Luki 23

1Zwifə bam nakwa kɔgɔ kʋm maama dɛɛn ma zaŋɩ ba ja Zezi ba ja vu gʋvɩrma tu Pilatɩ te. 2Ba ma sɩŋɩ sɩ ba fɔ vwan ba pa-o, yɩ ba wɩ: "Dɩbam nɛ nɔɔnʋ wʋntʋ mʋ o jɩgɩ d'ɩ tɩʋ kʋm nɔɔna bam o gana sɩ ba tusi. O tɛ-ba o wɩ, ba yɩ taa laɩ lampoo ba paɩ gʋvɩrma. O maa kwəri o brɩ o tɩtɩ nɩ wʋm mʋ yɩ Krisi, kʋ na lagɩ kʋ ta nɩ pɛ tɩn." 3Pilatɩ na ni kʋntʋ tɩn, o ma bwe-o o wɩ: "Nmʋ mʋ yɩ Zwifə bam pɛ wʋm na?" Zezi ma lər-o o wɩ: "Mʋ ka da n taga." 4Pilatɩ ma ta dɩ kaanɩm yigə tiinə bam dɩ nɔn-kɔgɔ kʋm maama o wɩ: "Amʋ wʋ nɛ nɔɔnʋ wʋntʋ na kɩ kʋlʋ o cɔgɩ tɩn, sɩ d'ɩ di o taanɩ." 5Ba ma tiini ba ŋɔɔnɩ taanɩ dɩm, yɩ ba kwaana ba tɛ ba wɩ: "O nan yəni o tʋlɩ Zude tɩɩnɩ dɩm maama, o brɩ nɔɔna bam sɩ ba yɩ taa sɛ ba tɩʋ kʋm dɩdɛɛra ni. O dɛɛn puli o kɩ kʋntʋ doŋ Galile nɩ mʋ, yɩ o laan yi yo seeni." 6Pilatɩ na ni kʋntʋ tɩn, o ma bwe-ba sɩ o nii, nɔɔnʋ wʋm yɩ Galile tu mʋ na? 7O na tu o lwarɩ nɩ Zezi nuŋi tɩʋ kʋlʋ Erɔdɩ na te tɩn, o ma pa ba ja-o ba vu wʋntʋ te sɩ o di taanɩ dɩm, bɛŋwaanɩ Erɔdɩ dɩ tɔgɩ o wʋ Zeruzalɛm nɩ maŋa kam kʋntʋ nɩ. 8Erɔdɩ na nɛ Zezi tɩn, o maa jɩgɩ wʋpolo zanzan, bɛŋwaanɩ o ya maŋɩ o ni o ŋwa, yɩ o tiini o lagɩ sɩ o na-o. O maa lagɩ sɩ o nii Zezi w'ʋ kɩ wo-kɩnkagɩlɩ o brɩ-o na. 9O ma kwaanɩ o bwe-o wəənu zanzan. Zezi ma wʋ sɛ o lər-o kʋlʋkʋlʋ. 10Kaanɩm yigə tiinə dɩ cullu karanyɩna tiinə bam maa tɔgɩ ba zɩgɩ da, yɩ ba tiini ba ŋɔɔnɩ taanɩ dɩm dɩ baarɩ sɩ ba ma dɩ-o. 11Erɔdɩ dɩ o pamaŋna bam laan ma gooni Zezi zanzan. Ba pa o zʋ paarɩ gɔrɔ sɩ ba ma mwan-o, yɩ Erɔdɩ laan pa o joori o vu Pilatɩ te. 12Dɩntʋ dɛ dɩm nɩ Erɔdɩ dɩ Pilatɩ laan di ciloŋo mʋ daanɩ, yɩ ba dɛɛn ya culi daanɩ mʋ. 13Pilatɩ ma pa kaanɩm yigə tiinə bam dɩ nakwa bam dɩ nɔɔna bam maama la daanɩ o tee nɩ. 14O ma ta dɩ ba o wɩ: "Abam na saŋɩ nɔɔnʋ wʋntʋ amʋ tee nɩ tɩn, yɩ 'a tɛ 'a wɩ, o yɩ wʋlʋ na ganɩ 'a tɩʋ kʋm nɔɔna bam o pa ba tusi tɩn, kʋntʋ mʋ a nan bwe-o abam yibiyə nɩ sɩ a nii, yɩ a wʋ nɛ kʋlʋ o na kɩ o cɔgɩ yɩ abam ja-o kʋ ŋwaanɩ tɩn. 15Erɔdɩ dɩ wʋ nɛ kʋlʋ o na cɔgɩ tɩn. Mʋ kʋ kuri o pɛ o joori o ba dɩbam te. 