Tɩtʋŋa Tɔnɔ 13

1Zezi kɔgɔ kʋlʋ na wʋ Antɩɔsɩ nɩ tɩn dɛɛn jɩgɩ Wɛ nijoŋnə dɩ balʋ na brɩ Wɛ taanɩ dɩm tɩn ba tɩtarɩ nɩ. Bantʋ mʋ yɩ Banabasɩ, dɩ Simeyon wʋlʋ ba na bə nɩ nazono tɩn, dɩ Sirɛɛnɩ tu Lukiyusi, dɩ Manayɛn wʋlʋ dɛɛn na yɩ gʋvɩrma tu Erɔdɩ yuu-doŋo ba biini nɩ tɩn, dɩdaanɩ Sooli. 2Dɛ dɩdwɩ ba maa wʋra ba zuli Baŋa-Wɛ, yɩ ba ta kwəri ba vɔ ni. Wɛ Joro kʋm laan ma ta kʋ brɩ-ba kʋ wɩ: "Lɩ-na Banabasɩ dɩ Sooli amʋ ŋwaanɩ, sɩ ba taa tʋŋɩ tɩtʋŋɩ dɩlʋ amʋ na kuri-ba sɩ ba tʋŋɩ tɩn." 3Zezi karabiə bam na ni kʋntʋ tɩn, ba daa ma vɔ ni yɩ ba loori Wɛ ba pa-ba. Ba ma daarɩ ba daŋɩ ba jɩa ba baŋa nɩ, yɩ ba laan banɩ-ba yɩ ba viiri. 4Wɛ Joro kʋm dɛɛn na tʋŋɩ Banabasɩ dɩ Sooli kʋntʋ tɩn, ba ma vu ba yi Seliusi. Ba ma zʋ naboro ba tɔgɩ nɩnɩʋ kʋm wʋ ba vu ba bɛ ba yi Sipri. 5Ba ma vu ba zʋ Sipri tɩʋ kʋdoŋ, kʋ yɩrɩ mʋ Salamini. Ba na yi da tɩn, ba maa zʋʋrɩ Zwifə bam Wɛ-di sɩm ba tɔɔlɩ Wɛ kwərə. Zan Marɩkɩ maa wʋ ba tee nɩ o wəli-ba. 6Ba ma zaŋɩ Salamini nɩ ba tʋlɩ je sɩm maama ba kɛ. Ba ma vu ba yi Pafɔsɩ. Ba ma jeeri liri tu wʋdoŋ d'aanɩ, o yɩrɩ mʋ Bar-Zezi, yɩ o yɩ Zwifu. O dɛɛn paɩ o yɩ Wɛ nijoŋnu mʋ yɩ o daɩ. 7O maa yɩ gʋvɩrma tu Sɛrɩziu Polusi kwaga nɔɔnʋ mʋ. Gʋvɩrma tu wʋm maa jɩgɩ swan lanyɩranɩ. O ma bəŋi Banabasɩ dɩ Sooli o pa ba ba o te. O maa lagɩ sɩ o ni Wɛ kwərə kam. 8Liri tu wʋm ma zaŋɩ o wʋra o culi ba brɩm dɩm. O maa kwaanɩ sɩ o cɩ gʋvɩrma tu wʋm sɩ o yɩ sɛ Wɛ cɩga kam. Liri tu wʋm yɩrɩ dɩdoŋ mʋ yɩ Elimasɩ dɩ Grɛkɩ tiinə taanɩ. 9Sooli wʋlʋ yɩrɩ dɩdoŋ ta na yɩ Pooli tɩn dɛɛn jɩgɩ Wɛ Joro kʋm dam lanyɩranɩ. O ma nii liri tu wʋm vɩrr, yɩ o wɩ: 10"N wʋ su dɩ sɩsɩɩna mʋ dɩdaanɩ balɔrɔ. Nmʋ yɩ sʋtaanɩ jɩŋa nɔɔnʋ mʋ. Nmʋ culi wəənu tɩlʋ maama na lana tɩn. Nmʋ tiini n kwaana sɩ n pipiri d'ɩ Yuutu wʋm cɩga kam sɩ ka ji vwan mʋ. 11Nii, Baŋa-Wɛ w'ʋ ba DƖ magɩ-m dɩ DƖ jɩ-dɩa lele