1 Pɩyɛɛrɩ 1

1Amʋ Pɩyɛɛrɩ wʋlʋ na yɩ Zezi Krisi tɩntʋŋnʋ tɩn mʋ pʋpʋnɩ tɔnɔ kʋntʋ, sɩ a pa abam balʋ Wɛ na kuri sɩ 'a ta'a yɩ DƖ nɔɔna yɩ 'a jagɩ 'a vu 'a yɩ vərə yɩ 'a zʋʋrɩ Pɔn tɩ-niə yam wʋnɩ, dɩ Galatɩ dɩ Kapadɔsɩ dɩ Azi dɩ Bitini tɩ-niə yam maama wʋnɩ tɩn. 2D'ɩ Ko Wɛ mʋ dɛ yigə DƖ kɩ DƖ wʋbʋŋa nɩ sɩ DƖ kuri abam kʋntʋ, yɩ DƖ tɔgɩ DƖ Joro kʋm ŋwaanɩ DƖ pa 'a ji nɔn-ŋʋna balʋ na yɩ DƖ nyɩm tɩn. Wɛ nan kɩ kʋntʋ sɩ kʋ pa 'a ta'a sɛ Zezi Krisi ni mʋ, sɩ DƖ fɔgɩ abam Zezi jana kam na nuŋi tɩn ŋwaanɩ. Wɛ w'ʋ pa abam yazurə dɩ yu-yoŋo kʋ ja gaalɩ. 3Pa-na d'ɩ ta'a kɩ Wɛ dɩlʋ na yɩ dɩbam Yuutu Zezi Krisi Ko tɩn le. Dɩntʋ mʋ tiini DƖ yɩ ŋwaŋa tu, yɩ DƖ pa d'ɩ jɩgɩ ŋwɩ-dʋŋa, dɩ DƖ na pɛ Zezi Krisi bi o yagɩ tʋʋnɩ tɩn, yɩ d'ɩ ta'a jɩgɩ tɩɩna DƖ tee nɩ maŋa maama. 4Kʋntʋ mʋ d'ɩ ye nɩ d'ɩ w'ʋ ba d'ɩ joŋi wo-laarʋ tɩlʋ Wɛ na tiŋi sɩ DƖ pa DƖ biə tɩn. Wəənu tɩm kʋntʋ nan ba pɔɛ, yɩ tɩ ba cɔga, tɩ nan ba lɩɩrɩ dɩ. Wɛ tiŋi tɩntʋ mʋ DƖ sɔŋɔ nɩ sɩ DƖ pa abam. 5DƖ maa maɩ DƖ dam dɩm DƖ yɩrɩ abam, 'a na kɩ 'a wʋ-dɩdʋa dɩ DƖ tɩn ŋwaanɩ, sɩ kʋ vu kʋ yi lʋgʋ baŋa tiim da yam, sɩ DƖ laan joŋi abam jaja. 6Kʋntʋ maa paɩ 'a jɩgɩ wʋpolo lanyɩranɩ, dɩ cam dwi təri təri ya zɩ maŋɩ abam zɩm yɩ kʋ pa 'a wʋ cɔgɩ maŋa fɩnfɩɩn yɩranɩ dɩ. 7Kʋ na yɩ cana yam kʋntʋ, kʋ yɩ sɩ ya maŋɩ abam mʋ ya nii 'a na kɩ 'a wʋ-dɩdʋa dɩ Wɛ te tɩn. Kʋ na yɩ səbu-sɩŋa, ba yəni ba maɩ mini mʋ ba ma maŋɩ-ka sɩ ba nii ka lana na? Abam nan na kɩ 'a wʋ-dɩdʋa dɩ Wɛ te tɩn tiini kʋ dwe səbu-sɩŋa kalʋ na w'ʋ ba ka cɔgɩ tɩn. Kʋntʋ tɩn, cam na maŋɩ abam yɩ 'a ta na zɩgɩ kəŋkəŋ, kʋ'ʋ pa 'a na zulə dɩ tiə Wɛ tee nɩ maŋa kalʋ Zezi Krisi na w'ʋ joori o ba tɩn. 8Abam yi ta wʋ nɛ-o, yɩ 'a nan so-o. 