1 Zan 5

1Wʋlʋ maama na kɩ o wʋ-dɩdʋa o sɛ nɩ Zezi yɩ Krisi wʋm Wɛ na tʋŋɩ tɩn, kʋntʋ tu yɩ Wɛ bu mʋ. Wʋlʋ maama nan na soe ko tɩn soe ko wʋm biə dɩ mʋ. 2Kʋntʋ, d'ɩ na soe Wɛ yɩ d'ɩ sɛ DƖ niə yam, d'ɩ ye nɩ d'ɩ soe DƖ biə dɩ mʋ. 3D'ɩ na w'ʋ ta soe Wɛ te tɩn mʋ yɩ sɩ d'ɩ ta'a sɛ DƖ niə yam. DƖ niə yam tɔgɩm nan b'a ta cana dɩ dɩbam, 4bɛŋwaanɩ wʋlʋ maama na yɩ Wɛ bu tɩn wanɩ lʋgʋ baŋa wo-balwaarʋ tɩm. Kʋ yɩ dɩbam na kɩ d'ɩ wʋ-dɩdʋa dɩ Zezi tɩn mʋ pɛ d'ɩ wanɩ wo-balwaarʋ tɩm kʋntʋ. 5Nɔɔn-nɔɔnʋ tərə o na w'ʋ wanɩ lʋgʋ baŋa wo-balwaarʋ tɩm, kʋ na daɩ wʋlʋ maama na sɛ nɩ Zezi yɩ Wɛ Bu tɩn yɩranɩ. 6Zezi Krisi mʋ yɩ wʋlʋ dɛɛn na tu lʋgʋ baŋa, yɩ Baŋa-Wɛ brɩ nɩ o yɩ dɩntʋ Bu maŋa kalʋ ba na miis-o na wʋnɩ dɩ maŋa kalʋ o na tɩga yɩ o jana nuŋi tɩn. Kʋ nan daɩ na yɩranɩ, kʋ yɩ na dɩ jana mʋ. Wɛ Joro dɩ nan brɩ jaja nɩ wəənu tɩm kʋntʋ yɩ cɩga mʋ, kʋ na yɩ cɩga tu tɩn ŋwaanɩ. 7Kʋntʋ, Wɛ dɛ wəənu tɩtɔ ŋwaanɩ mʋ DƖ pa d'ɩ lwarɩ nɩ DƖ zɩgɩ DƖ Bu wʋm cɩga kam kwaga nɩ. 8Kʋ yɩ DƖ Joro kʋm dɩ na bam dɩ jana kam mʋ. Wəənu tɩm kʋntʋ maama brɩ cɩga dɩdʋa mʋ. 9Dɩbam yəni d'ɩ sɛ nabiinə na tɛ kʋlʋ nɩ kʋ yɩ cɩga tɩn. Kʋ nan na yɩ Wɛ na zɩgɩ cɩga kalʋ kwaga nɩ tɩn, ka tiini ka jɩgɩ kuri ka dwe nabiinə na tɛ kalʋ tɩn. Dɩntʋ nan mʋ yɩ dɩlʋ na zɩgɩ Zezi kwaga nɩ yɩ DƖ brɩ nɩ o yɩ DƖ Bu tɩn. 10Kʋntʋ ŋwaanɩ, wʋlʋ maama na kɩ o wʋ-dɩdʋa dɩ Wɛ Bu wʋm tɩn, kʋntʋ tu jɩgɩ Wɛ cɩga kam kʋntʋ o bɩcarɩ nɩ. Kʋ daarɩ, wʋlʋ maama na wʋ sɛ Wɛ tɩn, kʋntʋ tu brɩ nɩ Wɛ yɩ vwa-nyɩm mʋ, bɛŋwaanɩ o wʋ sɛ cɩga kalʋ Wɛ na tagɩ DƖ Bu wʋm ŋwaanɩ tɩn. 11Cɩga kam kʋntʋ mʋ yɩ Wɛ na pɛ dɩbam ŋwɩa kalʋ na ba ti tɩn. Ŋwɩa kam kʋntʋ nan yɩ DƖ Bu wʋm ŋwaanɩ mʋ. 12Wʋlʋ maama na ŋwɩ dɩ Wɛ Bu wʋm tɩn, kʋntʋ tu mʋ jɩgɩ Wɛ ŋwɩa kam kʋntʋ. Wʋlʋ nan na ba ŋwɩ dɩ Wɛ Bu wʋm tɩn, kʋntʋ tu ba jɩgɩ Wɛ ŋwɩa kam kʋntʋ. 