'A ta'a ye sɩ kʋlʋkʋlʋ tərə kʋ na w'ʋ pa ba ja-o ba gʋ tɩn. 16Kʋntʋ ŋwaanɩ a'a pa ba mag-o dɩ balaarɩ mʋ, yɩ ba daar-o ba yagɩ." (( 17Pakɩ candiə kam maŋa na yəni ka ba yi, Pilatɩ maŋɩ sɩ o lɩ ba pɩɩnʋ dɩdʋa mʋ o yagɩ sɩ o viiri.)) 18Nɔn-kɔgɔ kʋm maama ma kɩ daanɩ ba kaasɩ dɩ kwər-dɛ ba wɩ: "Kʋ na yɩ nɔɔnʋ wʋntʋ, ja-o n gʋ, sɩ n daarɩ n lɩ Barabasɩ n pa dɩbam." 19Barabasɩ yɩ wʋlʋ ba dɛɛn na kɩ pɩɩna digə nɩ, o na kɩ jara dɩ ba tɩʋ kʋm dɩdɛɛra yɩ o gʋ nɔɔna tɩn ŋwaanɩ mʋ. 20Pilatɩ na lagɩ sɩ o lɩ Zezi o yagɩ tɩn ŋwaanɩ, o daa ma ta dɩ nɔɔna bam sɩ ba sɛ sɩ o yagɩ Zezi. 21Ba ma daa ta vɩn, yɩ ba tiini ba kaasɩ baŋa baŋa ba wɩ: "Pa-o tʋʋn-dagara baŋa nɩ n gʋ. Pa-o tʋʋn-dagara baŋa nɩ n gʋ." 22O daa ta ma ta dɩ ba o kɩ bɩtɔ o wɩ: "Bɛɛ wo-lɔŋɔ mʋ o kɩa? A wʋ nɛ kʋlʋ o na kɩ o cɔgɩ pa kʋ maŋɩ sɩ d'ɩ gʋ-o tɩn. Kʋntʋ tɩn, a'a pa ba mag-o, yɩ a daarɩ a yag-o." 23Ba daa ta maa tiini ba kwaana ba kaasɩ dɩ kwər-dɛ, yɩ ba tɛ dɩ baarɩ ba wɩ: "N maŋɩ sɩ n pa-o dagara baŋa nɩ mʋ n gʋ." Ba na tiini ba ŋɔɔnɩ dɩ kwər-dɛ tɩn, 24kʋ ma pa Pilatɩ sɛ sɩ o kɩ kʋlʋ ba na lagɩ tɩn. 25O ma pa ni sɩ ba lɩ Barabasɩ wʋlʋ ba na lagɩ sɩ o yagɩ o pa-ba tɩn. Wʋntʋ mʋ yɩ wʋlʋ ba ya na jaanɩ ba kɩ pɩɩna digə nɩ, o na kɩ jara dɩ ba tɩʋ kʋm dɩdɛɛra yɩ o gʋ nɔɔnʋ tɩn ŋwaanɩ. Pilatɩ ma daarɩ o kɩ Zezi pamaŋna jɩŋa nɩ, sɩ ba kɩ-o nɩ kɔgɔ kʋm wʋbʋŋa na lagɩ te tɩn. 26Pamaŋna bam laan ma ja Zezi ba maa kɛa. Nɔɔna bam maama maa tɔga. Ba na maa ve tɩn, ba ma jeeri nɔɔnʋ wʋdoŋ, o yɩrɩ mʋ Simɔn. O nuŋi Sirɛɛnɩ mʋ. O dɛɛn ya nuŋi gaa mʋ o ba o yi tɩʋ wʋnɩ o maa kɛa. Pamaŋna bam ma ja-o, yɩ ba pa o zɩŋɩ dagara kam o bakalɩ nɩ o tɔgɩ Zezi kwaga. 27Zeruzalɛm kɔ-fɔrɔ dɛɛn maa tɔgɩ Zezi kwaga. Kaana dɩ maa tɔgɩ ba wʋra, yɩ ba keerə ba frɩ ba tɩtɩ o ŋwaanɩ. 28Zezi ma pipiri o nii-ba yɩ o wɩ: "Zeruzalɛm kaana-ba, yɩ ta'a keeri-na amʋ ŋwaanɩ. 