Ebru 4

1Wɛ na goni DƖ ni sɩ DƖ pa nɔɔna zʋ DƖ woro kʋm wʋ ba na siun tɩn daa ta wʋra. Dɩbam nan maŋɩ sɩ d'ɩ ta'a yɩrɩ d'ɩ tɩtɩ mʋ, sɩ nɔɔn-nɔɔnʋ yɩ zaŋɩ o ba o darɩ nɩ o wʋ zʋ Wɛ woro kʋm kʋntʋ wʋ. 2Dɩbam maŋɩ d'ɩ ni Wɛ kwər-ywəŋə kam, nɩnɛɛnɩ d'ɩ nabaara bam dɛɛn dɩ na ni-ka te tɩn. Bantʋ nan na ni-ka tɩn, ba wʋ pɛ ka ja kuri dɩ ba, bɛŋwaanɩ ba wʋ kɩ ba wʋ-dɩdʋa sɩ ba tɔgɩ Wɛ na tagɩ kʋlʋ tɩn. 3Dɩbam balʋ na kɩ d'ɩ wʋ-dɩdʋa dɩ Wɛ tɩn mʋ w'ʋ ba d'ɩ na siun DƖ woro kʋm wʋnɩ. Bɛŋwaanɩ Wɛ tagɩ bantʋ taanɩ DƖ wɩ: "Amʋ ban-zɔŋɔ kʋm pɛ a ta a du dɩ ba a wɩ: 'Amʋ brɩ a b'a pa-ba cwəŋə sɩ ba zʋ amʋ woro kʋm wʋ ba na siun.' " Wɛ na tagɩ kʋntʋ tɩn, kʋ daɩ nɩ DƖ ba jɩgɩ siun jəgə mʋ ba ŋwaanɩ. Kʋ zɩgɩ maŋa kalʋ Wɛ na kɩ lʋgʋ baŋa yɩ DƖ kɩ DƖ tɩtʋŋa yam maama DƖ ti tɩn, mʋ DƖ daarɩ DƖ sin. 4Wɛ tɔnɔ kʋm tagɩ da yarpɛ dɛ dɩm taanɩ kʋ wɩ: "Da yarpɛ dɛ nɩ mʋ Wɛ sin dɩ DƖ tɩtʋŋa yam maama." 5Wɛ nan tagɩ DƖ siun kʋm taanɩ DƖ wɩ: "Amʋ brɩ a b'a pa-ba cwəŋə sɩ ba zʋ amʋ woro kʋm wʋ ba sin." 6Kʋntʋ tɩn, d'ɩ nabaara balʋ na dɛ yigə ba ni Wɛ kwər-ywəŋə kam tɩn wʋ wanɩ ba zʋ DƖ woro kʋm wʋ ba sin, ba na vɩn DƖ ni tɩn ŋwaanɩ. Kʋntʋ ŋwaanɩ kʋ laan daarɩ sɩ nɔɔna badaara mʋ na cwəŋə ba zʋ. 7Mʋ kʋ kuri Wɛ daa ta tiŋi dɛ dɩdoŋ, kʋ na lagɩ kʋ ta nɩ zɩm, sɩ nɔɔna wanɩ ba zʋ DƖ woro kʋm wʋ ba sin. Kʋntʋ, bɩna zanzan na kɛ tɩn, Wɛ dɛɛn ta pɛ Davidi mʋ ta kʋlʋ dɩbam na maŋɩ d'ɩ ni tɩn o wɩ: "Abam zɩm na ni Wɛ kwərə kam, 'a yɩ zaŋɩ 'a digili 'a bɩcara." 8Zozwe dɛɛn ya na sɩɩnɩ o ja d'ɩ nabaara bam o vu o zʋ Wɛ woro kʋm wʋ sɩ ba sin, Wɛ ya daa b'a ŋɔɔnɩ siun dɛ dɩdoŋ taanɩ daga. 9Kʋntʋ mʋ d'ɩ ye nɩ cwəŋə daa ta wʋra zɩm, sɩ Wɛ nɔɔna na siun, nɩ DƖ tɩtɩ na sin da yarpɛ dɛ dɩm nɩ te tɩn. 10Wʋlʋ maama na zʋ Wɛ woro kʋm wʋ tɩn, wʋntʋ w'ʋ sɩɩnɩ o na siun dɩ o tɩtʋŋa yam, nɩ Wɛ dɩ dɛɛn na sin dɩ DƖ tɩtʋŋa yam te tɩn. 11Kʋntʋ ŋwaanɩ kwaanɩ-na 'a pa d'ɩ zʋ Wɛ woro kʋm wʋ sɩ d'ɩ na siun. Nɔɔn-nɔɔnʋ yɩ zaŋɩ o vɩn Wɛ ni sɩ o joori Wɛ kwaga nɩ, nɩ d'ɩ nabaara bam dɛɛn na kɩ te tɩn. 12Wɛ taanɩ dɩm jɩgɩ ŋwɩa yɩ dɩ dana lanyɩranɩ. Dɩ jɩgɩ ni dɩ dwe sʋ-lɔŋɔ kʋlʋ na jɩgɩ niə yale tɩn. Dɩ maa waɩ dɩ zʋʋrɩ nɔɔnʋ wʋ dɩ pɔɔrɩ o joro dɩ o bɩcarɩ wəənu maama daanɩ, yɩ dɩ daarɩ dɩ ye o swan dɩ o wʋbʋŋa maama na yɩ te tɩn. 13Kʋlʋkʋlʋ b'a wanɩ kʋ səgi Wɛ yigə nɩ. Woŋo kʋlʋ maama na wʋra tɩn yɩ jaja mʋ DƖ yigə nɩ. Kʋ yɩ dɩntʋ mʋ d'ɩ maŋɩ sɩ d'ɩ ba d'ɩ zɩgɩ DƖ yigə nɩ d'ɩ ta kʋlʋ maama d'ɩ na kɩ tɩn. 14Dɩbam nan jɩgɩ Wɛ kaanɩm yuutu o na yɩ kamunu o diini o vu o yi Wɛ-sɔŋɔ. Wʋm mʋ yɩ Wɛ Bu Zezi. Kʋntʋ ŋwaanɩ, pa-na d'ɩ sɛ Wɛ cwəŋə tɔgɩm lanyɩranɩ d'ɩ zɩgɩ kəŋkəŋ. 15Wɛ kaanɩm yuutu wʋm kʋntʋ nan daɩ wʋlʋ na ba jɩgɩ dɩbam balʋ na bwənə tɩn ŋwaŋa. O tɩtɩ dɩ nan nɛ yaara dɩ maŋɩm woŋo maama wʋnɩ, nɩ dɩbam dɩ na nɛ maŋɩm te tɩn. Nan dɩ kʋntʋ dɩ, o ta wʋ kɩ lwarɩm. 16Kʋntʋ ŋwaanɩ, pa-na d'ɩ ta'a jɩgɩ baarɩ sɩ d'ɩ wanɩ d'ɩ yi Dam-fɔrɔ Tu Wɛ jəŋə je, sɩ d'ɩ joŋi DƖ zaanɩ dɩm. Kʋntʋ mʋ Wɛ w'ʋ duri d'ɩ ŋwaŋa yɩ DƖ pa dɩbam zaanɩ, sɩ kʋ wanɩ kʋ zəni dɩbam maŋa kalʋ d'ɩ na lagɩ tɩn.

will be added

X\