13Amʋ pʋpʋnɩ wəənu tɩntʋ a pa abam balʋ na kɩ 'a wʋ-dɩdʋa dɩ Wɛ Bu wʋm tɩn, sɩ 'a lwarɩ nɩ 'a sɩɩnɩ 'a na ŋwɩa kalʋ na ba ti tɩn Wɛ tee nɩ. 14Kʋntʋ mʋ d'ɩ ye fasɩ Wɛ yigə nɩ nɩ, d'ɩ na loori woŋo DƖ tee nɩ yɩ kʋ tɔgɩ DƖ wʋbʋŋa, DƖ w'ʋ cəgi d'ɩ loro kʋm. 15D'ɩ nan na ye nɩ Wɛ cəgi dɩbam loro kʋm, d'ɩ ye nɩ d'ɩ w'ʋ na woŋo kʋlʋ d'ɩ na loori DƖ tee nɩ tɩn. 16Nmʋ na nɛ n doŋ wʋra o kɩ lwarɩm, yɩ kʋ daɩ lwarɩm dɩlʋ na jɩg-o dɩ ve tʋʋnɩ wʋ tɩn, kʋ maŋɩ sɩ n loori Wɛ mʋ n pa-o. N na loori Wɛ kʋntʋ, DƖ laan w'ʋ pa n doŋ wʋm na ŋwɩa. Kʋ nan yɩ balʋ na kɩ lwarɩm dɩlʋ na ba jɩgɩ-ba dɩ ve tʋʋnɩ wʋ tɩn ŋwaanɩ mʋ. Kʋ daarɩ, lwarɩm dɩdoŋ wʋra dɩ na w'ʋ pa tʋʋnɩ ja wʋlʋ na kɩ-dɩ tɩn. Amʋ nan wʋ tagɩ nɩ 'a loori Wɛ 'a pa kʋntʋ tu. 17Kəm dɩlʋ maama na ba tɔgɩ cɩga tɩn yɩ lwarɩm mʋ. Lwarɩm nan wʋra dɩ na ba jaanɩ nɔɔnʋ dɩ ve tʋʋnɩ wʋ. Kʋ yɩ dɩntʋ taanɩ mʋ a tɛa. 18D'ɩ ye nɩ wʋlʋ maama na yɩ Wɛ bu tɩn daa ba paalɩ o ta kɩ lwarɩm, bɛŋwaanɩ Wɛ Bu wʋm tɩtɩ mʋ nii wʋntʋ baŋa nɩ, yɩ o ba'a pa wo-lwaanʋ tu sʋtaanɩ wan-o. 19Dɩbam ye nɩ d'ɩ yɩ Wɛ nɔɔna mʋ. Kʋ daarɩ balʋ maama na jɩgɩ kugu je lʋgʋ baŋa nɩ tɩn wʋ wo-lwaanʋ tu sʋtaanɩ jɩŋa nɩ mʋ. 20D'ɩ ye nɩ Wɛ Bu wʋm mʋ tu lʋgʋ baŋa, yɩ o vɩɩrɩ d'ɩ swan yɩ d'ɩ wanɩ d'ɩ lwarɩ Baŋa-Wɛ cɩga cɩga. D'ɩ nan ŋwɩ dɩ Cɩga Tu Baŋa-Wɛ, d'ɩ na ŋwɩ dɩ DƖ Bu Zezi Krisi tɩn ŋwaanɩ. Wʋntʋ mʋ yɩ Wɛ cɩga cɩga, o yɩ ŋwɩa kalʋ na ba ti tɩn tu. 21A bu-sonnu-ba, 'a ta'a cʋ 'a tɩtɩ sɩ 'a yɩ tɔgɩ jwənə.

will be added

X\