛn na tagɩ dɩ abam maŋa kalʋ o ta na wʋ Galile nɩ tɩn, 7yɩ o ta o wɩ, ba maŋɩ sɩ ba ja wʋm Nabiin-bu ba kɩ nɔn-balwaarʋ jɩŋa nɩ, sɩ ba pa-o tʋʋn-dagara baŋa nɩ ba gʋ, sɩ o laan joori o bi da yatɔ dɛ nɩ." 8Nɔɔna bam na tagɩ kʋntʋ tɩn, kaana bam laan ma guli Zezi ya na tagɩ kʋlʋ dɩ ba tɩn. 9Ba ma zaŋɩ yibeeli dɩm jəgə kam nɩ, ba joori ba vu ba ta dɩ Zezi karabiə fugə-dɩdʋa kam dɩ balʋ maama na tɔgɩ ba wʋra tɩn. 10Kaana bam kʋntʋ mʋ yɩ Mari wʋlʋ na nuŋi Magɩdala, dɩ Zannɩ, dɩ Mari wʋlʋ na yɩ Zakɩ nu tɩn, kʋ wəli dɩ kaana balʋ na tɔgɩ dɩ ba tɩn. Bantʋ maama maa wʋra ba tɛ kʋlʋ na kɩ tɩn ba brɩ Zezi karabiə fugə-dɩdʋa kam. 11Nɔɔna bam na ni tɩn, ba ma wʋ pɛ kaana bam taanɩ dɩm ja kuri, yɩ ba wʋ sɛ ba ni. 12Kʋ daarɩ Pɩyɛɛrɩ ma zaŋɩ lɩla o duri o vu yibeeli dɩm jəgə kam sɩ o nii. O na yi da tɩn, o ma tiiri o nii bɔɔnɩ dɩm wʋnɩ, yɩ o na garyiə yam yɩranɩ na tigi da. O ma joori o viiri, yɩ kʋ kɩ-o yəəu dɩ kʋlʋ na kɩ tɩn. 13Dɩntʋ dɛ dɩm nɩ mʋ Zezi karabiə bam bale wʋ cwəŋə nɩ ba maa ve tɩʋ kʋdoŋ, kʋ yɩrɩ mʋ Emayusi. Tɩʋ kʋm kʋntʋ yɩ nɩnɛɛnɩ kilomɛtra fugə-dɩdʋa mʋ dɩ Zeruzalɛm. 14Ba na maa ve tɩn, ba maa ŋɔɔna kʋlʋ maama na kɩ tɩn ba veə. 15Ba na ŋɔɔnɩ yɩ ba bwɛ daanɩ kʋntʋ tɩn, Zezi tɩtɩ ma tʋ ba wʋnɩ o tɔgɩ dɩ ba o veə. 16Ba na tɔgɩ daanɩ kʋntʋ tɩn, ba yiə ma pugimi yɩ ba wʋ lwar-o. 17Zezi ma bwe-ba o wɩ: "Bɛɛ woŋo mʋ abam jɩgɩ 'a ŋɔɔnɩ 'a veə?" Ba na ni kʋntʋ tɩn, ba ma zɩgɩ yɩ ba yigə nywanɩ. 18Ba dɩdʋa yɩrɩ mʋ Klɩʋpasɩ. O ma ləri Zezi o wɩ: "Nɔɔna balʋ maama na zʋʋrɩ Zeruzalɛm nɩ tɩn maŋɩ ba lwarɩ wo-kamunnu tɩlʋ na kɩ da lele kʋntʋ tɩn. Bɛɛ nan mʋ kɩa, yɩ nmʋ yɩranɩ wʋ ni?" 19O ma bwe-ba o wɩ: "Bɛɛ wəənu mʋ tɩntʋ?" Ba ma ləri ba wɩ: "Kʋ yɩ kʋlʋ na kɩ Nazarɛtɩ tu Zezi tɩn mʋ. O yɩ Wɛ nijoŋnu mʋ, yɩ o kikiə dɩ o ni-taanɩ maama jɩgɩ dam. Wɛ tɩtɩ brɩ sɩ kʋ yɩ cɩga mʋ, yɩ nɔɔna maama dɩ na kʋntʋ. 