Tɩtʋŋa Tɔnɔ 22

1O ma ta o wɩ: "A kwə-ba dɩ a ko-biə-ba, 'a fɔgɩ 'a cəgi sɩ a tʋlɩ kʋ na yɩ te tɩn a brɩ abam." 2Zwifə bam na lwarɩ nɩ o ŋɔɔnɩ ba tɩtɩ dwi taanɩ mʋ tɩn, ba ma fɔgɩ ba cəgi sɔɔ. 3O laan ma ta dɩ ba o wɩ: "Amʋ yɩ Zwifu mʋ. Ba lʋgɩ-nɩ Silisi tɩʋ Tarɩsɩ nɩ mʋ. Kʋ nan yɩ Zeruzalɛm yo mʋ a kɩ nɔɔnʋ. Gamalɩyɛlɩ mʋ brɩ amʋ dɩbam nabaara cullu tɩm na yɩ te tɩn cɩga cɩga. A dɛɛn cɛ lanyɩranɩ a kwe a tɩtɩ a pa Wɛ nɩnɛɛnɩ abam zɩm dɩ na kɩ te tɩn mʋ. 4A dɛɛn yaarɩ balʋ na sɛ ba tɔgɩ Zezi cwəŋə kam tɩn, yɩ a daarɩ a pa ba gʋ badaara. A maa yəni a jaanɩ baara dɩ kaana a kɩ pɩɩna digə nɩ. 5Dɩbam kaanɩm yuutu wʋm dɩdaanɩ d'ɩ nakwa kɔgɔ kʋm maama w'ʋ wanɩ ba ta nɩ kʋ yɩ cɩga. Maŋa kadoŋ nɩ a ve bantʋ te mʋ a joŋi twaanʋ tɩlʋ a na w'ʋ kwe a brɩ Zwifə balʋ na wʋ Damasɩ nɩ tɩn, sɩ ba pa-nɩ cwəŋə sɩ a ja balʋ na tɔgɩ Zezi cwəŋə kam tɩn, a vɔ-ba a ja a ba Zeruzalɛm sɩ ba na cam. 6A na maa ve yɩ a daarɩ fɩɩn sɩ a yi Damasɩ tɩn, kʋ na maŋɩ dɩ wɩa tɩtarɩ nɩ tɩn, mʋ pooni dɛ dɩ nuŋi wɛyuu nɩ dɩ ba dɩ pɩpɩlɩ dɩ kaagɩ-nɩ. 7A ma tʋ tɩga nɩ, yɩ a ni kwərə na bəŋi-nɩ ka wɩ: 'Sooli, Sooli! Bɛŋwaanɩ mʋ yɩ n jɩgɩ amʋ n bɛɛsɩ kʋntʋ?' 8A ma bwe a wɩ: 'A tu, nmʋ yɩ wɔɔ mʋ?' O ma ləri o wɩ: 'Amʋ yɩ Zezi mʋ, Nazarɛtɩ tu wʋlʋ nmʋ na jɩgɩ n bɛɛsɩ tɩn.' 9Nɔɔna balʋ na tɔgɩ dɩ amʋ tɩn ma na pooni dɩm, yɩ ba wʋ ni wʋlʋ kwərə na ŋɔɔnɩ dɩ amʋ tɩn. 10A laan ma bwe a wɩ: 'A tu, bɛɛ mʋ a nan w'ʋ kɩ?' D'ɩ Yuutu wʋm ma ləri-nɩ o wɩ: 'Zaŋɩ n vu n zʋ Damasɩ, sɩ d'aanɩ mʋ ba laan w'ʋ brɩ-m kʋlʋ maama Wɛ na pɛ ni sɩ n kɩ tɩn.' 11A ma zaŋɩ wɛɛnɩ, yɩ a yiə daa ba naɩ, pooni dɩm na tiini dɩ pɩpɩlɩ-ya tɩn ŋwaanɩ. Kʋntʋ, balʋ na tɔgɩ dɩ amʋ tɩn ma ja a jɩŋa ba vaŋɩ-nɩ ba