Ebru 6

1Nan pa-na d'ɩ kɛ wəənu tɩlʋ ba na maŋɩ ba da yigə ba brɩ abam Zezi Krisi cwəŋə kam wʋnɩ tɩn, sɩ d'ɩ daarɩ d'ɩ zaasɩ wəənu tɩlʋ na w'ʋ pa d'ɩ wʋbʋŋa bɩ Wɛ cɩga kam wʋnɩ tɩn. Abam daa wʋ maŋɩ sɩ 'a joori 'a puli Wɛ taanɩ dɩm zaasɩm, bɛŋwaanɩ 'a maŋɩ 'a zaasɩ 'a na w'ʋ ləni 'a wʋ 'a yagɩ kəm-balwaarʋ tɩlʋ na jɩgɩ abam tɩ ve tʋʋnɩ wʋnɩ tɩn, dɩ 'a na w'ʋ kɩ 'a wʋ-dɩdʋa dɩ Wɛ te tɩn. 2'A maŋɩ 'a zaasɩ ba na w'ʋ miisi nɔɔna na wʋnɩ te tɩn woŋo, kʋ wəli dɩ ba na w'ʋ zi ba jɩa nɔɔna baŋa nɩ ba warɩ Wɛ ba ŋwaanɩ te tɩn, yɩ 'a kwəri 'a zaasɩ twa na w'ʋ bi te tɩn, kʋ wəli dɩ Wɛ na w'ʋ ba DƖ di nabiinə sarɩya DƖ ma kweeli te tɩn. 3'A nan pa-na d'ɩ gaalɩ wəənu tɩm kʋntʋ d'ɩ kɛ, sɩ d'ɩ daarɩ d'ɩ kwaanɩ d'ɩ vu yigə, sɩ Wɛ w'ʋ zəni dɩbam yɩ d'ɩ wanɩ d'ɩ vu yigə. 4Kʋ na yɩ balʋ na maŋɩ ba sɛ Wɛ cɩga kam tɩn, ba na paalɩ ba yagɩ Wɛ cwəŋə tɔgɩm, nɔɔn-nɔɔnʋ daa b'a wanɩ o joori o dɩ-ba ka wʋnɩ. Bantʋ maŋɩ ba na Wɛ pooni dɩm, yɩ ba lwarɩ ŋwɩ-dʋŋa kalʋ Wɛ na pɛ tɩn na yɩ te tɩn. Ba maŋɩ ba na Wɛ Joro kʋm dam. 5Ba maŋɩ ba lwarɩ Wɛ taanɩ dɩm na ywəmmə te tɩn, yɩ ba nɛ Wɛ paarɩ dɩlʋ na lagɩ dɩ ba tɩn dam na yɩ te tɩn. 6Nɔɔna bantʋ dwi na yagɩ Wɛ cwəŋə tɔgɩm, nɔɔn-nɔɔnʋ daa b'a wanɩ o pa ba ləni ba wʋ ba daa ta tɔgɩ Wɛ, bɛŋwaanɩ kʋ nyɩ nɩnɛɛnɩ bam tɩtɩ mʋ joori ba pa Wɛ Bu Zezi tʋʋn-dagara kam yuu nɩ ba gʋ yɩ ba paɩ nɔɔna mwan-o te. 7Kʋ nyɩ dɩ dʋa na nɩa lanyɩranɩ nɔɔnʋ kara nɩ te tɩn mʋ. Tɩga kam na nyɔgɩ dʋ-na bam yɩ ka daarɩ ka kɩ wʋdiiru lanyɩranɩ ka pa balʋ na dugi ka baŋa nɩ tɩn, Wɛ w'ʋ kɩ tɩga kam kʋntʋ lanyɩranɩ. 8Kʋ daarɩ tɩga kam na nuŋi sabarɩ dɩ wo-kʋrrʋ yɩranɩ mʋ, kʋ brɩ nɩ ka yɩ kafɛ mʋ, yɩ fɩnfɩɩn na wəli da Wɛ w'ʋ cɔgɩ-ka DƖ yagɩ, yɩ kʋ tiim nɩ ba'a zwɛ-ka dɩ mini mʋ. 9A badon-sonnu-ba, dɩbam na maŋɩ d'ɩ ŋɔɔnɩ kʋntʋ dɩ, d'ɩ jɩgɩ abam cɩga nɩ 'a tɔgɩ cwə-ŋʋŋa kalʋ na w'ʋ pa 