'A za ta'a keeri 'a tɩtɩ dɩ 'a biə ŋwaanɩ. 29Bɛŋwaanɩ maŋa w'ʋ ba ka yi, yɩ ba'a ta wɩ: 'Kaanɩ wʋlʋ maama na yɩ ka-dʋgʋ tɩn yɩ yu-yoŋo tu mʋ. Wʋlʋ na maŋɩ o wʋ lʋgɩ bu sɩ o pa o ŋɔgɩ yɩlɩ tɩn jɩgɩ yu-yoŋo zanzan.' 30Yaara yam kʋntʋ maŋa na yiə, nɔɔna w'ʋ loori pweeru sɩ tɩ tʋ ba baŋa nɩ, yɩ ba loori pu-kum sɩ tɩ kwəli-ba. 31Ta'a nii-na, da-lɩa na jɩgɩ mini ka di tɩntʋ tɩn, kʋ laan na yɩ da-kʋra, ka'a kɩ ta?" 32Ba dɛɛn ma ja nɔn-balwaarʋ tɩle ba vu sɩ ba wəli dɩ Zezi ba gʋ. 33Ba ma vu ba yi jəgə kalʋ yɩrɩ na yɩ 'Yukol-pʋa piu' tɩn. Ba laan ma ja Zezi ba pa dagara kam baŋa nɩ. Ba ma ja nɔn-balwaarʋ tɩm dɩ, ba pa dagarɩ sɩdonnə baŋa nɩ. Ba ma cwi dɩdʋa Zezi jazɩm nɩ. Wʋwʋm maa wʋ o jagwiə nɩ. 34Ba na pagɩ Zezi dagara kam baŋa nɩ kʋntʋ tɩn, o ma loori Wɛ o wɩ: "A Ko, yagɩ n ma n cɛ-ba, sɩ ba yəri woŋo kʋlʋ ba na kɩ tɩn." Pamaŋna bam na lagɩ ba maŋɩ o gwaarʋ tɩm tɩn, ba tagɩ jɔrɔ mʋ ba ma maŋɩ-tɩ. 35Nɔn-kɔgɔ kʋm maa zɩgɩ da ba niə. Zwifə bam nakwa bam ma kɩ-o cavɩɩra, yɩ ba mwana ba wɩ: "O yəni o vrɩ nɔɔna ŋwɩa. O na sɩɩnɩ o yɩ Krisi wʋm Wɛ na kuri tɩn, sɩ o vrɩ o tɩtɩ ŋwɩa sɩ d'ɩ nii." 36Pamaŋna bam dɩ maa mwan-o, yɩ ba jɩgɩ sa-nywana ba suŋi o yigə nɩ. 37Ba maa wɩ: "Nmʋ na sɩɩnɩ n yɩ Zwifə bam pɛ, sɩ n vrɩ n tɩtɩ ŋwɩa sɩ d'ɩ nii." 38Ba dɛɛn ya pʋpʋnɩ tɔnɔ ba tanɩ-kʋ daa kam yɩra nɩ o yuu baŋa nɩ, yɩ kʋ wɩ: "Wʋntʋ yɩ Zwifə bam pɛ mʋ." 39Nɔn-balwaarʋ tɩlʋ ba na pagɩ dɩ Zezi tɩn dɩdʋa maa jɩgɩ Zezi o twɩa yɩ o wɩ: "Kʋ daɩ nmʋ mʋ yɩ Krisi wʋm Wɛ na tʋŋɩ tɩn na? Nan vrɩ n tɩtɩ ŋwɩa, sɩ n daarɩ n vrɩ dɩbam dɩ n wəli da." 40Nɔn-balɔrɔ kʋdoŋ kʋm ma kaanɩ kʋkʋm kʋm kʋ wɩ: "Nmʋ ba kwarɩ Wɛ fʋʋnɩ na? Ba lagɩ ba gʋ dɩbam maama mʋ. 41Kʋ na yɩ dɩbam, dɩbam tʋʋnɩ dɩm maŋɩ, bɛŋwaanɩ kəm-balwaarʋ tɩlʋ d'ɩ na kɩ tɩn, kʋ maŋɩ sɩ d'ɩ tɩ mʋ. Kʋ nan na yɩ nɔɔnʋ wʋntʋ, o wʋ kɩ kʋlʋkʋlʋ o cɔgɩ." 42O ma daarɩ o ta dɩ Zezi o wɩ: "Nmʋ na tu n ba n joŋi n paarɩ dɩm, sɩ n guli a gulə." 43Zezi ma lər-o o wɩ: "A