Galatɩ 6

1A ko-biə-ba, 'a na nɛ nɩ nɔɔnʋ kɩ kəm o tusi, abam balʋ Wɛ Joro kʋm na vaŋɩ tɩn maŋɩ sɩ 'a zuri 'a yɩra mʋ 'a brɩ-o dɩ wʋ-bono, sɩ o joori o tɔgɩ cɩga cwəŋə. 'A nan ta'a yɩrɩ 'a tɩtɩ, sɩ kʋ yɩ zaŋɩ kʋ pa abam dɩ daa tusi. 2'A ta'a zəni daanɩ 'a cana wʋnɩ, sɩ 'a na kɩ kʋntʋ mʋ 'a sɛ Zezi Krisi ni dɩm o na pɛ tɩn. 3Abam wʋlʋ na bʋŋɩ o paɩ o yɩ kamunu yɩ o yagɩ o daɩ kʋlʋkʋlʋ tɩn, kʋntʋ tu ganɩ o tɩtɩ mʋ. 4Nɔɔnʋ maama maŋɩ sɩ o taa nii o tɩtɩ tɩtʋŋa na yɩ te tɩn mʋ. Kʋntʋ tu nan na nɛ nɩ o tɩtʋŋa yam lana, o laan w'ʋ wanɩ o taa jɩgɩ wʋpolo dɩ o tɩtɩ na kɩ kʋlʋ tɩn m'a, kʋ daɩ sɩ o kwe o maŋɩ dɩ o doŋ tɩtʋŋa na yɩ te tɩn. 5Bɛŋwaanɩ nɔɔnʋ maama maŋɩ sɩ o tʋŋɩ tɩtʋŋɩ dɩlʋ Wɛ na pɛ-o tɩn mʋ. 6Nɔɔnʋ wʋlʋ ba na zaas-o Wɛ taanɩ tɩn maŋɩ sɩ o kɩ o na jɩgɩ kʋlʋ tɩn mʋ o pa wʋlʋ na zaas-o tɩn. 7'A yɩ zaŋɩ 'a ganɩ 'a tɩtɩ, sɩ nɔɔn-nɔɔnʋ b'a wanɩ o səgi o na kɩ kʋlʋ tɩn Wɛ yigə nɩ. Nɔɔnʋ tɩtʋŋa na w'ʋ pa o na nyɔɔrɩ dɩlʋ tɩn nyɩ dɩ valʋ na dugi o kara yɩ o maŋɩ sɩ o joori o ba o zagɩ wəənu tɩlʋ dwi o na dugi tɩn mʋ. 8Nɔɔnʋ nan na tʋŋɩ wo-yɔɔrʋ tɩlʋ o tɩtɩ wʋbʋŋa na lagɩ tɩn, o nyɔɔrɩ mʋ w'ʋ ba taa yɩ tʋʋnɩ. Kʋ daarɩ nɔɔnʋ nan na tʋŋɩ tɩtʋŋa yalʋ Wɛ Joro kʋm wʋbʋŋa na lagɩ tɩn, kʋntʋ tu nyɔɔrɩ mʋ w'ʋ ta yɩ Wɛ ŋwɩ-dʋŋa kalʋ na ba tiə DƖ Joro kʋm na w'ʋ pa-o tɩn. 9Kʋntʋ ŋwaanɩ, d'ɩ nan yɩ pa yawɔrɔ zʋ dɩbam sɩ d'ɩ yagɩ lanyɩranɩ kəm. D'ɩ na fɔgɩ d'ɩ zɩgɩ kəŋkəŋ, d'ɩ laan w'ʋ ba d'ɩ na nyɔɔrɩ dɩlʋ na lana tɩn. 10Kʋntʋ ŋwaanɩ, d'ɩ na nɛ pwələ maŋa dɩ maŋa, d'ɩ maŋɩ sɩ d'ɩ ta'a kɩ lanyɩranɩ dɩ nɔɔna maama, kʋ na dwe dɩdɩ dɩ d'ɩ ko-biə balʋ dɩ na jɩgɩ wʋ-dɩdʋa dɩ Zezi Krisi tɩn. 11Nii-na, amʋ tɩtɩ laan mʋ mɛ a jɩŋa a pʋpʋnɩ pʋpʋn-bu-kamunə yantʋ sɩ a pa abam. 12Kʋ na yɩ nɔɔna balʋ na kwaanɩ sɩ ba fɩn abam sɩ 'a ta'a gonə Zwifə bam cullu tɩm ŋwaanɩ tɩn, bantʋ yɩ balʋ na lagɩ sɩ ba na yɩrɩ mʋ nɔɔna tee nɩ dɩ ba na kɩ ba tɩtɩ te tɩn. Ba nan ba lagɩ sɩ nɔɔna taa bɛɛsɩ-ba. Kʋntʋ ŋwaanɩ mʋ ba b'a sɛ sɩ ba brɩ nɔɔna nɩ Wɛ w'ʋ vrɩ-ba lwarɩm wʋnɩ Zezi Krisi na tɩgɩ tʋʋn-dagara kam baŋa nɩ tɩn ŋwaanɩ. 13Balʋ bam ba na sɛ sɩ ba taa goni tɩn tɩtɩ nan ba tɔgɩ Wɛ cullu tɩm cɩga cɩga. Ba nan lagɩ sɩ ba pa abam dɩ sɛ gwəŋə kam mʋ, sɩ kʋ pa ba na cwəŋə ba taa ŋɔɔnɩ ba magɩ ba nyɔɔna nɩ abam sɛ 'a go nɩ bantʋ te. 14Kʋ nan na yɩ amʋ, woŋo kʋlʋ yɩranɩ amʋ na w'ʋ ta jɩgɩ a ŋɔɔnɩ dɩ wʋpolo tɩn yɩ d'ɩ Yuutu Zezi Krisi na tɩgɩ tʋʋn-dagara kam baŋa nɩ o ma vrɩ nɔɔna te tɩn mʋ. Kʋ nan yɩ Zezi Krisi tʋʋn-dagara kam ŋwaanɩ lʋgʋ kʋntʋ wəənu tɩm nyɩ nɩ tɩ tɩgɩ mʋ, tɩ daa ba jɩgɩ kuri dɩ amʋ, yɩ a dɩ nyɩ dɩ tʋ mʋ dɩ wəənu tɩntʋ. 15Nmʋ na gonə, naa n na wʋ goni dɩ, kʋntʋ daɩ kʋlʋkʋlʋ. Woŋo kʋlʋ nan na jɩgɩ kuri tɩn mʋ yɩ sɩ n na ŋwɩ-dʋŋa Wɛ tee nɩ. 16Kʋ nan na yɩ balʋ na sɛ kwiə yam kʋntʋ tɩn, Wɛ w'ʋ pa-ba wʋ-zuru yɩ DƖ duri ba ŋwaŋa lanyɩranɩ, kʋ wəli dɩ balʋ maama na yɩ DƖ tɩtɩ nɔɔna cɩga cɩga tɩn. 17A daa ba lagɩ sɩ nɔɔn-nɔɔnʋ joori o yaarɩ-nɩ, bɛŋwaanɩ amʋ na maŋɩ a jɩgɩ ŋwandaala yalʋ a yɩra nɩ tɩn brɩ nɩ Zezi mʋ te-nɩ. 18A ko-biə-ba, d'ɩ Yuutu Zezi Krisi w'ʋ pa abam yu-yoŋo. Amina.

will be added

X\