'a na vrɩm tɩn. 10Wɛ yɩ cɩga tu mʋ. DƖ nan b'a swe 'a na maŋɩ 'a tʋŋɩ tɩtʋŋ-ŋʋna yalʋ tɩn. DƖ ta b'a swe 'a na soe-DƖ lanyɩranɩ yɩ 'a tʋŋɩ 'a wəli DƖ nɔɔna bam kʋ ba kʋ yi zɩm maama tɩn. 11Amʋ nan na tiini a lagɩ kʋlʋ tɩn mʋ yɩ sɩ abam maama kwaanɩ 'a tɔgɩ Wɛ lanyɩranɩ kʋ vu kʋ yi kweelim, sɩ 'a laan na kʋlʋ maama 'a na jɩgɩ tɩɩna sɩ 'a na Wɛ tee nɩ tɩn. 12'A nan yɩ pa yawɔrɔ zʋ abam. 'A lwəni-na balʋ na fɔgɩ ba zɩgɩ dɩ pu-dɩa yɩ ba jɩgɩ wʋ-dɩdʋa dɩ Wɛ tɩn. Bantʋ laan mʋ w'ʋ ba ba joŋi wo-laarʋ tɩlʋ Wɛ na goni ni sɩ DƖ pa-ba tɩn. 13Wɛ dɛɛn na goni DƖ ni dɩm dɩ Abraham tɩn, kʋ yɩ DƖ dugi dɩ DƖ tɩtɩ mʋ, bɛŋwaanɩ woŋo daa tərə kʋ na dwe-DƖ sɩ DƖ du dɩ kʋ. 14Wɛ goni DƖ ni dɩm dɩd-o DƖ wɩ: "Amʋ w'ʋ kɩ nmʋ lanyɩranɩ, yɩ a'a pa n dwi puli zanzan." 15Wɛ na dugi kʋntʋ tɩn, Abraham dɛɛn ma vɔ pu-dɩa o cəgi taan, yɩ o laan ba o na Wɛ na goni DƖ ni dɩm sɩ DƖ pa-o kʋlʋ tɩn. 16Kʋ na yɩ nabiinə na yəni ba du durə, ba'a ma kʋlʋ na dwe-ba tɩn yɩrɩ mʋ ba du, sɩ kʋ brɩ nɩ ba taanɩ dɩm yɩ cɩga, sɩ bʋbwɛa daa ta tərə. 17Kʋ nan na yɩ Wɛ na goni DƖ ni dɩm dɩ balʋ tɩn, DƖ dɩ lagɩ sɩ ba lwarɩ lanyɩranɩ nɩ DƖ b'a fɔgɩ DƖ yiri DƖ ni dɩm. Kʋntʋ ŋwaanɩ mʋ DƖ dugi durə DƖ wəli dɩ DƖ ni-gonim dɩm. 18Wɛ na ba fɔɛ vwan tɩn ŋwaanɩ, wəənu tɩm kʋntʋ tɩle b'a wanɩ tɩ ləni. Kʋntʋ ŋwaanɩ mʋ dɩbam balʋ na kɩ d'ɩ tɩtɩ Wɛ jɩŋa nɩ tɩn w'ʋ tiini d'ɩ zɩgɩ kəŋkəŋ dɩ pu-dɩa, sɩ d'ɩ ta'a jɩgɩ tɩɩna nɩ d'ɩ w'ʋ na kʋlʋ Wɛ na tiŋi sɩ DƖ pa dɩbam tɩn. 19Tɩɩna yam d'ɩ na jɩgɩ Wɛ tee nɩ kʋntʋ tɩn tiini ya dana, yɩ ya b'a wanɩ ya cɔgɩ. Ya maa paɩ d'ɩ wʋbʋŋa tigi jəgə dɩdʋa, yɩ ya paɩ d'ɩ yi Wɛ tɩtɩ jəŋə je mɛ na cɩgɩ dɩ gɔrɔ sɩ nabiinə yɩ zʋ tɩn. 20Zezi nan mʋ maŋɩ o da yigə o zʋ jəgə kam kʋntʋ dɩbam ŋwaanɩ. Wʋntʋ mʋ jigi Wɛ kaanɩm yuutu sɩ kʋ taa ve maŋa kalʋ na ba ti tɩn, nɩ Mɛlɩkisedɛkɩ dɛɛn na yɩ te tɩn.

will be added

X\