lagɩ a ta cɩga dɩ nmʋ sɩ, nmʋ w'ʋ jəni dɩ amʋ Wɛ-sɔŋɔ kʋm nɩ zɩm dɛ dɩm nɩ." 44Kʋ ma vu kʋ yi maŋa kam wɛ na tu dɩ yi yuparɩ baŋa tɩn. Lʋgʋ kʋm maama ma ji lim taan, sɩ kʋ vu kʋ yi luu batɔ. 45Wɩa kam daa ba jɩgɩ pooni. Gɔrɔ kʋlʋ ba na ləgə ba ma cɩ Wɛ-di-laa kam tɩn ma kaarɩ bɩle. 46Zezi laan ma kaasɩ dɩ kwər-dɩa o wɩ: "Amʋ Ko, a kwe a joro a kɩ nmʋ jɩŋa nɩ." O na tagɩ kʋntʋ tɩn, o ma daarɩ o tɩ. 47Pamaŋna bam yigə tu wʋm na nɛ kʋlʋ na kɩ tɩn, o ma tee Wɛ yɩ o wɩ: "Kʋ yɩ cɩga pwɛɛn. Nɔɔnʋ wʋntʋ sɩɩnɩ o yɩ nɔn-ŋʋm mʋ." 48Kɔgɔ kʋlʋ maama na tu sɩ kʋ nii kəm dɩm tɩn ma sɩɩnɩ ba na kʋ na kɩ te tɩn. Ba na ma joori sɔŋɔ tɩn, ba maa frɩ ba tɩtɩ ba veə, ba wʋ na cɔgɩ tɩn ŋwaanɩ. 49Kʋ daarɩ balʋ maama na maŋɩ ba ye-o tɩn dɩ kaana balʋ ya na tɔgɩ dɩd-o ba nuŋi Galile ba ba tɩn maa zɩgɩ daa nɩ ba niə. 50- 51Nɔɔnʋ wʋdoŋ dɛɛn mʋ wʋra, o yɩrɩ mʋ Zʋzɛfʋ. O nuŋi Zwifə tɩʋ kʋdoŋ mʋ, kʋ yɩrɩ mʋ Arimatɩ. O maa yɩ Zwifə bam nakwa kɔgɔ kʋm nɔɔnʋ dɩdʋa mʋ. O ma kwəri o yɩ nɔn-ŋʋm, yɩ o tɔgɩ Wɛ dɩ cɩga. Ba kɔgɔ kʋm ya na kɩ ni daanɩ sɩ ba ja Zezi tɩn, o wʋ sɛ ba na bʋŋɩ sɩ ba kɩ-o kʋlʋ tɩn. O maa jɩgɩ tɩɩna sɩ Wɛ paarɩ dɩm w'ʋ ba nɔɔna tɩtarɩ nɩ. 52O ma zaŋɩ o vu Pilatɩ te, o loori cwəŋə sɩ o vu parɩ Zezi yɩra yam o kɩ. 53Pilatɩ na sɛ tɩn, Zʋzɛfʋ ma vu o parɩ Zezi dagara kam yuu nɩ. Ba ma kwe gar-jalɩ ba ma pipir-o, yɩ ba daarɩ ba ja-o ba vu ba kɩ piu bɔɔnɩ wʋnɩ. Dɩntʋ yɩ bɔɔnɩ dɩlʋ ba dɛɛn na lugi-dɩ piu yɩra nɩ yɩ ba maŋɩ ba wʋ kɩ nɔɔnʋ da tɩn. 54Dɛ dɩm Zʋzɛfʋ na kɩ kʋntʋ tɩn maa yɩ dɛ dɩlʋ Zwifə bam na maŋɩ sɩ ba ti ba yigə ba siun dɛ dɩm ŋwaanɩ tɩn. Tɩga na yi, ba siun dɛ dɩm puli mʋ. 55Kaana balʋ ya na tɔgɩ dɩ Zezi ba nuŋi Galile tɩn dɛɛn ma da Zʋzɛfʋ kwaga, ba vu ba na bɔɔnɩ dɩm dɩ ba na tiŋi Zezi te tɩn. 56Ba na nɛ kʋntʋ tɩn, ba ma joori ba vu sɔŋɔ. Ba ma vu ba lagɩ tralɩa nwi dwi dwi, sɩ ba ma turi Zezi yɩra yam. Ba siun dɛ dɩm nɩ ba ma sin dɩ ba tɩtʋŋa yam nɩ Wɛ cullu na brɩ te tɩn.

will be added

X\