Galatɩ 3

1Abam Galatɩ tiinə-ba, 'a kikiə nyɩ dɩ ba tulimi abam mʋ ba pa 'a swan daa tərə te. Ba dɛɛn tɔɔlɩ ba brɩ abam jaja kʋ na kɩ te yɩ Zezi Krisi tɩ tʋʋn-dagara kam baŋa nɩ tɩn. 2A nan lagɩ a bwe abam woŋo dɩdʋa yɩranɩ mʋ a nii. Abam dɛɛn na joŋi Wɛ Joro kʋm yɩ kʋ wʋ 'a wʋnɩ tɩn, kʋ yɩ 'a tɩtʋŋa na tɔgɩ cullu tɩm tɩn ŋwaanɩ mʋ na? Awo. Kʋ yɩ 'a na ni Wɛ kwər-ywəŋə kam yɩ 'a sɛ tɩn ŋwaanɩ mʋ. 3Bɛɛ mʋ yɩ 'a ba jɩgɩ swan kʋntʋ? Abam na puli 'a tɔgɩ Zezi dɩ Wɛ Joro kʋm dam tɩn, 'a laan lagɩ sɩ 'a pipiri 'a da-o dɩ 'a tɩtɩ dam mʋ 'a vu 'a guri na? 4Wəənu tɩlʋ maama na kɩ abam tɩtarɩ nɩ tɩn w'ʋ ji kafɛ mʋ na? Aye. Amʋ bʋŋɩ nɩ tɩ b'a ji kafɛ. 5Wɛ na pɛ abam DƖ Joro kʋm yɩ DƖ daarɩ DƖ kɩ wo-kɩnkagɩla abam tɩtarɩ nɩ tɩn, DƖ kɩ kʋntʋ abam tɩtʋŋa na tɔgɩ cullu tɩm tɩn ŋwaanɩ mʋ na? Aye. Kʋ yɩ 'a na ni Wɛ kwər-ywəŋə kam yɩ 'a kɩ 'a wʋ-dɩdʋa dɩ Zezi tɩn ŋwaanɩ mʋ. 6Kʋntʋ mʋ kʋ pʋpʋnɩ Wɛ tɔnɔ kʋm wʋnɩ kʋ wɩ: Abraham kɩ o wʋ-dɩdʋa dɩ Wɛ, yɩ Wɛ pa o na cɩga kʋ ŋwaanɩ. 7Kʋntʋ mʋ w'ʋ pa 'a lwarɩ nɩ Abraham dwi tiinə cɩga cɩga yɩ balʋ na kɩ ba wʋ-dɩdʋa dɩ Wɛ tɩn mʋ. 8Faŋa faŋa tɩn kʋ maŋɩ kʋ pʋpʋnɩ Wɛ tɔnɔ kʋm wʋnɩ kʋ wɩ: Wɛ w'ʋ pa dwi-gɛ tiinə dɩ na cɩga DƖ tee nɩ, dɩ ba na kɩ ba wʋ-dɩdʋa dɩ DƖ tɩn ŋwaanɩ. Mʋ kʋ kuri Wɛ dɛ yigə DƖ ta DƖ kwər-ywəŋə kam dɩ Abraham DƖ wɩ: "Amʋ w'ʋ ta nmʋ ŋwaanɩ mʋ a kɩ lʋgʋ baŋa dwi maama lanyɩranɩ." 9Kʋntʋ tɩn, balʋ maama dɩ na kɩ ba wʋ-dɩdʋa dɩ Wɛ nɩ Abraham dɛɛn na kɩ o wʋ-dɩdʋa dɩ DƖ te tɩn, Wɛ dɩ w'ʋ kɩ-ba lanyɩranɩ. 10Kʋ daarɩ balʋ na tɩɩgɩ cullu tɩm sɩ ba ma na cɩga Wɛ tee nɩ tɩn w'ʋ na cɔgɩm. Bɛŋwaanɩ kʋ pʋpʋnɩ Wɛ tɔnɔ kʋm wʋnɩ kʋ wɩ: "Wʋlʋ maama na wʋ tɔgɩ kʋlʋ maama na pʋpʋnɩ kʋ kɩ Wɛ cullu tɔnɔ kʋm wʋnɩ tɩn, Wɛ w'ʋ cɔgɩ kʋntʋ tu." 11D'ɩ nan ye lanyɩranɩ nɩ, nɔɔn-nɔɔnʋ b'a na cɩga Wɛ tee nɩ dɩ o na tɔgɩ cullu tɩm tɩn ŋwaanɩ. Kʋ nan pʋpʋnɩ kʋ wɩ: "Wʋlʋ na jɩgɩ cɩga Wɛ tee nɩ tɩn mʋ yɩ wʋlʋ na kɩ o wʋ-dɩdʋa dɩ DƖ tɩn, o'o na ŋwɩa cɩga cɩga." 12Nɔɔnʋ na tɔgɩ cullu tɩm kʋ daɩ nɩ o kɩ o wʋ-dɩdʋa dɩ Wɛ, nɩ kʋ na pʋpʋnɩ kʋ wɩ: "Wʋlʋ na kɩ Wɛ cullu tɩm na brɩ te tɩn w'ʋ na ŋwɩa kʋ ŋwaanɩ." 