2 Korɛntɩ 5

1Dɩbam yɩra yam d'ɩ na jɩgɩ lʋgʋ baŋa nɩ tɩn nyɩ dɩ vwe mʋ d'ɩ na zʋʋrɩ dɩ wʋnɩ. D'ɩ nan ye nɩ, vwe dɩm kʋntʋ na cɔgɩ, Wɛ w'ʋ pa d'ɩ na digə DƖ sɔŋɔ nɩ sɩ d'ɩ ta'a zʋʋrɩ da. Kʋ daɩ nabiinə mʋ lɔgɩ digə kam kʋntʋ. Ka nan w'ʋ ta wʋra maŋa kalʋ na ba ti tɩn. 2Kʋntʋ ŋwaanɩ mʋ dɩbam yəni d'ɩ kʋna dɩ cam, yɩ d'ɩ fra tiini ya zʋ Wɛ-sɔŋɔ kʋm, d'ɩ na lagɩ sɩ Wɛ pa d'ɩ zʋ digə kalʋ DƖ na lagɩ DƖ pa dɩbam tɩn ŋwaanɩ. 3Wɛ na pɛ d'ɩ zʋ digə kam kʋntʋ nɩnɛɛnɩ d'ɩ na zʋ gɔrɔ te tɩn, d'ɩ daa b'a ta nyɩ nɩ nɔn-kalambwəəlu te. 4D'ɩ ta na zʋʋrɩ d'ɩ lʋgʋ baŋa vwe dɩm wʋnɩ tɩn, d'ɩ yəni d'ɩ kʋnɩ mʋ nɩ d'ɩ zɩŋɩ zɩla mʋ te. Kʋ nan daɩ nɩ d'ɩ lagɩ sɩ d'ɩ dɩ d'ɩ yɩra yam mʋ d'ɩ yagɩ. D'ɩ lagɩ sɩ d'ɩ zʋ ya-dʋʋra yalʋ Wɛ na tiŋi DƖ sɔŋɔ nɩ sɩ DƖ pa dɩbam tɩn mʋ, sɩ DƖ ŋwɩ-dʋŋa kam laan pa d'ɩ yɩra yalʋ na w'ʋ tɩ tɩn daa yɩ taa jɩgɩ kuri. 5Baŋa-Wɛ tɩtɩ mʋ kwɛ dɩbam sɩ d'ɩ ba d'ɩ na ya-dʋʋra yam kʋntʋ DƖ tee nɩ, yɩ DƖ pa dɩbam DƖ Joro kʋm, sɩ kʋ da yigə kʋ pa d'ɩ lwarɩ nɩ d'ɩ laan w'ʋ ba d'ɩ na wo-laarʋ tɩlʋ Wɛ na tiŋi sɩ DƖ pa dɩbam tɩn maama. 6Kʋntʋ ŋwaanɩ mʋ d'ɩ jɩgɩ pu-dɩa maŋa maama, yɩ d'ɩ ye nɩ, d'ɩ ta na jɩgɩ lʋgʋ baŋa yɩra yam tɩn mʋ paɩ d'ɩ ta wʋ ve d'ɩ Yuutu wʋm sɔŋɔ. 7Kʋ daɩ nɩ d'ɩ yiə maŋɩ ya na Wɛ-sɔŋɔ kʋm wəənu tɩm kʋntʋ. D'ɩ nan kɩ d'ɩ wʋ-dɩdʋa dɩ Wɛ nɩ d'ɩ w'ʋ na-tɩ. 8Kʋntʋ mʋ paɩ d'ɩ jɩgɩ pu-dɩa, yɩ d'ɩ ye nɩ kʋ'ʋ ta lamma kʋ pa dɩbam sɩ d'ɩ yagɩ d'ɩ yɩra yalʋ na yɩ lʋgʋ baŋa nyɩm tɩn, sɩ d'ɩ daarɩ d'ɩ vu d'ɩ ta'a wʋ d'ɩ Yuutu wʋm sɔŋɔ nɩ. 9Kʋntʋ ŋwaanɩ mʋ d'ɩ kwaanɩ d'ɩ lagɩ sɩ d'ɩ kɩ kʋlʋ na w'ʋ poli d'ɩ Yuutu wʋm wʋ maŋa maama tɩn, d'ɩ na wʋ tɩga baŋa nɩ naa d'ɩ zɩ ve Wɛ-sɔŋɔ dɩ. 10Bɛŋwaanɩ dɩbam maama maŋɩ sɩ d'ɩ ba d'ɩ zɩgɩ Zezi Krisi yigə nɩ sɩ o di dɩbam taanɩ. Nɔɔnʋ maama maŋɩ sɩ o joŋi kʋlʋ na maŋɩ dɩ o kikiə yalʋ maama o na kɩ lʋgʋ baŋa nɩ tɩn, kʋ na yɩ o kəm-laarʋ naa o kəm-balwaarʋ. 