ja zʋ Damasɩ tɩʋ kʋm wʋ. 12Nɔɔnʋ wʋdoŋ maa wʋra, o yɩrɩ mʋ Ananiya. O maa nɩgɩ Wɛ lanyɩranɩ, yɩ o tɔgɩ dɩbam Zwifə bam cullu tɩm. Zwifə balʋ maama na zʋʋrɩ Damasɩ nɩ tɩn maa tɛ o taanɩ ba wɩ, o yɩ nɔn-ŋʋm. 13O laan ma ba o zɩgɩ amʋ tee nɩ yɩ o wɩ: 'A ko-bu Sooli, joori n ta n naɩ!' O na tagɩ kʋntʋ tɩn, bɩdwɩ baŋa nɩ mʋ a yiə yam puri yɩ a na o yibiyə. 14O ma ta o wɩ: 'Dɩbam nabaara Baŋa-Wɛ mʋ lɩ nmʋ sɩ n lwarɩ DƖ wʋbʋŋa na lagɩ kʋlʋ tɩn, sɩ n daarɩ n na Wʋ-poŋo Tu wʋm sɩ n ni o na ŋɔɔnɩ dɩ o tɩtɩ kwərə. 15Bɛŋwaanɩ nmʋ w'ʋ ta n yɩ o maana tu sɩ n brɩ nɔɔna bam maama o cɩga kam, sɩ n ta n brɩ-ba nmʋ na nɛ kʋlʋ yɩ n daarɩ n ni te tɩn. 16Nmʋ nan wʋ maŋɩ sɩ n da n daanɩ. Zaŋɩ sɩ n loori Wɛ d'ɩ Yuutu wʋm yɩrɩ ŋwaanɩ, sɩ n daarɩ n pa ba miisi-m na wʋnɩ, sɩ Wɛ w'ʋ yagɩ n lwarɩm DƖ ma cɛ-m.' 17Kʋntʋ na kɛ tɩn, a laan ma joori a vu Zeruzalɛm. A ma vu Wɛ-di-kamunu kʋm wʋ a wʋra a warɩ Wɛ. A na wʋra tɩn, Wɛ ma pa a na wo-kɩnkagɩlɩ nɩ dɩndwɩa te. 18A ma na d'ɩ Yuutu wʋm yɩ o ŋɔɔnɩ dɩ amʋ o wɩ: 'Zaŋɩ n kɩ lɩla n duri n nuŋi Zeruzalɛm nɩ, bɛŋwaanɩ tɩʋ kʋm nɔɔna bam b'a sɛ kʋlʋ nmʋ na w'ʋ ta amʋ ŋwaanɩ tɩn.' 19A ma ləri a wɩ: 'A yuutu, nɔɔna bam ye lanyɩranɩ nɩ amʋ dɛɛn yəni a tʋlɩ Zwifə bam Wɛ-di sɩm, yɩ a jaanɩ nɔɔna balʋ na kɩ ba wʋ-dɩdʋa dɩ nmʋ tɩn a pa ba pɩ-ba, yɩ ba daarɩ ba magɩ-ba. 20Kʋ daarɩ maŋa kalʋ ba na gʋ Etiyɛnɩ wʋlʋ na yɩ nmʋ maana tu o brɩ nmʋ cɩga kam tɩn, a tɩtɩ wʋra yɩ a sɛ nɩ kʋ maŋɩ sɩ ba gʋ-o. Amʋ dɛɛn mʋ zɩgɩ a nii ba gwaarʋ tɩm ba na lɩ ba tiŋi sɩ ba daarɩ ba dʋl-o ba gʋ tɩn.' 21D'ɩ Yuutu wʋm laan ma ta dɩ amʋ o wɩ: 'Nan ve, sɩ amʋ w'ʋ tʋŋɩ-m yigə yigə sɩ n vu dwi-gɛ tiinə bam te.' " 22Pooli na ŋɔɔnɩ te maama tɩn, nɔɔna bam ya cɩm mʋ yɩ ba cəg-o. O nan na tagɩ dwi-gɛ tiinə bam taanɩ o wəli da tɩn, ba laan ma zaŋɩ ba kaasɩ dɩ kwər-dɛ ba wɩ: "Ti-na o mʋmwɛ! Kʋ wʋ maŋɩ sɩ o taa ŋwɩ!" 23Ba maa nanɩ baarɩ yɩ ba vuvugə ba gwaarʋ wɛɛnɩ, yɩ ba mɔɔnɩ fogo ba caara. 