20Dɩbam kaanɩm yigə tiinə bam dɩ d'ɩ tɩʋ kʋm nakwa bam ma ja-o, ba vu ba pa ba di o taanɩ sɩ kʋ ji tʋʋnɩ. Ba laan ma pa pamaŋna bam ja Zezi ba vu ba pa tʋʋn-dagara yuu nɩ ba gʋ. 21Dɩbam nan ya jɩgɩ tɩɩna, sɩ wʋntʋ mʋ yɩ wʋlʋ na lagɩ o vrɩ Yisɩrayɛlɩ dwi tiinə bam o yagɩ tɩn. Dɩ kʋntʋ maama, zɩm mʋ jɩgɩ da yatɔ woŋo kʋntʋ na kɩ tɩn. 22Kʋlʋ na wəli da tɩn, dɩbam kɔgɔ kʋm kaana badonnə ve o yibeeli dɩm jəgə kam ba na kʋlʋ na sɔɔrɩ dɩbam yɩra. Ba ya ve tɩtɩɩtɩ mʋ, 23yɩ ba wʋ nɛ o yɩra yam da. Ba ma joori ba ba, ba ta dɩ dɩbam nɩ ba nɛ wo-kɩnkagɩlɩ mʋ. Ba ma na Wɛ malɛsɩ, yɩ sɩ ta dɩ ba sɩ wɩ, Zezi daa ta ŋwɩ mʋ. 24Dɩbam nɔɔna bam badonnə dɩ ma zaŋɩ ba vu yibeeli dɩm nɩ. Ba ma na nɩ kʋ sɩɩnɩ kʋ yɩ nɩnɛɛnɩ kaana bam na tagɩ te tɩn mʋ, kʋ daarɩ Zezi tɩtɩ mʋ ba wʋ nɛ." 25Zezi laan ma ta dɩ nɔɔna bam o wɩ: "'A ba jɩgɩ wʋbʋŋa na? Bɛɛ mʋ yɩ 'a warɩ 'a sɛ Wɛ kwərə kalʋ DƖ nijoŋnə bam dɛɛn na tɔɔlɩ faŋa faŋa tɩn. 26Kʋ daɩ mʋ Krisi wʋm na maŋɩ sɩ o na yaara yalʋ sɩ o daarɩ o di Wɛ-sɔŋɔ o joŋi o paarɩ tɩn na?" 27O laan ma maŋɩ kʋlʋ maama na pʋpʋnɩ o ŋwaanɩ kʋ tiŋi Wɛ tɔnɔ kʋm wʋnɩ tɩn o brɩ-ba. O ma puli o pa ba lwarɩ Moyisi zaasɩm dɩm kuri, yɩ o daarɩ o brɩ-ba faŋa faŋa Wɛ nijoŋnə bam maama zaasɩm dɩm kuri na yɩ te tɩn. 28Ba na maa kɛ tɩn, ba ma vu ba twɛ tɩʋ kʋlʋ ba na maa ve tɩn. Zezi ma kɩ nɩ o maa kɛ yigə mʋ te. 29Nɔɔna bam ma wʋ sɛ, yɩ ba loor-o ba wɩ: "Tɩga lagɩ ka yi. Nan zʋ n pəni dɩbam tee nɩ." O ma sɛ yɩ o da o zʋ. 30O ma jəni sɩ o di wʋdiu dɩ ba. O ma kwe dɩpɛ yɩ o kɩ Wɛ le dɩ ŋwaanɩ. O laan ma fɔ fɔ dɩpɛ dɩm o maŋɩ o pa-ba. 31O na kɩ kʋntʋ tɩn, mʋ ba yiə pʋʋrɩ yɩ ba laan lwar-o. Ba na lwar-o tɩn, o ma da o je ba yigə ni, yɩ ba daa wʋ nɛ-o. 32Ba laan ma ta daanɩ ba wɩ: "Nmʋ wʋ nɛ na? D'ɩ ya na tɔgɩ daanɩ cwəŋə nɩ yɩ o ŋɔɔnɩ o brɩ dɩbam Wɛ tɔnɔ kʋm wəənu tɩm kuri na yɩ te tɩn, d'ɩ ya ba tiini d'ɩ jɩgɩ wʋpolo na?" 33Ba ma zaŋɩ lɩla ba joori ba vu Zeruzalɛm tɩʋ kʋm wʋ. Ba na yi da tɩn, ba ma na Zezi karabiə fugə-dɩdʋa kam dɩ nɔɔna badonnə bam na lagɩ daanɩ jəgə dɩdʋa. 34Bantʋ ma tɛ ba wɩ: "Kʋ yɩ cɩga mʋ. D'ɩ Yuutu Zezi sɩɩnɩ o bi o yagɩ tʋʋnɩ. O tu o brɩ o tɩtɩ dɩ Simɔn mʋ." 35Nɔɔna bale bam dɩ ma maŋɩ kʋlʋ na kɩ cwəŋə nɩ tɩn ba brɩ-ba. Ba daarɩ ba maŋɩ Zezi na fɔgɩ dɩpɛ dɩm yɩ ba laan lwar-o te tɩn. 36Zezi karabiə bam ta na wʋra ba ŋɔɔnɩ kʋntʋ tɩn, o ma da o ba o zɩgɩ ba tɩtarɩ nɩ. O ma jɔɔnɩ-ba yɩ o wɩ: "Yazurə w'ʋ jəni dɩ abam." 37Ba bɩcara ma di yɩ fʋʋnɩ ja-ba zanzan. Ba ma bʋŋɩ nɩ ba nɛ ciru mʋ. 38O ma ta dɩ ba o wɩ: "Bɛŋwaanɩ mʋ kʋ sʋ abam kʋntʋ? Bɛɛ mʋ yɩ 'a jɩgɩ bʋbwɛa dɩ amʋ? 39Fɔgɩ-na 'a nii amʋ jɩa dɩ a nɛ na yɩ te tɩn. Kʋ sɩɩnɩ kʋ yɩ amʋ. Taanɩ-na amʋ 'a nii. Ciru ba jɩgɩ ya-nwana dɩ kwi, nɩ 'a na naɩ amʋ na yɩ te tɩn." 40O na tagɩ kʋntʋ tɩn, o ma brɩ-ba o jataala dɩ o nɛ. 41Kʋ na tiini kʋ jɩgɩ wʋpolo kʋ pa-ba tɩn, ba ta warɩ ba sɛ nɩ kʋ yɩ cɩga, yɩ kʋ sʋ-ba zanzan. O ma bwe-ba o wɩ: "'A jɩgɩ wʋdiu yo nɩ sɩ d'ɩ di na?" 42Ba ma twəri kaləŋ-saŋa ba pa-o. 43O ma joŋi-ka o di ba yibiyə nɩ. 44O laan ma ta dɩ ba o wɩ: "Wəənu tɩlʋ na kɩ amʋ tɩn maŋɩ dɩ taanɩ dɩlʋ a na maŋɩ a ta a brɩ abam, maŋa kalʋ a ta na wʋ abam wʋnɩ tɩn. A dɛɛn tagɩ a wɩ, kʋlʋ maama na pʋpʋnɩ amʋ ŋwaanɩ Wɛ tɔnɔ kʋm wʋnɩ tɩn maŋɩ sɩ kʋ kɩ mʋ. Kʋ na yɩ kʋlʋ Moyisi dɩ faŋa faŋa Wɛ nijoŋnə bam na pʋpʋnɩ tɩn, dɩ kʋlʋ na pʋpʋnɩ Wɛ ləŋ-ŋwɩ tɔnɔ kʋm wʋnɩ tɩn maama." 45O ma daarɩ o pa ba wʋ pʋʋrɩ, sɩ ba wanɩ ba lwarɩ Wɛ tɔnɔ kʋm na brɩ kʋlʋ tɩn kuri. 46O ma ta o brɩ-ba o wɩ: "Ba pʋpʋnɩ Wɛ tɔnɔ kʋm wʋnɩ ba wɩ: 'Krisi wʋm lagɩ o na yaara zanzan mʋ sɩ o tɩ, yɩ o laan w'ʋ joori o bi o yagɩ tʋʋnɩ da yatɔ dɛ nɩ.' 47Ba daa ta pʋpʋnɩ ba wɩ: 'O karabiə w'ʋ vu lʋgʋ baŋa dwi tiinə maama te, yɩ wʋm yɩrɩ dɩm ŋwaanɩ ba'a brɩ nɔɔna nɩ ba maŋɩ sɩ ba ləni ba wʋrʋ mʋ, sɩ Wɛ laan yagɩ ba lwarɩm DƖ ma cɛ-ba.' 'A nan maŋɩ sɩ 'a puli Zeruzalɛm nɩ mʋ 'a ta'a tɔɔlɩ Wɛ kwərə kam kʋntʋ. 48Abam nɛ kʋlʋ maama na kɩ tɩn, 'a nan maŋɩ sɩ 'a brɩ nɔɔna kʋntʋ mʋ. 49A nan w'ʋ tʋŋɩ wʋlʋ wʋm a Ko na goni ni sɩ o ba abam te tɩn, yɩ o na tuə, o'o pa abam na dam dɩlʋ na nuŋi Wɛ te tɩn. Maŋɩ-na Zeruzalɛm nɩ, sɩ 'a ta'a cəgə dam dɩlʋ a na tɛ tɩn." 50Zezi laan ma ja-ba o nuŋi tɩʋ kʋm wʋnɩ, o ja vu o yi Betani seeni. O ma zəŋi o jɩa wɛyuu nɩ, yɩ o ta dɩ ba o wɩ: "Amʋ pɛ abam yu-yoŋo." 51O na kɩ-ba yu-yoŋo kʋntʋ tɩn, o ma yagɩ-ba yɩ Wɛ kwe-o DƖ ja di DƖ sɔŋɔ. 52Ba ma kuni doonə ba zul-o, yɩ ba laan daarɩ ba joori Zeruzalɛm dɩ wʋpolo zanzan. 53Ba na wʋra tɩn, ba wʋ fɔgɩ ba kwɛ Wɛ-di-kamunu kʋm vəŋə, yɩ ba zuli Wɛ maŋa maama.

will be added

X\