2 Zan 1

1Amʋ wʋlʋ na yɩ Zezi kɔgɔ kʋm nakwɩ tɩn mʋ pʋpʋnɩ tɔnɔ kʋntʋ a pa dɩbam nu wʋlʋ Wɛ na kuri tɩn, dɩ biə balʋ na wʋ nmʋ kɔgɔ kʋm wʋnɩ tɩn. A soe abam cɩga cɩga. Kʋ nan daɩ amʋ yɩranɩ mʋ soe abam, kʋ yɩ dɩ balʋ maama na lwarɩ Wɛ cɩga kam tɩn dɩ mʋ. 2Bɛŋwaanɩ dɩbam maama sɛ Wɛ cɩga kam, yɩ ka daa b'a fɔgɩ ka ti dɩbam tee nɩ. 3D'ɩ Ko Wɛ dɩ DƖ Bu Zezi Krisi w'ʋ pa dɩbam yazurə dɩ yu-yoŋo, yɩ DƖ daarɩ DƖ duri d'ɩ ŋwaŋa, dɩbam balʋ na sɛ Wɛ cɩga kam yɩ d'ɩ soe daanɩ tɩn. 4Amʋ wʋ poli lanyɩranɩ dɩ a na lwarɩ nɩ nmʋ biə bam badaara tɔgɩ cɩga cwəŋə kam, nɩnɛɛnɩ dɩbam Ko Wɛ na pɛ dɩbam ni sɩ d'ɩ ta'a kɩ te tɩn. 5A nu, a lagɩ a ta dɩ nmʋ sɩ d'ɩ maama maŋɩ sɩ d'ɩ ta'a soe daanɩ. A na pʋpʋnɩ kʋlʋ tɩn daɩ ni-dʋʋrɩ, kʋ maŋɩ kʋ yɩ Wɛ ni dɩm d'ɩ na ni pulim nɩ tɩn mʋ. 6D'ɩ na w'ʋ ta soe daanɩ te tɩn mʋ yɩ sɩ d'ɩ ta'a ŋwɩ nɩ Wɛ niə yam na brɩ te tɩn. Wɛ ni dɩm nan yɩ sɩ 'a ta'a tɔgɩ sono cwəŋə mʋ. Abam nan maŋɩ 'a lwarɩ DƖ ni dɩm kʋntʋ pulim nɩ mʋ. 7Vwa-nyɩna zanzan mʋ tu ba karɩ lʋgʋ baŋa nɩ ba ganɩ nɔɔna. Vwa-nyɩna bam kʋntʋ maa ba sɛ nɩ Zezi Krisi jigi nabiinu mʋ o ba lʋgʋ baŋa. Nɔɔnʋ wʋlʋ nan na tɛ kʋntʋ tɩn yɩ vwa-nyɩm mʋ, yɩ o yɩ Zezi Krisi dʋm mʋ. 8Kʋntʋ ŋwaanɩ, 'a fɔgɩ 'a cɩ 'a tɩtɩ, sɩ 'a na tʋŋɩ kʋlʋ Wɛ ŋwaanɩ tɩn yɩ zaŋɩ kʋ ji kafɛ, sɩ 'a wanɩ 'a na ŋwɩɩrʋ tɩlʋ maama Wɛ na w'ʋ pa abam tɩn. 9Ta'a ye-na nɩ, nɔɔnʋ wʋlʋ maama na yagɩ Zezi Krisi zaasɩm dɩm yɩ o daarɩ o brɩ wəənu tɩdonnə o wəli da tɩn, Wɛ təri kʋntʋ tu tee nɩ. Kʋ daarɩ, nɔɔnʋ wʋlʋ nan na sɛ o tɔgɩ Zezi zaasɩm dɩm tɩn, d'ɩ Ko Wɛ dɩ DƖ Bu wʋm wʋra dɩ kʋntʋ tu. 10Kʋntʋ, nɔɔnʋ na tu abam te, yɩ o zaasɩm dɩm na daɩ Zezi Krisi nyɩm dɩm, 'a yɩ sɛ 'a pa o zʋ 'a sam. Nan brɩ 'a yɩ zaan-o dɩ. 11Nɔɔnʋ wʋlʋ na zaan-o tɩn, kʋntʋ tu dɩ tɔgɩ o wəli o kəm-balwaarʋ tɩm wʋnɩ mʋ. 12Amʋ ya jɩgɩ wəənu zanzan sɩ a ta a brɩ abam. A nan ba lagɩ sɩ a pʋpʋnɩ a kɩ tɔnɔ nɩ. A nan bʋŋɩ nɩ, a'a ba abam te sɩ a laan ŋɔɔnɩ dɩdaanɩ abam jaja, sɩ kʋ pa dɩbam wʋpolo kʋm tiini kʋ gaalɩ. 13Dɩbam balʋ na yɩ nmʋ cʋrʋ biə yɩ Wɛ kuri dɩbam dɩ tɩn mʋ jɔɔnɩ nmʋ.

will be added

X\