Yebɛrɛfa 8

1Nkãy too pãã tɛr, lii le ma yĩŋ, loo ne nde: Yãhã Yũndefa Yĩŋfua wii syi u ma wo ye, u ma u nii yãhãyĩŋ na, Yãhã niisayũhũ kãndigi kuɛ ye, Yãhã gii ke ma kai- byɛ yĩŋ na. 2U u Yãhã Yũndefa Yĩŋfua tẽn tẽ Yãhã fla wo. Faale wo, Yãhã yũndefa naa pe tẽn tẽ fai nwonge wo, nawee- pe ke gbihi. Yesu tuu -sẽ u tẽn tẽ na, cĩĩnde fla kẽ ke ma yãhãyĩŋ na. Yãhã kẽ ke koo fla gbihi. 3Pe Yãhã yũndefa yĩŋfa byɛ ta pe n naa diŋ yi, ma naa wãn boo Yãhã kẽ. Wo Yãhã Yũndefa Yĩŋfua bya yai u waha naa ngaa wãã Yãhã kẽ. 4Yesu ma ne pye driyɛ̃ nge wo, u saa ne pye gɛ pye Yãhã yũndefua ye. Yãhã yũndefa mpãy ma wa; pe diŋ yi Yãhã kẽ, ma maha wãn boo ke kẽ, mii Yiifee- wãlɛ kãnde le yar mii. 5Nwoŋ gii pe Yãhã tẽn tẽ ke wo, ke gbihi mii ke yãhãyĩŋ nwoŋ dyaŋ, koo sẽ -sẽ kẽ ke cĩĩnde yãhãyĩŋ nwoŋ ye. Ye sẽ yãã, driyɛ̃ nge Yãhã yũndefa tẽn ma mii Musa wĩĩ dyaŋ. Yaliile wo Musa bii yee woo ga fai nwonge gbihi, Yãhã bii u yar ma yee: "Tẽ naa kii ter syi yar ma na ke yãŋ yĩŋ na, ke nwonge fãã koo syi." Le yĩntaha kẽ, fai nwonge gii Musa bii fãã, ke ba pye kaa yirfua dyaŋ ke ma yãhãyĩŋ na. 6Yagaa, Yesu taha tẽn lii na, le tɛr poo tẽn yaha, le sẽ n tãn gɛ tãn ye. Naambiyãrfãn tii te ma yagaa Yãhã nsoho wo nawee- ne, te yɔ̃ faale wãn na. Yesu woo kẽ, u ma kusyiifua. Ye sẽ yãã, Yãhã ke yɛ̃ tɛr kaplãŋ nkãy ne yagaa naambiyãr wo, ke yɔ̃ ma tɛr faale naambiyãr kaplãŋ yaha. 7Faale naambiyãr ma ne pye te ga waha nawee- sya yaha, naambiyãrfãn taa saa ne pye te ta yagaa te faale wãn draha wo ye. 8Faale naambiyãr cãã na, nawee- sẽ bii pe kapee- wãpyeŋ miy yaha ye. Yãhã n le kuãn pe ye ma yee: "Tẽ bii naambiyãr tii le Yuda terfa ne, ma suhu pe Yiisrɛfa ter byɛ ne, pe too naambiyãr pye klaha-. Loo ne, ta n kur waa pe na. Cãã gaa ma ke n pai, n ga ba naambiyãrfãn taa le pe kur kuɛ pii ne. Too naambiyãrfãn nde saa ba pye te faale wãn syi dyaŋ ye. Faale wo, n bii pe wãlɛ sya yaha yãmpar koho wo Syipte kãntraha wo, ma dur ma pe yigi yi ke kãntraha wo, ma ba te naambiyãr le pe ne. N ga ba naambiyãrfãn taa le pe kur kuɛ pii ne, te saa ba pye wãcɛŋ pe faale wãlɛ wãn ne ye. Ndoo pe Yĩŋfua Yãhã kẽ, tẽ yee ke syi. 10Yãhã n maha yee: Too plii nde kur ye, n ma ba dur, ma yĩntaha sroŋ pe ne, n ga ba te naambiyãrfãn le pe ne yĩŋ gii na, ke nge: N ga ba ra kaplãŋ le pe kacãn wo, n ga ba ke yrũhũ yaha pe laam wo. N ga ba nii pe Yãhã, pe n -sẽ nii ra nawee-. 11Waa saa ba yee, u ga u nampyeŋ klaha u n Yĩŋfua cã ye. Ye sẽ yãã, pe byɛ ga ba ra cã, ma gbe pe kicaabir na ma ga waa pe wãlɛ na. 12Lii le -sẽ ma yĩŋ koo ngĩĩ byɛ na, loo ne nde: N ga ba pe kapee- gbe kãã pe yĩŋ na. Kapee- nkãy pe pye tɛr, n ga ta, ke wĩĩ n faha ra na ta kuãŋ ne." 13Yãhã ke ke naambiyãrfãn wĩĩ pãã ke syi, le nii mii, ke ke faale naambiyãr ta kadyaha. Ye -sẽ cã, kla gii ma nii kadyaha, ke lɛ, ke wãkuaŋ ya ke kuee.

will be added

X\