TAITUS 1

1Min Pɔɔl, m ye Uwumbɔr aatutuln, ki ye Yesu Kristo aakpambal, ke m ter Uwumbɔr aah lee binib bi na ke bin gaa u ki kii ki bee waabɔr ti gbii na. Waabɔr ngbaan ter bi la, ke bi li bi waah ban pu na. 2Waabɔr pu le bi kpa limakl ke bi ga li kpa limɔfal li kaa kpa ndoon na. Uwumbɔr u kaa mɔni inyaamɔn na, uma le nan puu tipuul n-yaayoonn na, ke u ga tii timi limɔfal ngbaan. 3Naah ŋeer na le u kpiir limɔfal ngbaan aabɔr waaliin ponn ni. U di waaliin ngbaan, ki di ŋa ŋŋaal ni, ki tuk mi ke m li chuun mooni i. Uma le ye timi Aaŋmaŋmardaan. 4M bi ŋmee kigbaŋ kee m tii si Taitus. Aa ye maabo bamɔnn; ba pu? m ni si kpaani ki gaar Yesu ki kii la. Tite Uwumbɔr ni Yesu Kristo u ye timi Aaŋmaŋmardaan na ŋa tinyoor ki ŋa aa pu, [ki san si kinimbaak,] ki tii si nsuudoon. 5Tɔ, m cha aa bee Krete aatiŋ ni ke aa tun lituln li kaa kee tun na, ki lee binib bi ga li ye Yesu aanib aaninkpiib ntim mɔmɔk ponn ni na. 6Aa lee bijab bi kaa kpa taani ubaa, ki kpa upii ubaabaa, ki kpa mbim bi gaa Yesu ki kii, kaa ŋani bakaa, kaa ye tafalaaŋundam na. 7Uwumbɔr aanib bi baaninkpil aaŋaal ni la, nima pu na le ni ŋan ke u taa li kpa taani ubaa, ki taa li tun uma ubaa aageehn, ki taa li ye liŋuuldaan, ki taa li ye udaagbiir, ki taa gbaa binib; unimbil taa li man pempem aamombil pu. 8Ni ŋan ke u li ye unii u channi bicham tichann na, ki li gee lituln li ŋan na, ki li kpa laasab, ni mbimbin nyaan, ki li bi chain, ki li chur ubaa, 9ki li joo taah nan tuk u tibɔnyaan ti ye Uwumbɔr aabɔr bamɔnn na, aan u mɔk binib mmɔkm mu ŋan na, ki pɔɔk bitaakpab, ki len tibɔr ki nyaŋ binib bi kpak u kinikpakpak na. 10Ba pu? binib pam le bi ki ye tafalaaŋundam, ki len tibɔr yool yool, ki ŋmanni binib. Juu yaab ponn ni bibaa le ŋani kena ki jer biken. 11Ni ŋan ke aa cha bin ŋmin; ba pu? bi mɔk binib mmɔkm mu kaa ba ye bi mɔk bi na, ki cha ŋidichal ŋibaa ponn ni aanib mɔmɔk yenn. Ŋimombil pu, le bi ŋani kena. Naa ŋan. 12Krete aatiŋ aanib ponn ni ubaa, u nan ye ulankpal na, nan bui ke, "Krete aatiŋ aanib le ye binyamɔndam n-yoonn mɔmɔk. Bi naahn ipeel i kaa ŋan na. Bi ye bigbanyakdam, ki ye bipuusaakpendam." 13Waah len pu na ye mbamɔn la. Nima pu na, kae bi mbamɔm, aan bi li dii Yesu aasan chub, 14ki taa gar Juu yaab aatiin, ki taa gar binib bi yii Uwumbɔr aabɔr na aamɔkm. 15Binib bi bi chain na, tiwan mɔmɔk bi chain le ki tii bi. Binib bi kaa bi chain, kaa gaa Yesu ki kii na, tiwan nibaa aa bi chain le ki tii bi. Baalandak mu aa ŋan. Baa ki nyi lituln li ŋan na, ni li kaa ŋan na. 16Bi len ke bi nyi Uwumbɔr, le baah tun pu na, nima le mɔk ke baa nyi u. Uwumbɔr nan baah ŋani pu na la. Baa kii waamɔb. Baa ŋma tun lituln nyaan libaa.

will be added

X\