'A maa kɩ 'a wʋ-dɩdʋa dɩd-o, yɩ 'a nan daa ta ba na-o lele kʋntʋ. Kʋ ma pa 'a tiini 'a jɩgɩ wʋpolo zanzan yɩ kʋ b'a wanɩ kʋ ta dɩ nabiinə taanɩ, 9Wɛ na vrɩ abam ŋwɩa yɩ kʋntʋ mʋ yɩ kʋlʋ 'a na maŋɩ 'a kɩ 'a wʋ-dɩdʋa dɩ Wɛ sɩ 'a na tɩn ŋwaanɩ. 10Faŋa faŋa Wɛ nijoŋnə bam dɛɛn tiini ba kwaanɩ ba tɔgɩ kʋ nɛ lanyɩranɩ sɩ ba lwarɩ Wɛ na w'ʋ vrɩ DƖ nɔɔna bam te tɩn. Ba dɛɛn ma maŋɩ ba wuuri ba ta Wɛ na w'ʋ pa abam pɛɛrɩ dɩlʋ tɩn. 11Zezi Krisi Joro kʋm maa wʋ ba tee nɩ yɩ kʋ pa ba wuuri ba lwarɩ nɩ Krisi wʋm w'ʋ ba o na yaara sɩ o laan daarɩ o na paarɩ-zulə Wɛ tee nɩ. Ba maa tiini ba kwaanɩ sɩ ba lwarɩ maŋa kam kʋntʋ dɩ kʋ na w'ʋ kɩ te tɩn. 12Wɛ dɛɛn ma pa DƖ nijoŋnə bam lwarɩ nɩ, DƖ na pɛ-ba kwərə kalʋ tɩn, kʋ daɩ ba tɩtɩ ŋwaanɩ, kʋ yɩ abam ŋwaanɩ mʋ. Ba dɛɛn na brɩ cɩga kalʋ tɩn mʋ yɩ Zezi kwər-ywəŋə kalʋ o tɩntʋŋna bam laan na tɔɔlɩ ba brɩ abam zɩm tɩn. Baŋa-Wɛ mʋ pɛ DƖ Joro kʋm ba bantʋ te, yɩ ba wanɩ ba brɩ abam kwər-ywəŋə kam kʋntʋ. Wɛ malɛsɩ sɩm dɩ nan lagɩ sɩ sɩ lwarɩ cɩga kam kʋntʋ kuri na yɩ te tɩn. 13Abam nan fɔgɩ 'a ja 'a wʋbʋŋa, sɩ 'a ta'a ma tʋŋɩ 'a pa Wɛ. Pɩɩnɩ-na 'a tɩtɩ sɩ 'a tiŋi 'a tɩɩna maama woŋo kʋlʋ Wɛ na w'ʋ ba DƖ pa abam zaanɩ tɩn baŋa nɩ, maŋa kalʋ Zezi Krisi na w'ʋ joori o ba tɩn. 14Ta'a sɛ-na 'a Ko Wɛ ni. 'A daa yɩ ta'a ŋwɩ nɩ 'a dɛɛn na wʋ lwarɩ Wɛ cɩga kam yɩ 'a fra zʋʋrɩ wo-yɔɔrʋ tɩlʋ tɩn. 15'A nan ta'a ŋwɩ dɩ wʋ-poŋo woŋo maama wʋnɩ, nɩ 'a Ko Wɛ dɩlʋ na bəŋi abam sɩ 'a ta'a yɩ DƖ nɔɔna tɩn na jɩgɩ wʋ-poŋo te tɩn. 16Kʋ nan maŋɩ kʋ pʋpʋnɩ Wɛ tɔnɔ kʋm wʋnɩ kʋ wɩ: "'A ta'a yɩ wʋ-poŋo tiinə, sɩ amʋ Baŋa-Wɛ yɩ wʋ-poŋo tu mʋ." 17Abam na yəni 'a loori Wɛ, 'a bə-DƖ nɩ 'a Ko mʋ, yɩ dɩntʋ nan mʋ w'ʋ di nabiinə maama sarɩya sɩ kʋ maŋɩ dɩ ba tɩtʋŋa na yɩ te tɩn, yɩ DƖ ba kuri nɔɔna daanɩ. Kʋntʋ, 'a ta na wʋ lʋgʋ baŋa nɩ maŋa kalʋ tɩn, kʋ maŋɩ sɩ 'a ta'a kwarɩ Wɛ kʋlʋ maama 'a na kɩ tɩn wʋnɩ. 18'A ye nɩ Wɛ vrɩ abam sɩ 'a daa yɩ ta'a tɔgɩ cullu tɩlʋ na nuŋi 'a nabaara bam jɩŋa nɩ tɩn mʋ. Wɛ na lɩ abam wo-yɔɔrʋ tɩm kʋntʋ wʋnɩ tɩn, kʋ daɩ lʋgʋ baŋa səbu naa səbu-sɩŋa, wəənu tɩlʋ na waɩ tɩ cɔgɩ tɩn, mʋ DƖ mɛ DƖ ŋwɩ DƖ vrɩ abam. 19Wɛ nan mɛ Zezi Krisi jana kam mʋ DƖ ma vrɩ abam, yɩ kantʋ tiini ka jɩgɩ dam. Zezi na jigi kaanɩm kʋntʋ tɩn, o nyɩ dɩ pəlbu wʋlʋ na tiini o lana fasɩ yɩ kʋlʋkʋlʋ tərə kʋ na yɩ balɔrɔ o yɩra nɩ tɩn mʋ. 20Wɛ maŋɩ DƖ kuri wʋntʋ mʋ kʋ loori lʋgʋ pulim, sɩ o vrɩ nɔɔna ba lwarɩm wʋnɩ. Kʋ daarɩ lʋgʋ baŋa kweelim maŋa kam laan nan na yi tɩn, Wɛ pɛ 'a lwar-o, sɩ o vrɩ abam. 21'A nan dɛ Zezi ŋwaanɩ mʋ 'a kɩ 'a wʋ-dɩdʋa dɩ Wɛ. Dɩntʋ mʋ bi-o DƖ pa o yagɩ tʋʋnɩ, yɩ DƖ daarɩ DƖ pa o na paarɩ-zulə. Kʋ ma paɩ 'a sɩɩnɩ 'a jɩgɩ wʋ-dɩdʋa dɩ tɩɩna Wɛ tee nɩ. 22Abam na sɛ Wɛ cɩga kam tɩn mʋ pɛ 'a bɩcara fɔgɩ ya kwɛ, kʋ pa 'a jɩgɩ sono cɩga cɩga dɩ 'a ko-biə balʋ na yɩ Wɛ nɔɔna tɩn. Kʋntʋ tɩn, 'a ta'a tiini 'a soe daanɩ dɩ 'a bɩcara maama. 23Abam na jɩgɩ Wɛ ŋwɩ-dʋŋa kam tɩn, ka kuri wʋ nuŋi nabiinə balʋ na tʋ tɩn te, ka nan ba cɔga. Kʋ yɩ Wɛ kwərə kam na paɩ ŋwɩa yɩ ka wʋra maŋa maama tɩn ŋwaanɩ mʋ 'a nɛ ŋwɩ-dʋŋa kam kʋntʋ. 24Kʋ nan pʋpʋnɩ Wɛ tɔnɔ kʋm wʋnɩ kʋ wɩ: "Kʋ na yɩ nabiinə, bantʋ nyɩ dɩ gaa mʋ yɩ ba ba daanɩ ba tʋa. Ba nɩnwaŋa maa ba daanɩ ka kɛa, nɩnɛɛnɩ ga-punnu tɩm na yɩ te tɩn. Gaa kʋm na yəni kʋ kwaarɩ, kʋ punnu tɩm w'ʋ siiri mʋ. 25Kʋ nan na yɩ Wɛ kwərə kam, kantʋ w'ʋ ta wʋra sɩ kʋ taa ve maŋa kalʋ na ba ti tɩn." Kwərə kam kʋntʋ mʋ yɩ kwər-ywəŋə kalʋ ba na brɩ abam tɩn.

will be added

X\