11Kʋntʋ ŋwaanɩ d'ɩ ye d'ɩ na maŋɩ sɩ d'ɩ ta'a kwarɩ d'ɩ Yuutu wʋm te. Mʋ kʋ kuri d'ɩ kwaana sɩ d'ɩ pa nɔɔna lwarɩ Wɛ cɩga kam. Wɛ ye dɩbam wʋ lanyɩranɩ. Amʋ nan bʋŋɩ nɩ abam dɩ w'ʋ ta ye kʋntʋ 'a bɩcara nɩ. 12Kʋ nan daɩ nɩ dɩbam lagɩ sɩ d'ɩ brɩ d'ɩ tɩtɩ mʋ dɩ abam. D'ɩ lagɩ sɩ d'ɩ zəni abam mʋ, sɩ 'a wanɩ 'a ta'a jɩgɩ wʋpolo dɩbam ŋwaanɩ. Kʋntʋ mʋ 'a w'ʋ wanɩ 'a vɩn balʋ na tu abam te, yɩ ba jɩgɩ tɩɩra dɩ ba na brɩ ba tɩtɩ te, yɩ ba yigə tərə dɩ ba wʋrʋ na yɩ te tɩn. 13Abam paɩ dɩbam ba jɩgɩ swan mʋ na? Kʋ nan na maŋɩ kʋ yɩ kʋntʋ dɩ, kʋ yɩ Wɛ ŋwaanɩ mʋ. D'ɩ nan jɩgɩ swan, kʋ yɩ abam zənə ŋwaanɩ mʋ. 14D'ɩ na kɩ kʋlʋ maama tɩn, kʋ yɩ Zezi Krisi sono kʋm ŋwaanɩ mʋ. Bɛŋwaanɩ d'ɩ ye lanyɩranɩ nɩ nɔɔnʋ dɩdʋa mʋ tɩga o ləni nɔɔna maama yuu nɩ, yɩ kʋntʋ brɩ nɩ ba maama dɩ tɔgɩ dɩd-o ba tɩ mʋ. 15Zezi tɩgɩ ba maama ŋwaanɩ mʋ, sɩ balʋ na ŋwɩ tɩn daa yɩ taa ŋwɩ nɩ ba tɩtɩ na lagɩ te tɩn, sɩ ba taa ŋwɩ wʋlʋ na ləni ba yuu nɩ o tɩ yɩ o joori o bi o yagɩ tʋʋnɩ tɩn ŋwaanɩ. 16Kʋntʋ ŋwaanɩ dɩbam daa ba kuri nɔɔna da-wʋnɩ nɩ nabiinə wʋbʋŋa na yɩ te tɩn. Dɩbam dɛɛn ya jɩgɩ wʋbʋŋa yantʋ doŋ mʋ dɩdaanɩ d'ɩ na nii Zezi Krisi te tɩn. Lele kʋntʋ d'ɩ nan daa ba jeeli kʋntʋ doŋ. 17Nɔɔnʋ wʋlʋ na ŋwɩ dɩ Zezi Krisi tɩn, kʋ brɩ nɩ o jɩgɩ Wɛ ŋwɩ-dʋŋa kam mʋ, yɩ o ŋwɩ-doŋə kam kɛ. O ŋwɩa kam maama laan ləni ka ji ŋwɩ-dʋŋa mʋ. 18Kʋ yɩ Wɛ mʋ kɩ kʋ maama. Dɩntʋ mʋ tagɩ Zezi Krisi ŋwaanɩ DƖ fɔgɩ dɩbam dɩ DƖ tɩtɩ daanɩ, yɩ DƖ daarɩ DƖ pa dɩbam tɩtʋŋɩ dɩm kʋntʋ, sɩ d'ɩ brɩ nɔɔna sɩ ba dɩ Wɛ fɔgɩ daanɩ. 19D'ɩ yəni d'ɩ brɩ nɔɔna nɩ Baŋa-Wɛ dɛ Zezi Krisi ŋwaanɩ mʋ DƖ fɔgɩ nabiinə dɩ DƖ tɩtɩ daanɩ, kʋ pa Wɛ daa ba jeeli ba lwarɩm. DƖ ma tʋŋɩ dɩbam sɩ d'ɩ ta'a brɩ nɔɔna DƖ fɔgɩm dɩm kʋntʋ na yɩ te tɩn. 20Kʋ nan yɩ dɩbam ləni Zezi Krisi yuu nɩ mʋ sɩ d'ɩ ta'a brɩ nɔɔna Wɛ cɩga kam kʋntʋ. Kʋ maa nyɩ dɩ Wɛ tɩtɩ mʋ tɔgɩ dɩbam ŋwaanɩ DƖ ŋɔɔna dɩ abam. D'ɩ nan loori abam Zezi Krisi ŋwaanɩ sɩ 'a sɛ, sɩ 'a dɩ Wɛ fɔgɩ daanɩ. 21Zezi Krisi mʋ yɩ wʋlʋ na ba jɩgɩ lwarɩm tɩn. Wɛ nan pɛ dɩbam lwarɩm dɩm tɔgɩ wʋntʋ, sɩ kʋ pa d'ɩ ta'a jɩgɩ cɩga mʋ Wɛ tee nɩ wʋntʋ ŋwaanɩ.

will be added

X\