1 Ba dɛɛn ma da Afipolisi dɩ Apoloni ba kɛ ba vu ba yi Tesaloniki. Tɩʋ kʋm kʋntʋ nɩ mʋ Zwifə bam Wɛ-digə wʋra. 2 Pooli ma vu da, nɩ o na maŋɩ o yəni o kɩ te tɩn. O dɛɛn kɩ siun da yatɔ mʋ dɩ ba. O maa karɩmɩ Wɛ tɔnɔ kʋm, yɩ o brɩ-ba kʋ kuri sɩ ba ni. 3 O ma maŋɩ o brɩ-ba o wɩ, kʋ dɛɛn ya maŋɩ sɩ Krisi wʋm Wɛ na tʋŋɩ tɩn yaarɩ mʋ o tɩ, sɩ o joori o bi o yagɩ tʋʋnɩ. O ma ta dɩ ba o wɩ: "Zezi wʋlʋ a na jɩgɩ o taanɩ a tɛa a brɩ abam tɩn mʋ sɩɩnɩ o yɩ Krisi wʋm Wɛ na tʋŋɩ tɩn." 4 Zwifə bam na ni kʋntʋ tɩn, ba badonnə ma sɛ o na tagɩ kʋlʋ tɩn, yɩ ba laan tɔgɩ ba wəli Pooli dɩ Silasɩ nɩ. Grɛkɩ tiinə balʋ na nɩgɩ Wɛ tɩn kɔgɔ zanzan dɩ ma sɛ Pooli taanɩ dɩm, dɩdaanɩ kaana zanzan balʋ jɩa na garɩ tɩn. 5 Zwifə badaara maa jɩgɩ wʋ-gʋrʋ dɩ ba. Ba ma vu yaga ba la zwabani-nyɩna ba pa ba tɔgɩ daanɩ, yɩ ba kɔgɔ kʋm ma pa tɩʋ kʋm maama vugimi dɩ sɔɔ bɔgɩ bɔgɩ. Ba ma vu ba ciŋi jara Zazɔn sɔŋɔ nɩ, yɩ ba kwaanɩ ba lagɩ Pooli dɩ Silasɩ jəgə, sɩ ba ja-ba ba ja nuŋi ba kɩ nɔɔna bam jɩŋa nɩ. 6 Ba ma wʋ nɛ-ba. Ba ma ja Zazɔn dɩ Zezi karabiə badonnə ba ja vu tɩʋ kʋm dɩdɛɛra bam te, yɩ ba tɔɔlɩ ba wɩ: "Nɔɔna bantʋ mʋ yəni ba beeri lʋgʋ baŋa je maama ba vugimi nɔɔna wʋbʋŋa. Bantʋ nan mʋ tu yo. 7 Zazɔn mʋ pɛ ba zʋʋrɩ o sɔŋɔ nɩ. Bantʋ maama mʋ vɩn d'ɩ pa-farʋ wʋm cullu tɩm, yɩ ba tɛ ba wɩ, pɛ wʋdoŋ mʋ wʋra, o yɩrɩ mʋ Zezi." 8 Tɩʋ kʋm dɩdɛɛra bam dɩ kɔgɔ kʋm maama na ni kʋntʋ tɩn, ba bana ma zaŋɩ zanzan dɩ ba. 9 Dɩdɛɛra bam ma pa Zazɔn dɩ o donnə bam tiŋi səbu kʋlʋ na w'ʋ pa-ba cwəŋə sɩ ba vrɩ ba tɩtɩ tɩn. Ba laan ma yagɩ-ba ba pa ba viiri. 10 Tɩga na tu ka yi tɩn, Zezi karabiə bam ma pa Pooli dɩ Silasɩ nuŋi tɩʋ kʋm nɩ ba vu Beere. Ba na ve ba yi da tɩn, ba ma vu ba zʋ Zwifə bam Wɛ-digə kam wʋ. 11 Tɩʋ kʋm kʋntʋ Zwifə bam maa jɩgɩ wʋbʋŋ-ŋʋna ba dwe Tesaloniki nɔɔna bam. Ba ma cəgi Wɛ kwərə kam lanyɩranɩ dɩ ba wʋ maama. Dɛ maama wʋnɩ ba yəni ba karɩmɩ Wɛ tɔnɔ kʋm sɩ ba nii, Pooli na brɩ kʋlʋ tɩn sɩɩnɩ kʋ yɩ cɩga na. 12 Ba zanzan ma sɛ Pooli taanɩ dɩm, Grɛkɩ tiinə zanzan dɩ maa sɛ, baara dɩ kaana balʋ jɩa na garɩ tɩn zanzan dɩ maa sɛ. 13 Tesaloniki Zwifə bam ma ni nɩ Pooli wʋ Beere nɩ o tɔɔlɩ Wɛ kwərə kam. Ba ma zaŋɩ ba vu Beere ba la kɔgɔ ba pa tɩʋ kʋm nɔɔna bam bana zaŋɩ dɩ Pooli. 