kʋntʋ. N'n ji lilwe yɩ n daa n b'a na wɩa pooni, sɩ kʋ taa ve maŋa kalʋ Wɛ na lagɩ tɩn." O na tagɩ kʋntʋ tɩn, bɩdwɩ baŋa nɩ mʋ Elimasɩ yiə dwe, yɩ o zɩgɩ lim wʋnɩ. O maa ve o kɩkara, yɩ o lagɩ vaŋɩnʋ sɩ o ja o jɩŋa. 12Gʋvɩrma tu wʋm na nɛ kʋlʋ na kɩ tɩn, o laan ma kɩ o wʋ-dɩdʋa dɩ Zezi Krisi. D'ɩ Yuutu cɩga kam ba na brɩ-o tɩn ma sʋ-o. 13Pooli dɩ o badonnə bam laan ma zaŋɩ Pafɔsɩ nɩ ba zʋ naboro ba vu ba yi Pamfili tɩʋ kʋdoŋ, kʋ yɩrɩ mʋ Pɛrɩzɩ. Zan Marɩkɩ ma yagɩ-ba d'aanɩ, yɩ o daarɩ o joori Zeruzalɛm. 14Ba daa maa zɩgɩ Pɛrɩzɩ nɩ ba vu Antɩɔsɩ kʋlʋ na wʋ Pisidi nɩ tɩn. Zwifə bam siun dɛ dɩm na yi tɩn, ba ma vu ba zʋ ba Wɛ-digə kam wʋ ba je da. 15Nɔɔna ma zaŋɩ ba karɩmɩ Moyisi cullu twaanʋ tɩm dɩ faŋa faŋa Wɛ nijoŋnə bam twaanʋ tɩm wʋnɩ. Ba na karɩmɩ ba ti tɩn, ba yigə tiinə bam ma tʋŋɩ ni ba pa Pooli-ba, yɩ ba wɩ: "D'ɩ ko-biə-ba, abam na jɩgɩ kwiə yalʋ na w'ʋ zəni nɔɔna bam tɩn, sɩ 'a zaŋɩ 'a ta." 16Pooli ma zaŋɩ wɛɛnɩ o zəŋi o jɩŋa, yɩ o laan daarɩ o ta o wɩ: "Yisɩrayɛlɩ dwi tiinə-ba dɩdaanɩ dwi-gɛ tiinə balʋ na kwarɩ Wɛ tɩn, cəgi-na a na lagɩ a ta kʋlʋ tɩn. 17Wɛ dɩlʋ dɩbam Yisɩrayɛlɩ tiinə bam na tɔgɩ tɩn dɛɛn mʋ kuri d'ɩ nabaara bam, sɩ ba taa yɩ DƖ tɩtɩ nɔɔna. Maŋa kam ba dɛɛn na yɩ vərə Ezipi nɩ tɩn mʋ Wɛ pɛ ba puli zanzan. DƖ ma daarɩ DƖ ma DƖ tɩtɩ jɩ-dɩa kam DƖ lɩ-ba DƖ pa ba nuŋi tɩʋ kʋm kʋntʋ nɩ. 18Ba na beeri kagʋa wʋnɩ taan bɩna fiinna tɩn, DƖ ma kɩ wʋ-zuru dɩdaanɩ ba. 19Ba na zʋ Kanaan tɩn, DƖ ma pa tɩʋ kʋm dwi dwi tiinə kuni bɩrpɛ cɔgɩ, yɩ DƖ daarɩ DƖ pa DƖ tɩtɩ nɔɔna Yisɩrayɛlɩ tiinə bam taa te tɩʋ kʋm kʋntʋ. 20Kʋntʋ kəm dɩm maama yɩ nɩnɛɛnɩ bɩna biə-yana dɩ fiinnu mʋ (450). Kʋntʋ kwaga nɩ, Wɛ laan ma kuri yigə tiinə DƖ pa-ba yɩ bantʋ te-ba taan, kʋ vu kʋ yi maŋa kam DƖ nijoŋnu Samʋwɛlɩ na tu o ba o te-ba tɩn. 21Nɔɔna bam laan ma loori Samʋwɛlɩ sɩ o tiŋi pɛ o pa-ba. Wɛ ma tiŋi Bɛnzamɛn dwi tu dɩdʋa DƖ pa-ba, o yɩrɩ mʋ Sayuli. O yɩ Kisi bu mʋ. O maa ji ba pɛ bɩna fiinna. 