2 Timoti 3

1Ta n ye nɩ lʋgʋ tiim maŋa nɩ lɛɛrʋ zanzan w'ʋ ba lʋgʋ baŋa. 2Kantʋ maŋa kam nɩ nɔɔna w'ʋ ta wʋra ba na lagɩ wəənu ba tɩtɩ zənə yɩranɩ m'a ŋwaanɩ, yɩ ba'a ta yɩ səbu-swən-nyɩna dɩ kamun-nyɩna, yɩ ba'a ta tee ba tɩtɩ. Nɔɔna w'ʋ ta twɩ daanɩ yɩ ba ba sɛ ba tiinə niə, yɩ ba b'a zuli balʋ na kɩ-ba lanyɩranɩ tɩn. Ba'a ta yɩ nɔn-balwaarʋ yɩ ba ba nɩgɩ woŋo kʋlʋ na yɩ Wɛ nyɩm. 3Nɔɔna b'a ta soe daanɩ, yɩ ba b'a ta jɩgɩ da-ŋwaŋa. Ba'a ta yɩ bɩbarɩ-nyɩna yɩ ba ba lagɩ sɩ ba ja ba tɩtɩ, ba'a ta yɩ wʋ-lʋn-nyɩna, yɩ ba'a ta culi wəənu tɩlʋ na lamma tɩn. 4Nɔɔna w'ʋ ta tusi ba cilonnə, yɩ ba b'a ta zuri ba yɩra dɩ lwarɩm kəm. Ba'a ta magɩ ba nyɔɔna ba brɩ ba tɩtɩ kamunni. Ba'a ta soe ba wʋbʋŋa wəənu ba dwe Baŋa-Wɛ. 5Nɔɔna bam kʋntʋ w'ʋ ta kɩ nɩ ba tɔgɩ Wɛ cɩga kam mʋ te, yɩ Wɛ dam nan təri ba tee nɩ. Fɔgɩ n cɩ n tɩtɩ dɩ nɔɔna bam kʋntʋ. 6Nɔɔna bam kʋntʋ badaara yəni ba səgi ba zʋʋrɩ sam mʋ ba ganɩ kaana balʋ na yɩ ka-kayɛ tɩn ba pa ba wʋbʋŋa cɔga. Kaana bam kʋntʋ wʋ cɔgɩ dɩ ba kəm-balwaarʋ zanzan, yɩ ba wʋbʋŋa paɩ ba tɔgɩ woŋo kʋlʋ maama ba fra na zʋ tɩn. 7Kaana bam kʋntʋ tiini ba kwaanɩ ba zaasɩ mʋ maŋa maama, yɩ ba nan ba fɔgɩ ba lwarɩ cɩga. 8Nɔɔna bam kʋntʋ kəm dɩm nyɩ dɩ Zanɛsɩ dɩ Zambrɛsɩ dɛɛn na vɩn Moyisi ni faŋa faŋa te tɩn mʋ. Ba dɩ vɩn Wɛ cɩga kam mʋ. Ba jɩgɩ wʋbʋŋ-balwaarʋ mʋ, yɩ ba Wɛ tɔgɩm dɩm yɩ kafɛ. 9Ba nan daa b'a wanɩ ba vu yigə dɩ ba gana yam. Bɛŋwaanɩ nɔɔna maama w'ʋ ba lwarɩ ba jwərim dɩm jaja, nɩnɛɛnɩ kʋ dɛɛn na kɩ Zanɛsɩ dɩ Zambrɛsɩ te tɩn. 10Kʋ nan na yɩ nmʋ Timoti, n maŋɩ n ye amʋ zaasɩm dɩm dɩ a ŋwɩa dɩ a wʋbʋŋa na yɩ te tɩn. Nmʋ nan ta ye a na jɩgɩ wʋ-dɩdʋa dɩ Wɛ te tɩn, yɩ n ta ye a na jɩgɩ wʋ-zuru dɩ sono dɩ pu-dɩa dɩ te tɩn. 11Nmʋ nan ta ye nɔɔna na bɛɛsɩ-nɩ yɩ a yaarɩ te tɩn. Nmʋ ye wəənu tɩlʋ maama na kɩ amʋ Antɩɔsɩ nɩ dɩ Yikon dɩ Lisitri nɩ, yɩ dɩ kʋ dɩ, a ta wʋ yagɩ Wɛ cɩga kam. D'ɩ Yuutu wʋm nan mʋ vrɩ-nɩ yaara yam kʋntʋ maama wʋnɩ. 12Kʋntʋ, balʋ maama na lagɩ sɩ ba taa tɔgɩ Zezi Krisi dɩ cɩga tɩn dɩ w'ʋ na bɛɛsɩm. 13Kʋ daarɩ, kʋ na yɩ nɔn-balwaarʋ dɩ kampin-nyɩna bam, bantʋ lwarɩm dɩm w'ʋ tiini dɩ puli kʋ ja gaalɩ. Ba'a ta ganɩ nɔɔna, yɩ ba'a ganɩ ba tɩtɩ dɩ. 14Kʋ daarɩ kʋ na yɩ nmʋ, yɔɔrɩ n ta n tɔgɩ cɩga kalʋ nmʋ na maŋɩ n lwarɩ yɩ n kɩ n wʋ-dɩdʋa dɩ ka tɩn, bɛŋwaanɩ nmʋ ye balʋ dɛɛn na brɩ-m wəənu tɩm kʋntʋ tɩn wʋ lanyɩranɩ. 15N biini nɩ mʋ n maŋɩ n ye Wɛ tɔnɔ kʋm na brɩ kʋlʋ tɩn. Zaasɩm dɩm kʋntʋ w'ʋ wanɩ dɩ vɩɩrɩ-m yɩ n na swan yalʋ na w'ʋ pa n na vrɩm, n na kɩ n wʋ-dɩdʋa dɩ Zezi Krisi tɩn ŋwaanɩ. 16Kʋlʋ maama na pʋpʋnɩ Wɛ tɔnɔ kʋm wʋnɩ tɩn, kʋ yɩ Wɛ Joro mʋ pɛ dɩbam yɩ kʋ jɩgɩ kuri kʋ pa dɩbam, sɩ kʋ taa brɩ nɔɔna cɩga, naa kʋ brɩ-ba nɩ ba tusi, naa kʋ kwe-ba sɩ ba da cwəŋə, naa kʋ zaasɩ-ba ba na w'ʋ ta tɔgɩ cɩga cwəŋə te tɩn, 17sɩ dɩbam balʋ na yɩ Wɛ nɔɔna tɩn laan yɔɔrɩ d'ɩ maŋɩ fasɩ, sɩ d'ɩ ta'a tʋŋɩ tɩtʋŋ-ŋʋna dwi maama.

will be added

X\