14 Zezi karabiə bam na nɛ kʋntʋ tɩn, ba ma pa Pooli zaŋɩ lɩla o nuŋi o vu nɩnɩʋ kʋm ni. Kʋ ma daarɩ Silasɩ dɩ Timoti mʋ maŋɩ Beere nɩ. 15 Nɔɔna balʋ na kogili Pooli tɩn ma da dɩd-o ba vu ba yi Atɛɛnɩ. Ba na maa joori tɩn, Pooli ma pa-ba ni sɩ ba vu ba ta Silasɩ dɩ Timoti nɩ ba zaŋɩ ba tɔgɩ o kwaga ba ba lɩla. 16 Pooli dɛɛn na wʋ Atɛɛnɩ nɩ o cəgi Silasɩ dɩ Timoti sɩ ba ba tɩn, o wʋ ma tiini kʋ cɔgɩ dɩ o na nɛ nɩ jwənə zanzan su tɩʋ kʋm tɩn. 17 O maa yəni o zʋ Zwifə bam Wɛ-digə kam wʋ o ŋɔɔnɩ dɩ ba dɩdaanɩ dwi-gɛ tiinə balʋ na nɩgɩ Wɛ tɩn. Dɛ maama o maa yəni o ve yaga ni o ŋɔɔnɩ dɩ balʋ na wʋra tɩn. 18 Yi-pʋrʋ tiinə badonnə dɩ ma ba ba maŋɩ dɩd-o. Ba badaara dɛɛn tɔgɩ Epikuri zaasɩm dɩm mʋ, babam dɩ maa tɔgɩ Sitoyisi zaasɩm dɩm. Ba badaara ma ta ba wɩ: "Ŋwaŋ-fara tu wʋntʋ bʋŋɩ sɩ o brɩ bɛɛ mʋ?" Badonnə dɩ ma ta ba wɩ: "Kʋ nyɩ dɩ o ŋɔɔnɩ dwi-gɛ tiinə jwənə taanɩ mʋ te." Ba tagɩ kʋntʋ, bɛŋwaanɩ o tɔɔlɩ Zezi kwər-ywəŋə kam dɩ twa biim taanɩ mʋ. 19 Ba laan ma ja-o ba vu Arɩpaazɩ, (mɛ ba yigə tiinə bam na jeeri da tɩn). Ba ma ta-o ba wɩ: "Dɩbam ya lagɩ sɩ d'ɩ lwarɩ zaasɩm-dʋʋrɩ dɩm nmʋ na jɩgɩ n zaasɩ tɩn kuri mʋ. 20 Wəənu tɩlʋ nmʋ na brɩ tɩn, d'ɩ ta wʋ fɔgɩ d'ɩ ni tɩ dwi. Kʋntʋ mʋ d'ɩ lagɩ sɩ d'ɩ lwarɩ tɩ kuri na yɩ te tɩn." 21 Atɛɛnɩ tiinə bam maama dɩdaanɩ vərə balʋ na zʋʋrɩ ba tee nɩ tɩn dɛɛn tiini ba lagɩ sɩ ba taa larɩ daanɩ mʋ maŋa maama, sɩ ba taa cəgi wəənu tɩlʋ na yɩ wo-dʋnnʋ tɩn. 22 Pooli ma zaŋɩ o zɩgɩ Arɩpaazɩ yigə tiinə bam tɩtarɩ nɩ o wɩ: "Atɛɛnɩ tiinə-ba, amʋ na nii tɩn, abam ŋwɩa kam maama wʋnɩ 'a tiini 'a zuli jwənə mʋ zanzan. 