22Wɛ dɛɛn ma ba DƖ lɩ Sayuli paarɩ dɩm wʋnɩ, yɩ DƖ daarɩ DƖ pa Davidi ji ba pɛ. Wɛ dɛɛn tagɩ wʋntʋ taanɩ DƖ wɩ: 'Zese bu Davidi yɩ nɔɔnʋ wʋlʋ na su amʋ wʋ tɩn. Wʋntʋ w'ʋ kɩ kʋlʋ maama a wʋbʋŋa na lagɩ tɩn.' 23Kʋ nan yɩ wʋntʋ dwi dɩm wʋnɩ mʋ Wɛ pɛ Zezi ba. Wɛ ma tɔgɩ ni dɩlʋ DƖ na goni tɩn DƖ pa Zezi ji dɩbam Yisɩrayɛlɩ tiinə bam Vɩrnʋ. 24Maŋa kam Zezi ta na wʋ puli o tɩtʋŋa yam tɩn, Zan dɛɛn mʋ brɩ Yisɩrayɛlɩ tiinə bam maama o wɩ, ba ləni ba wʋrʋ ba yagɩ kəm-balwaarʋ, sɩ ba daarɩ ba pa ba miisi-ba na wʋnɩ Wɛ ŋwaanɩ. 25Kʋ na tu kʋ daarɩ fɩnfɩɩn sɩ Zan ti o tɩtʋŋa yam tɩn, o ma bwe nɔɔna bam o wɩ: 'Abam bʋŋɩ sɩ amʋ yɩ wɔɔ mʋ? Amʋ daɩ wʋlʋ wʋm 'a na tɩɩnɩ tɩn. Wʋntʋ nan lagɩ o saŋɩ a kwaga mʋ o ba, yɩ a wʋ maŋɩ sɩ a bwəli o nɛ natra dɩ.' 26A ko-biə-ba, Abraham dwi tiinə dɩ dwi-gɛ tiinə balʋ na kwarɩ Wɛ tɩn, kʋ yɩ dɩbam mʋ Wɛ pɛ sɩ d'ɩ ni DƖ taanɩ dɩm kʋntʋ, sɩ d'ɩ wanɩ d'ɩ lwarɩ DƖ na lagɩ DƖ vrɩ dɩbam DƖ yagɩ te tɩn. 27Zeruzalɛm tiinə bam dɩ ba yigə tiinə bam nan wʋ lwarɩ Zezi na yɩ wʋlʋ tɩn. Kʋ daa zɩ yɩ wəənu tɩlʋ Wɛ nijoŋnə bam na pʋpʋnɩ ba tiŋi yɩ nɔɔna yəni ba karɩmɩ-tɩ ba siun da yam maama nɩ tɩn, ba ba ni wəənu tɩntʋ kuri dɩ. Ba nan na pɛ Zezi na cam tɩn, kʋ pɛ Wɛ nijoŋnə bam na pʋpʋnɩ kʋlʋ tɩn sɩɩnɩ kʋ kɩ. 28Ba maa ba jɩgɩ taanɩ dɩlʋ na w'ʋ pa ba gʋ-o tɩn. Dɩ kʋntʋ dɩ, ba ta ma loori Pilatɩ sɩ o pa ba gʋ-o. 29Ba ma kɩ kʋlʋ maama na maŋɩ kʋ pʋpʋnɩ Wɛ tɔnɔ kʋm wʋnɩ yɩ kʋ ta o taanɩ tɩn ba ti. O na tɩgɩ tɩn, ba laan ma par-o tʋʋn-dagara kam baŋa nɩ ba ja vu ba kɩ yibeeli wʋnɩ. 30Wɛ laan ma pa o bi o yagɩ tʋʋnɩ. 