13Dɩbam nan na wʋ kɩ kʋlʋ maama Wɛ cullu tɩm na brɩ tɩn, d'ɩ maŋɩ sɩ d'ɩ na cɔgɩm mʋ. Zezi Krisi nan mʋ tɩgɩ tʋʋn-dagara kam baŋa nɩ o ma lɩ dɩbam cɔgɩm dɩm kʋntʋ wʋnɩ. Wɛ ma pa Zezi ləni dɩbam yuu nɩ o na cɔgɩm dɩlʋ dɩbam ya na maŋɩ sɩ d'ɩ na tɩn. Kʋ yɩ nɩ kʋ na pʋpʋnɩ kʋ wɩ: "Wʋlʋ maama ba na gʋ ba lə daa yuu nɩ tɩn, Wɛ mʋ cɔgɩ kʋntʋ tu." 14Zezi Krisi dɛɛn sɛ o tɩ kʋntʋ doŋ mʋ, sɩ kʋ wanɩ kʋ pa Wɛ kɩ dwi-gɛ tiinə dɩ lanyɩranɩ, nɩ DƖ dɛɛn na goni ni dɩ Abraham te tɩn. Kʋntʋ ŋwaanɩ dɩbam w'ʋ wanɩ d'ɩ joŋi Wɛ Joro kʋm, nɩ DƖ na goni ni sɩ DƖ pa dɩbam te tɩn, d'ɩ na kɩ d'ɩ wʋ-dɩdʋa dɩ DƖ tɩn ŋwaanɩ. 15A ko-biə-ba, a lagɩ a ma lʋgʋ baŋa woŋo mʋ a ma brɩ abam Wɛ cɩga kam na yɩ te tɩn. Nɔɔna bale na kɩ ni dɩdʋa ba go ni ba pa daanɩ woŋo baŋa nɩ, nɔɔn-nɔɔnʋ daa b'a wanɩ o cɔgɩ ba ni dɩm kʋntʋ, naa o kɩ woŋo kʋdoŋ o daa wəli da. 16Wɛ dɛɛn na goni ni dɩ Abraham tɩn, kʋ yɩ dɩ o naa kʋm dɩ mʋ. Kʋ na pʋpʋnɩ te tɩn, kʋ wʋ tagɩ nɩ 'o naarʋ'. Kʋ pʋpʋnɩ kʋ wɩ 'o naa' mʋ. Kʋ brɩ nɩ kʋ yɩ nɔɔnʋ dɩdʋa taanɩ mʋ, yɩ o naa kʋm kʋntʋ mʋ yɩ Zezi Krisi. 17Kʋlʋ amʋ na lagɩ a ta tɩn mʋ yɩ sɩ, Wɛ dɛɛn goni ni dɩ Abraham, yɩ kʋntʋ kwaga nɩ, bɩna biə yana dɩ fiintɔ (430) laan na kɛ tɩn, DƖ daa ma kwe DƖ cullu tɩm DƖ pa Zwifə bam. Wɛ cullu tɩm kʋntʋ nan b'a wanɩ tɩ cɔgɩ ni dɩlʋ DƖ ya na maŋɩ DƖ go dɩ Abraham tɩn. Tɩ b'a wanɩ tɩ pa DƖ ni-gonim dɩm ji kafɛ. 18Wɛ ya na pɛ nɔɔna DƖ pɛɛrɩ dɩm ba na tɔgɩ DƖ cullu tɩm tɩn ŋwaanɩ mʋ, DƖ ni-gonim dɩm ya daa ba jɩgɩ kuri. D'ɩ nan ye nɩ, Wɛ pɛ Abraham DƖ pɛɛrɩ dɩm DƖ na goni ni dɩd-o tɩn ŋwaanɩ mʋ. 19Kʋ nan na yɩ kʋntʋ, bɛŋwaanɩ mʋ yɩ Wɛ kwe DƖ cullu tɩm DƖ pa Zwifə bam? DƖ kwe-tɩ DƖ wəli DƖ ni-gonim dɩm nɩ, sɩ kʋ wanɩ kʋ pa d'ɩ lwarɩ kʋlʋ na yɩ lwarɩm tɩn mʋ. DƖ cullu tɩm dɛɛn maŋɩ sɩ tɩ taa wʋra, sɩ kʋ vu kʋ yi maŋa kam Abraham naa kʋm na w'ʋ ba lʋgʋ baŋa tɩn mʋ. Wʋntʋ mʋ yɩ wʋlʋ Wɛ na goni DƖ ni dɩm o ŋwaanɩ tɩn. Wɛ dɛɛn tɔgɩ DƖ malɛsɩ sɩm jɩŋa mʋ DƖ kwe DƖ cullu tɩm DƖ pa DƖ nɔɔna bam, yɩ yiginu dɛɛn mʋ wʋ bantʋ dɩ Wɛ tɩtarɩ nɩ. 20Yiginu na wʋ nɔɔna bale tɩtarɩ nɩ, o ba wʋra nɔɔnʋ dɩdʋa ŋwaanɩ, Wɛ nan yɩ dɩdʋa mʋ. DƖ na goni DƖ ni dɩ Abraham tɩn, DƖ yɔɔrɩ DƖ ŋɔɔnɩ dɩ Abraham tɩtɩ mʋ. 21Kʋntʋ maama nan brɩ nɩ Wɛ cullu tɩm warɩ tɩ maŋɩ dɩ DƖ ni-gonim dɩm mʋ na? Awo, kʋ daɩ kʋntʋ. Cullu tərə tɩ na w'ʋ wanɩ tɩ pa nɔɔna na ŋwɩa Wɛ tee nɩ. Cullu tɩntʋ doŋ ya na wʋra, tɩ ya w'ʋ wanɩ tɩ pa nɔɔna na cɩga Wɛ tee nɩ. 22Wɛ tɔnɔ kʋm nan brɩ dɩbam nɩ nabiinə maama wʋ lwarɩm dam kuri nɩ mʋ. Kʋntʋ, kʋ yɩ balʋ na kɩ ba wʋ-dɩdʋa dɩ Zezi Krisi tɩn yɩranɩ mʋ w'ʋ joŋi pɛɛrɩ dɩlʋ Wɛ na goni ni sɩ DƖ pa balʋ na jɩgɩ wʋ-dɩdʋa dɩ DƖ tɩn. 23Kʋ daarɩ, kʋ na w'ʋ loori sɩ Zezi ba sɩ d'ɩ kɩ d'ɩ wʋ-dɩdʋa dɩd-o tɩn, dɩbam dɛɛn nyɩ nɩ d'ɩ wʋ pɩɩna digə nɩ mʋ te, cullu tɩm na cəŋi dɩbam tɩn ŋwaanɩ, yɩ kʋ vu kʋ yi maŋa kalʋ Wɛ na vɩɩrɩ dɩbam d'ɩ na kɩ d'ɩ wʋ-dɩdʋa dɩ DƖ te tɩn. 24Kʋntʋ mʋ cullu tɩm dɛɛn jɩgɩ dɩbam tɩ kweə, sɩ kʋ vu kʋ yi maŋa kam d'ɩ na lwarɩ Zezi Krisi tɩn, sɩ d'ɩ laan na cɩga Wɛ tee nɩ d'ɩ na kɩ d'ɩ wʋ-dɩdʋa dɩd-o tɩn ŋwaanɩ. 25Dɩbam laan nan na kɩ d'ɩ wʋ-dɩdʋa dɩ Zezi tɩn, woŋo daa tərə kʋ na w'ʋ ta te dɩbam. 26Abam na ŋwɩ dɩ Zezi Krisi tɩn, 'a maama yɩ Wɛ biə mʋ 'a na kɩ 'a wʋ-dɩdʋa dɩ DƖ tɩn ŋwaanɩ. 27Abam wʋlʋ maama ba na miis-o na wʋnɩ tɩn laan ŋwɩ dɩ Zezi Krisi mʋ, yɩ o nyɩ dɩ Zezi tɩtɩ mʋ te. 28Kʋntʋ tɩn, kampwara daa təri Zwifu dɩ dwi-gɛ tu laŋa nɩ. Kampwara nan ta təri gambaa dɩ wʋlʋ na te o tɩtɩ tɩn laŋa nɩ. Kampwara nan təri baarʋ dɩ kaanɩ laŋa nɩ dɩ. Abam na ŋwɩ dɩ Zezi Krisi tɩn, 'a maama yɩ woŋo dɩdʋa mʋ. 29Abam na yɩ Zezi Krisi nɔɔna tɩn, kʋ pɛ 'a tɔgɩ 'a yɩ Abraham naarʋ mʋ, yɩ 'a w'ʋ joŋi pɛɛrɩ dɩlʋ Wɛ na goni ni sɩ DƖ pa Abraham naarʋ tɩm tɩn.

will be added

X\