1 Amʋ wʋlʋ na yɩ Zezi kɔgɔ kʋm nakwɩ tɩn mʋ pʋpʋnɩ tɔnɔ kʋntʋ a pa a ciloŋ-sono Gayusi. Amʋ soe nmʋ cɩga cɩga. 2 A ciloŋ-sono, Wɛ w'ʋ kɩ-m lanyɩranɩ woŋo maama wʋnɩ. A loori Wɛ mʋ a pa nmʋ, sɩ n yɩra taa jɩgɩ yazurə, nɩ n bɩcarɩ na tɔgɩ Wɛ cwəŋə kam lanyɩranɩ te tɩn. 3 D'ɩ ko-biə badaara tu ba ta nmʋ taanɩ, yɩ kʋ pa a tiini a na wʋpolo dɩ a na lwarɩ nɩ n tɔgɩ cɩga cwəŋə kam lanyɩranɩ tɩn. A nan ye nɩ n sɩɩnɩ n tɔgɩ cɩga kam kʋntʋ mʋ. 4 Kʋlʋkʋlʋ tərə kʋ na w'ʋ wanɩ kʋ pa a ja wʋpolo kʋ dwəni a na lwarɩ nɩ a biə bam sɩɩnɩ ba tɔgɩ cɩga cwəŋə kam tɩn. 5 A ciloŋ-sono, nmʋ kɩ lanyɩranɩ dɩ n na yəni n zəni d'ɩ ko-biə bam te tɩn, dɩ kʋ na maŋɩ kʋ yɩ vərə dɩ. 6 D'ɩ ko-biə bam tagɩ Zezi kɔgɔ kʋm yigə nɩ nmʋ na kɩ-ba lanyɩranɩ te tɩn. Kʋ lana sɩ n ta n wəli-ba ba cwəŋə kam vəŋə wʋnɩ, sɩ kʋ maŋɩ dɩ Wɛ wʋbʋŋa na lagɩ te tɩn. 7 Bɛŋwaanɩ nɔɔna bam kʋntʋ nuŋi sɩ ba tɔɔlɩ Zezi Krisi kwər-ywəŋə kam mʋ. Ba nan ba joŋi kʋlʋkʋlʋ balʋ na ba tɔgɩ Zezi cɩga kam tɩn jɩŋa nɩ. 8 Kʋntʋ ŋwaanɩ kʋ maŋɩ sɩ dɩbam mʋ zəni nɔɔna bam kʋntʋ dwi sɩ ba wanɩ ba tʋŋɩ, sɩ kʋ brɩ nɩ dɩbam dɩ tɔgɩ d'ɩ tʋŋɩ Wɛ cɩga kam ŋwaanɩ. 9 Amʋ dɛɛn pʋpʋnɩ tɔnɔ a pa abam Zezi kɔgɔ kʋm. Diyotrɛfɩ wʋlʋ nan na lagɩ sɩ o taa yɩ 'a yigə tu tɩn ba lagɩ sɩ o joŋi kʋlʋ dɩbam na tɛ tɩn. 10 Kʋntʋ ŋwaanɩ, a na tu abam te, a'a ta wo-balwaarʋ tɩlʋ maama o na kɩ tɩn 'a maama yigə nɩ jaja. Wʋntʋ yəni o ŋɔɔnɩ ta-balwaarʋ mʋ o paɩ dɩbam. Kʋntʋ nan ta ba poli o wʋ. Kʋlʋ na wəli da tɩn, o yəni o ba sɛ sɩ o jeeri d'ɩ ko-biə bam lanyɩranɩ, yɩ o daarɩ o cəŋi balʋ na lagɩ sɩ ba jeeri-ba lanyɩranɩ tɩn dɩ, yɩ o ta zəli-ba Zezi kɔgɔ kʋm wʋnɩ. 11 A ciloŋ-sono, yɩ sɛ n lwəni nɔn-balwaarʋ kikiə, nmʋ za n kwaanɩ n ta n kɩ lanyɩranɩ. Wʋlʋ maama na kɩ lanyɩranɩ tɩn yɩ Wɛ nɔɔnʋ mʋ. Wʋlʋ nan na kɩ kəm-balwaarʋ tɩn ta wʋ lwarɩ Wɛ. 12 Kʋ nan na yɩ Demɛtrisi, nɔɔna maama tɛ o na yɩ nɔn-ŋʋm te tɩn, yɩ o na tɔgɩ cɩga kam te tɩn dɩ brɩ nɩ o yɩ nɔn-ŋʋm mʋ. Dɩbam dɩ nan brɩ nɩ kʋ yɩ cɩga mʋ, yɩ abam ye nɩ d'ɩ na tɛ kʋlʋ tɩn sɩɩnɩ kʋ yɩ cɩga mʋ. 13 A ya jɩgɩ wəənu zanzan sɩ a ta a brɩ abam. A nan ba lagɩ sɩ a pʋpʋnɩ a kɩ tɔnɔ nɩ. 14 A nan bʋŋɩ sɩ a'a ba abam te lele, sɩ d'ɩ laan ŋɔɔnɩ daanɩ jaja. 15 Wɛ w'ʋ pa-m yazurə. Nmʋ cilonnə balʋ na wʋ yo seeni tɩn maama jɔɔnɩ nmʋ. N dɩ jɔɔnɩ d'ɩ cilonnə bam dɩdʋa dɩdʋa ba na wʋ nmʋ tee nɩ tɩn n pa dɩbam.