31O maa wʋra da kɔgɔ kɔgɔ. O na wʋra tɩn, kuni zanzan mʋ o brɩ o tɩtɩ o karabiə bam yigə nɩ, balʋ ya na tɔgɩ dɩd-o Galile nɩ ba beeri ba ve Zeruzalɛm tɩn. Bantʋ laan mʋ yɩ o maana tiinə ba brɩ o cɩga kam ba pa dɩbam Yisɩrayɛlɩ tiinə bam. 32Dɩbam nan tu abam te mʋ sɩ d'ɩ tɔɔlɩ Wɛ kwər-ywəŋə kam d'ɩ brɩ abam. Kʋ nan yɩ nɩ, Wɛ dɛɛn na goni ni dɩ dɩbam nabaara bam nɩ DƖ w'ʋ kɩ kʋlʋ tɩn mʋ, 33DƖ laan sɩɩnɩ DƖ kɩ DƖ pa dɩbam balʋ na yɩ ba naarʋ tɩn. Mʋ kʋntʋ mʋ DƖ bi Zezi DƖ pa o yagɩ tʋʋnɩ. Kʋ yɩ nɩnɛɛnɩ kʋ na maŋɩ kʋ pʋpʋnɩ Wɛ ləŋ-ŋwɩ tɔnɔ pɔɔrɩm bɩle tu wʋnɩ te tɩn kʋ wɩ: 'Nmʋ mʋ yɩ amʋ Bu yɩ zɩm amʋ dɩ jigi nmʋ Ko.' 34Wɛ tɔnɔ kʋm daa ta brɩ Wɛ na w'ʋ bi-o DƖ pa o yagɩ tʋʋnɩ, sɩ o yɩra yɩ pɔ. Kʋ ma ta kʋ wɩ: 'A'a pa n na wo-laarʋ cɩga cɩga, nɩ a na maŋɩ a go ni sɩ a pa Davidi na-tɩ te tɩn.' 35Wɛ tɔnɔ kʋm jəgə kadoŋ nɩ Davidi pʋpʋnɩ o wɩ: 'Nmʋ Wɛ b'a sɛ sɩ n tɩtɩ Wʋ-poŋo Tu wʋm yɩra pɔ.' 36Kʋ nan na yɩ Davidi tɩtɩ, wʋntʋ dɛɛn tʋŋɩ Wɛ tɩtʋŋa yam maŋa kalʋ o na ŋwɩ tɩn, yɩ o laan ba o tɩ. Ba ma kwe-o ba kɩ o nabaara bam tee nɩ. O yɩra yam ma sɩɩnɩ ya pɔ. 37Kʋ daarɩ, wʋlʋ wʋm Wɛ na pɛ o bi o yagɩ tʋʋnɩ tɩn, wʋntʋ yɩra nan wʋ pɔgɩ. 38A ko-biə-ba, abam maŋɩ sɩ 'a lwarɩ nɩ kʋ yɩ Zezi ŋwaanɩ mʋ d'ɩ jɩgɩ cwəŋə sɩ d'ɩ brɩ abam nɩ Wɛ w'ʋ wanɩ DƖ yagɩ 'a lwarɩm DƖ ma cɛ abam. 39Wɛ cullu tɩlʋ DƖ na kɩ Moyisi jɩŋa nɩ tɩn warɩ tɩ pa 'a lwarɩm dɩm ti. Kʋ daarɩ wʋlʋ maama na kɩ o wʋ-dɩdʋa dɩ Zezi tɩn w'ʋ na vrɩm Wɛ tee nɩ, dɩ o lwarɩm dɩm maama na ti wʋntʋ ŋwaanɩ tɩn. 40Nan ta'a yɩrɩ-na 'a tɩtɩ, sɩ lɛɛrʋ tɩlʋ Wɛ nijoŋnə bam na pʋpʋnɩ tɩ taanɩ tɩn yɩ zaŋɩ tɩ yi abam. 41Ba dɛɛn tagɩ ba wɩ: 'Nii-na, abam balʋ na yəni 'a gooni amʋ Wɛ cɩga kam tɩn, abam yɩra w'ʋ sɔɔrɩ yɩ 'a tɩ. Bɛŋwaanɩ kʋ na yɩ kəm dɩlʋ a na lagɩ a kɩ abam da yam kʋntʋ nɩ tɩn, abam b'a sɛ nɩ dɩ yɩ cɩga, nɔɔnʋ na maŋɩ o brɩ abam tɩ kuri dɩ, 'a ta b'a sɛ.' " 42Pooli na tagɩ kʋntʋ o ti tɩn, o dɩ Banabasɩ ma zaŋɩ sɩ ba nuŋi Wɛ-digə kam wʋnɩ. Ba na lagɩ ba viiri tɩn, nɔɔna bam ma ta dɩ ba