24Pamaŋna bam dɩdɛɛrʋ wʋm na nɛ kʋlʋ na kɩ tɩn, o ma pa o nɔɔna bam ni sɩ ba ja Pooli ba zʋ ba pɩɩna digə kam. O ma ta dɩ ba sɩ ba mag-o dɩ balaara, sɩ o ta o pa ba lwarɩ o na kɩ kʋlʋ yɩ Zwifə bam nanɩ baarɩ o baŋa nɩ tɩn. 25Ba na vɔg-o ba ti sɩ ba daarɩ ba mag-o tɩn, Pooli ma ta dɩ pamaŋna bam yigə tu wʋlʋ na zɩgɩ da tɩn o wɩ: "Abam jɩgɩ cwəŋə sɩ 'a ja Rom tɩʋ jɩŋa nɔɔnʋ 'a magɩ, yɩ ba ta wʋ bwe-o ba nii o na cɔgɩ kʋlʋ tɩn na?" 26Pamaŋna yigə tu wʋm na ni kʋntʋ tɩn, o ma vu o ta dɩ o dɩdɛɛrʋ wʋm o wɩ: "Nmʋ nan lagɩ n kɩ ta mʋ? Nɔɔnʋ wʋm yɩ Rom tɩʋ jɩŋa nɔɔnʋ mʋ." 27Dɩdɛɛrʋ wʋm ma vu Pooli te o bwe-o o wɩ: "Nmʋ yɩ Rom tɩʋ kʋm jɩŋa nɔɔnʋ mʋ na? Sɩ n ta n brɩ-nɩ." Pooli ma ləri o wɩ: "Ɛɛn, a yɩ Rom tɩʋ kʋm jɩŋa nɔɔnʋ mʋ." 28Dɩdɛɛrʋ wʋm ma ta o wɩ: "Amʋ ŋwɩ səbu-fɔrɔ mʋ yɩ a daarɩ a ji Rom tɩʋ kʋm jɩŋa nɔɔnʋ." Pooli ma lər-o o wɩ: "A nan maŋɩ a yɩ Rom tɩʋ kʋm jɩŋa nɔɔnʋ a lʋra maŋa nɩ mʋ." 29Nɔɔna balʋ ya na zɩgɩ sɩ ba mag-o sɩ o ŋɔɔnɩ tɩn na ni kʋntʋ tɩn, ba ma kwe o yɩra ba yagɩ lɩla. Dɩdɛɛrʋ wʋm dɩ na lwarɩ nɩ Pooli yɩ Rom tɩʋ kʋm jɩŋa nɔɔnʋ tɩn, fʋʋnɩ ma ja-o dɩ o na pɛ ba vɔ-o dɩ capʋnnʋ tɩn. 30Dɩdɛɛrʋ wʋm dɛɛn maa lagɩ sɩ o lwarɩ kʋlʋ na kɩ yɩ Zwifə bam saŋɩ Pooli tɩn. Tɩga na pʋʋrɩ tɩn, o ma pa ba bwəli Pooli ba yagɩ. O ma daarɩ o pa ni sɩ Zwifə bam kaanɩm yigə tiinə bam dɩ ba sarɩya-dirə nakwa bam maama jeeri daanɩ. O laan ma ja Pooli o vu o pa o zɩgɩ ba yigə nɩ.

will be added

X\