1 Korɛntɩ 12

1Kʋ daarɩ, a laan lagɩ a ŋɔɔnɩ Wɛ Joro kʋm pɛɛra yam laŋa nɩ mʋ. A ko-biə-ba, a lagɩ sɩ a pa 'a lwarɩ Wɛ Joro kʋm na tʋŋɩ te dɩ te tɩn mʋ. 2Abam ye nɩ, maŋa kalʋ 'a dɛɛn ta na wʋ lwarɩ Wɛ tɩn, 'a dɛɛn tɔgɩ jwənə yalʋ na yɩ kafɛ tɩn mʋ, yɩ ya ganɩ abam sɩ 'a ta'a tɔgɩ cwe sɩlʋ maama ya na lagɩ tɩn. 3Kʋntʋ ŋwaanɩ mʋ a lagɩ a pa 'a lwarɩ nɩ, Wɛ Joro kʋm b'a ganɩ abam. Kʋntʋ, nɔɔnʋ wʋlʋ na ŋɔɔnɩ dɩ Wɛ Joro dam tɩn b'a wanɩ o twɩ Zezi. Nɔɔn-nɔɔnʋ nan b'a wanɩ o ta nɩ, Zezi mʋ yɩ o Yuutu, yɩ Wɛ Joro kʋm təri o tee nɩ. 4Wɛ Joro kʋm pɛɛra yam yɩ dwi təri təri mʋ, yɩ DƖ Joro kʋm dɩdʋa yɩranɩ mʋ paɩ-ya DƖ nɔɔna. 5Wɛ tɩtʋŋa yam dɩ yɩ dwi təri təri mʋ, yɩ d'ɩ Yuutu wʋlʋ d'ɩ na tʋŋɩ d'ɩ pa-o tɩn yɩ dɩdʋa yɩranɩ mʋ. 6Wɛ na pɛ dɩbam dam sɩ d'ɩ ma tʋŋɩ DƖ tɩtʋŋa te tɩn dɩ yɩ dwi təri təri mʋ. Wɛ nan yɩ dɩdʋa yɩranɩ mʋ, yɩ dɩntʋ mʋ pɛ dɩbam maama dam dɩm kʋntʋ maama. 7Wɛ Joro kʋm nan pɛ nɔɔnʋ maama pɛɛrɩ sɩ o wanɩ o maa zəni o donnə. 8Wɛ Joro kʋm paɩ nɔɔna badonnə dam sɩ ba ŋɔɔnɩ swan taanɩ, yɩ kʋntʋ mʋ ta paɩ nɔɔna badonnə dam sɩ ba ŋɔɔnɩ yəno taanɩ dɩ. 9Wɛ Joro kʋm nan ta mʋ paɩ nɔɔna badonnə dam sɩ ba taa tiini ba jɩgɩ wʋ-dɩdʋa dɩ Wɛ, yɩ kʋ ta paɩ badonnə dam sɩ ba ta maa paɩ yawɩɩna naɩ yazurə. 10Kʋntʋ nan ta mʋ paɩ badonnə dam sɩ ba ta maa kɩ wo-kɩnkagɩla, kʋ daarɩ sɩ badonnə taa waɩ ba ŋɔɔnɩ Wɛ yiyiu-ŋwɛ. Kʋ daa ta maa paɩ nɔɔna badonnə waɩ ba pɔɔrɩ kʋlʋ na yɩ Wɛ Joro kʋm nyɩm dɩ kʋlʋ na daɩ kʋ nyɩm tɩn daanɩ. Kʋ ta paɩ badonnə waɩ ba ŋɔɔnɩ ta-gɛ, yɩ badonnə dɩ waɩ ba lwarɩ ta-gɛ sɩm kʋntʋ kuri yɩ ba tɛ ba brɩ ba donnə. 11Kʋ nan yɩ Wɛ Joro kʋm kʋntʋ dɩdʋa yɩranɩ mʋ jɩgɩ pɛɛra yam kʋntʋ dwi təri təri, yɩ kʋ paɩ nɔɔnʋ maama nɩ kʋ wʋbʋŋa na lagɩ te tɩn. 12Nan bʋŋɩ-na 'a nii nabiinu yɩra na yɩ te tɩn. Ya yɩ woŋo dɩdʋa mʋ, yɩ ya laan pɔɔrɩ je dwi təri təri. Ya pɔɔrɩm dɩm daga zanzan, yɩ ya maama laan yɩ yɩra dɩdʋa mʋ. Zezi Krisi dɩ o kɔgɔ kʋm maama dɩ nan yɩ kʋntʋ mʋ. 13Dɩbam maama na pɛ ba miisi dɩbam na wʋnɩ Wɛ Joro kʋm dɩdʋa dam ŋwaanɩ tɩn, d'ɩ laan jigi nɔɔnʋ dɩdʋa mʋ. Kʋ na yɩ Zwifə naa dwi-gɛ tiinə, naa gambɛ naa balʋ na te ba tɩtɩ tɩn maama, Wɛ Joro kʋm kʋntʋ yɩranɩ mʋ wʋ dɩbam maama tee nɩ. 14Nabiinu yɩra pɔɔrɩ je təri təri mʋ, sɩ kʋ daɩ jəgə dɩdʋa yɩranɩ. 