sɩ ba joori ba ba siun dɛ dɩdoŋ dɩm nɩ, sɩ ba daa ta ŋɔɔnɩ taanɩ dɩm kʋntʋ dɩ ba. 43Nɔɔna bam ma zaŋɩ ba jagɩ. Ba zanzan ma tɔgɩ Pooli dɩ Banabasɩ, Zwifə bam dɩ dwi-gɛ tiinə balʋ na nɩgɩ Wɛ yɩ ba tɔgɩ cullu tɩlʋ DƖ na pɛ dɩbam Zwifə bam tɩn dɩ maa tɔga. Pooli dɩ Banabasɩ maa ta dɩ nɔɔna bam sɩ ba ta kwaanɩ ba dalɩ Wɛ DƖ zaanɩ dɩlʋ DƖ na pɛ-ba tɩn ŋwaanɩ. 44Ba siun dɛ dɩm ma joori dɩ yi. Nɔɔna zanzan ma la daanɩ sɩ ba cəgi Baŋa-Wɛ kwərə kam, kʋ gɛ fɩɩn sɩ kʋ taa nyɩ dɩ tɩʋ kʋm nɔɔna maama mʋ lagɩ da te. 45Zwifə bam na nɛ kɔgɔ kʋm na su je sɩm maama tɩn, ba maa tiini ba jɩgɩ wʋ-gʋrʋ dɩ ba. Ba ma y'aalɩ Pooli na tɛ kʋlʋ tɩn, yɩ ba kwəri ba twɩ-o. 46Pooli dɩ Banabasɩ laan ma fɔgɩ ba ŋɔɔnɩ dɩ baarɩ, yɩ ba wɩ: "D'ɩ ya maŋɩ sɩ d'ɩ puli abam tee nɩ mʋ d'ɩ ŋɔɔnɩ Wɛ kwərə kam. Abam nan na maŋɩ 'a wʋ sɛ-ka tɩn, abam ba bʋŋɩ nɩ 'a maŋɩ dɩ Wɛ ŋwɩ-dʋŋa kam. Kʋntʋ ŋwaanɩ d'ɩ w'ʋ vu dwi-gɛ tiinə bam te d'ɩ daarɩ abam. 47D'ɩ Yuutu wʋm na pɛ dɩbam ni dɩlʋ tɩn mʋ tɩntʋ: 'Amʋ Wɛ tiŋi nmʋ sɩ n ja a pooni dɩm n vu n pa dwi-gɛ tiinə bam, sɩ n wanɩ n pa nabiinə na vrɩm lʋgʋ baŋa je maama nɩ.' " 48Dwi-gɛ tiinə balʋ na wʋra yɩ ba ni kʋntʋ tɩn, ba maa jɩgɩ wʋpolo, yɩ ba pa Baŋa-Wɛ kwərə kam jɩgɩ dam. Balʋ maama na maŋɩ sɩ ba na Wɛ ŋwɩ-dʋŋa kam tɩn mʋ sɩɩnɩ ba kɩ ba wʋ-dɩdʋa dɩ Zezi. 49Baŋa-Wɛ kwərə kam ma jagɩ je sɩm kʋntʋ maama wʋnɩ. 50Kʋ daarɩ Zwifə bam ma kwaanɩ ba pa kaana balʋ jɩŋa na jɩgɩ yɩ ba nɩgɩ Wɛ tɩn dɩ tɩʋ kʋm yigə tiinə bam bana zaŋɩ dɩ Pooli dɩ Banabasɩ. Ba dɛɛn ma pa ba yaarɩ Pooli dɩ Banabasɩ, yɩ ba daarɩ ba zəli-ba ba pa ba nuŋi ba tɩʋ kʋm wʋnɩ. 51Ba na kɩ-ba kʋntʋ tɩn, Pooli dɩ Banabasɩ ma pɩɩsɩ ba nɛ fogo kʋm ba yagɩ da, sɩ kʋ brɩ nɩ ba wʋ kɩ lanyɩranɩ. Ba laan ma daarɩ ba vu Yikon. 52Zezi karabiə bam dɛɛn tiini ba jɩgɩ wʋpolo, yɩ Wɛ Joro kʋm wʋ ba tee nɩ lanyɩranɩ.

will be added

X\