23 A na beeri abam tɩʋ kʋm wʋnɩ tɩn, a nɛ je sɩm maama 'a na zuli 'a jwənə da tɩn. A na beeri tɩn mʋ a nɛ kaanɩm bimbim dɩdʋa, yɩ kʋ pʋpʋnɩ dɩ yɩra nɩ kʋ wɩ: 'Wɛ dɩlʋ d'ɩ na yəri tɩn'. Kʋntʋ, Wɛ dɩlʋ abam na jɩgɩ 'a zuli yɩ 'a ta yəri-DƖ tɩn kwərə mʋ a lagɩ a tɔɔlɩ a brɩ abam. 24 Dɩntʋ mʋ yɩ Wɛ dɩlʋ na kɩ lʋgʋ baŋa dɩ wəənu tɩlʋ maama na wʋ kʋ wʋnɩ tɩn. DƖ maa te wɛyuu dɩ tɩga baŋa maama, yɩ DƖ ba zʋʋrɩ di sɩlʋ nabiinə na lɔgɩ ba pa-DƖ tɩn wʋnɩ. 25 Wɛ nan wʋ gɛ kʋlʋkʋlʋ sɩ nabiinə taa tʋŋa ba pa-DƖ, kʋ na yɩ dɩntʋ tɩtɩ mʋ kwe ŋwɩa dɩ siun dɩ woŋo maama DƖ pa nabiinə tɩn ŋwaanɩ. 26 Wɛ nan kɩ nabiinu dɩdʋa mʋ, yɩ DƖ laan pa nabiinə dwi maama zɩgɩ wʋntʋ yɩra nɩ. DƖ ma pa ba jagɩ ba zʋʋrɩ lʋgʋ baŋa maama wʋnɩ. Kʋntʋ tɩn, dɩntʋ mʋ maŋɩ DƖ lɩ wʋbʋŋa yɩ DƖ lɩ mɩmaŋa kalʋ dɩ je sɩlʋ dwi maama na w'ʋ ta zʋʋrɩ da tɩn. 27 Wɛ na kɩ nabiinə kʋntʋ tɩn, kʋ yɩ sɩ ba taa lagɩ-DƖ mʋ. Ba maŋɩ sɩ ba beeri-DƖ mʋ ba na DƖ jəgə, sɩ ba ma wanɩ ba lwarɩ-DƖ. Wɛ nan maŋɩ DƖ daɩ yigə yigə dɩdaanɩ dɩbam maama. 28 Kʋ nyɩ nɩ nɔɔnʋ wʋdoŋ na tagɩ o wɩ: 'Dɩntʋ ŋwaanɩ mʋ d'ɩ ŋwɩ, d'ɩ wʋra yɩ d'ɩ veə.' Abam tɩtɩ ləŋ-leenu dɩdʋa dɩ tagɩ kʋntʋ doŋ o wɩ: 'Dɩbam dɩ maŋɩ d'ɩ yɩ DƖ dwi tiinə mʋ.' 29 Dɩbam na sɩɩnɩ d'ɩ yɩ Wɛ dwi tiinə tɩn, d'ɩ wʋ maŋɩ sɩ d'ɩ bʋŋɩ nɩ Wɛ w'ʋ ta nyɩ dɩ kamɔgɔ kʋlʋ nabiinu na mɛ səbu-sɩŋa naa luguru naa kandwa o ma o kɩ dɩ o tɩtɩ wʋbʋŋa tɩn. 30 Faŋa faŋa yɩ nabiinə ta yəri kʋlʋ na lana sɩ ba taa kɩ tɩn, Wɛ wʋ kwe-kʋ DƖ kɩ DƖ wʋbʋŋa nɩ. Kʋ daarɩ lele kʋntʋ, DƖ laan pɛ ni nɩ nɔɔna maama lʋgʋ baŋa nɩ maŋɩ sɩ ba ləni ba wʋrʋ ba yagɩ wo-balwaarʋ kəm. 31 Bɛŋwaanɩ DƖ lɩ dɛ mʋ sɩ DƖ ma DƖ di nabiinə maama taanɩ. DƖ nan w'ʋ tɔgɩ cɩga mʋ DƖ ma di ba taanɩ dɩm. DƖ nan maŋɩ DƖ kuri wʋlʋ DƖ na w'ʋ tɔgɩ o ŋwaanɩ DƖ ma di ba taanɩ tɩn. DƖ pɛ nɔɔnʋ wʋm kʋntʋ mʋ bi o yagɩ tʋʋnɩ, sɩ kʋ pa nɔɔna maama lwarɩ nɩ kʋ sɩɩnɩ kʋ yɩ cɩga mʋ." 32 Pooli na ŋɔɔnɩ twa biim taanɩ kʋntʋ tɩn, nɔɔna bam badonnə maa jɩg-o ba mwana. Kʋ daarɩ badaara maa tɛ ba wɩ: "D'ɩ lagɩ sɩ n joori n ŋɔɔnɩ taanɩ dɩm kʋntʋ doŋ mʋ sɩ d'ɩ cəgi dɛ dɩdoŋ nɩ." 33 Pooli laan ma zaŋɩ o nuŋi ba tee nɩ. 34 Nɔɔna badonnə dɛɛn ma sɛ ba tɔgɩ Pooli, yɩ ba kɩ ba wʋ-dɩdʋa dɩ Zezi. Ba dɩdʋa yɩrɩ mʋ Denisi. O tɔgɩ o wʋ Arɩpaazɩ kɔgɔ kʋm wʋnɩ mʋ. Kaanɩ wʋdoŋ dɩ wʋra, o yɩrɩ mʋ Damarisi. Nɔɔna badonnə dɩ tɔgɩ ba wəli da ba na sɛ Zezi.