15Naga na tagɩ ka wɩ, kantʋ daɩ jɩŋa, kʋntʋ ŋwaanɩ yɩra yam ba te-ka, kʋntʋ b'a sɩɩnɩ kʋ pa ka taa tɔgɩ ka təri yɩra yam wʋnɩ. 16Zwɛ dɩ nan na wɩ, dɩntʋ daɩ yi, sɩ yɩra yam ba te-dɩ, kʋntʋ b'a sɩɩnɩ kʋ pa dɩ taa tɔgɩ dɩ təri yɩra yam wʋnɩ. 17Yɩra yam maama nan ya na yɩ yi yɩranɩ mʋ, ya'a kɩ ta mʋ ya taa ni taanɩ? Ya nan ya na yɩ zwɛ yɩranɩ mʋ, ya'a kɩ ta mʋ ya taa ni lwəm? 18Kʋ nan yɩ Wɛ mʋ kɩ je sɩm dwi təri təri DƖ kɩ yɩra yam wʋnɩ, kʋ maŋɩ dɩ DƖ wʋbʋŋa na lagɩ te tɩn. 19Ya maama nan ya na yɩ yɩra yam jəgə dɩdʋa mʋ, ya'a kɩ ta mʋ ya ji yɩra? 20Kʋntʋ tɩn, je dwi təri təri mʋ wʋra, yɩ sɩ maama laan yɩ yɩra dɩdʋa. 21Kʋntʋ ŋwaanɩ, yi b'a wanɩ dɩ ta dɩ jɩŋa nɩ dɩ ba lagɩ-ka, naa yuu ta dɩ naga nɩ kʋ ba lagɩ-ka. 22A lagɩ a ta cɩga mʋ dɩ abam nɩ, dɩbam yɩra yam je sɩlʋ d'ɩ na bʋŋɩ nɩ sɩ tiini sɩ bwənə tɩn jɩgɩ kuri zanzan. 23D'ɩ yɩra yam je sɩlʋ d'ɩ na bʋŋɩ nɩ sɩ ba tiini sɩ jɩgɩ kuri tɩn mʋ d'ɩ yəni d'ɩ zuli lanyɩranɩ. Je sɩlʋ na jɩgɩ cavɩɩra tɩn, mʋ d'ɩ yəni d'ɩ fɔgɩ d'ɩ kwəli-sɩ lanyɩranɩ. 24Kʋ daarɩ ya je sɩlʋ na lana tɩn, d'ɩ daa ba fɔgɩ d'ɩ nii sɩ baŋa nɩ. Wɛ mʋ kɩ nabiinu yɩra yam je sɩm maama DƖ kɩ daanɩ, yɩ DƖ paɩ je sɩlʋ na gɛ zulə tɩn na zulə lanyɩranɩ. 25Kʋntʋ ŋwaanɩ kampwara təri yɩra yam wʋnɩ. Ya je sɩm maama zəni daanɩ mʋ. 26Kʋ na cana yɩra yam daa kalʋ nɩ, yɩra yam maama w'ʋ tɔgɩ ya na cam dɩm kʋntʋ doŋ mʋ. Kʋ daarɩ daa kalʋ na nɛ zulə tɩn, yɩra yam maama dɩ w'ʋ tɔgɩ ya na wʋpolo mʋ. 27Abam maama yɩ Zezi Krisi yɩra yam mʋ, yɩ 'a dɩdʋa dɩdʋa yɩ o je sɩm dwi təri təri mʋ. 28Kʋntʋ tɩn, Zezi kɔgɔ kʋm wʋnɩ, Wɛ kɩ nɔɔnʋ maama o jəgə nɩ mʋ. Dayigə tɩn yɩ Zezi tɩntʋŋna bam o tɩtɩ na lɩ tɩn mʋ. Wɛ nijoŋnə bam maa saŋɩ. Balʋ na kɩ bɩtɔ tɩn maa yɩ balʋ na brɩ Wɛ cɩga kam tɩn. Kʋ wəli dɩ balʋ na kɩ wo-kɩnkagɩla tɩn, dɩ balʋ Wɛ na pɛ-ba dam sɩ ba ta maa paɩ yawɩɩna naɩ yazurə tɩn, dɩ balʋ na zəni nɔɔna tɩn, dɩ balʋ na nii Wɛ tɩtʋŋa yam baŋa nɩ tɩn, dɩ balʋ Wɛ Joro kʋm na paɩ ba ŋɔɔnɩ ta-gɛ tɩn. 29Kʋ nan daɩ nɩ d'ɩ maama mʋ yɩ Zezi tɩntʋŋna balʋ o tɩtɩ dɛɛn na lɩ tɩn, kʋ daɩ d'ɩ maama mʋ yɩ Wɛ nijoŋnə, naa d'ɩ maama mʋ brɩ Wɛ cɩga kam. Kʋ nan daɩ nɩ d'ɩ maama mʋ waɩ d'ɩ kɩ wo-kɩnkagɩla. 30Kʋ nan daɩ d'ɩ maama mʋ Wɛ pɛ dam sɩ d'ɩ ta'a ma paɩ yawɩɩna naɩ yazurə, naa d'ɩ maama mʋ Wɛ Joro kʋm pɛ d'ɩ ŋɔɔnɩ ta-gɛ, naa d'ɩ maama mʋ waɩ d'ɩ lwarɩ sɩ kuri d'ɩ brɩ nɔɔna. 31Nan kwaanɩ-na sɩ 'a joŋi Wɛ-pɛɛra yalʋ na jɩgɩ kuri kʋ ja gaalɩ tɩn. Kʋ daarɩ, a nan lagɩ a brɩ abam woŋo kʋlʋ na tiini kʋ lana kʋ dwe dɩdɩ tɩn mʋ.

will be added

X\