1 Nima pu na Uwumbɔr aan len ke binib bi kpaan Yesu Kristo chee na aabɔr bii. 2 Taah kpaan Yesu Kristo chee na, le Uwumbɔr Aafuur nyaan aapɔɔn tii timi limɔfal; Mfuur nyaan aapɔɔn ngbaan le nyan mi titunwambir ni nkun aapɔɔn ni. 3 Nkaal aa ŋma ŋa kena; ba pu? binib aa kpa mpɔɔn bin joo nkaal ngbaan. Le Uwumbɔr ŋa waakaal aa kaa ŋma ŋa pu na; timi aatunwambir pu le u nan tun ni Ujapɔɔn Yesu dulnyaa wee ni, ke un yoor tiwon ti naahn timi titunwambirdam aawon na, le ki bii titunwambir ti bi tisui ni na aapɔɔn, 4 le ki tii timi bi dii Waafuur nyaan kaa ki dii mbimbikpok na mpɔɔn ke ti li dii waakaal mbamɔm. 5 Binib bi dii mbimbikpok na, bitafal bi mbimbikpok aabɔr ni la. Binib bi dii Uwumbɔr Aafuur nyaan na, bitafal bi Mfuur nyaan aabɔr ni la. 6 Binib bi aatafal bi mbimbikpok aabɔr ni na ga kpo la. Binib bi aatafal bi Uwumbɔr Aafuur nyaan aabɔr ni na ga kan limɔfal ni nsuudoon la. 7 Binib bi aatafal bi mbimbikpok aabɔr ni na, bi ye Uwumbɔr aadim la; ba pu? baa dii waakaal, ki mu aa ŋma dii mu. 8 Binib bi dii mbimbikpok aah ban pu na, baan ŋma piir Uwumbɔr aasui. 9 Tɔ, Uwumbɔr Aafuur nyaan yaa bi ni ni kan, naa dii mbimbikpok aah ban pu na, ni dii Mfuur nyaan aah ban pu na la. Kristo Aafuur nyaan yaa kaa bi unii ni kan, udaan aa ye Kristo yoo. 10 Titunwambir pu, le nimi aawon ga kpo. Kristo yaa bi ni ni kan, Uwumbɔr Aafuur nyaan tii nimi limɔfal; ba pu? u len ke nimi aabɔr ŋan. 11 Uwumbɔr nan fikr Yesu nkun ni. Un fikr Yesu nkun ni na Aafuur nyaan yaa bi ni ni kan, uma Uwumbɔr u fikr Yesu Kristo nkun ni na ga fikr nimi aawon ti ga kpo na mu. Waafuur nyaan mu bi ni ni na aapɔɔn pu, le u ga fikr nimi. 12 Nnaabitiib, nima pu na, ni ŋan ke ti dii Uwumbɔr Aafuur nyaan aah ban pu na, ki taa dii mbimbikpok aah ban pu na. 13 Ni yaa dii mbimbikpok aah ban pu na kan, ni ga kpo la. Ni yaa kuln nimi aawon aatunwambir Uwumbɔr Aafuur nyaan aapɔɔn pu kan, ni ga li kpa limɔfal li kaa kpa ndoon na aamɔɔn. 14 Binib bimɔk dii Uwumbɔr Aafuur nyaan aah ban pu na, bima le ye Uwumbɔr aabim. 15 Mfuur nyaan mu Uwumbɔr tii nimi na, mu aa joo nimi tinaagbiir ke ni san ijawaan. Waafuur nyaan le ŋa nimi waabim, le ki cha ti yi u ke "Nte." 16 Waafuur nyaan le kpaan timi aawiin chee, le ki ŋani siiraa ke ti ye Uwumbɔr aabim. 17 Taah ye Uwumbɔr aabim na, ti ga kan Uwumbɔr aah di tiwan nyaan ni ki di bil kiir timi paacham na. Ti ni Kristo ga kpaan kan tiwan nyaan ngbaan. Ti yaa ji falaa u pu kan, ti ni u ga kpaan kan lisil paacham. 18 M bee ke dandana aafalaa aa ŋaŋ mpopiin mu ti ga kan mu paacham na. 19 Tiwan ni Uwumbɔr naan ni na mɔmɔk aanimbil man ke ni kan bundaln Uwumbɔr ga kpiir waabim na. 20 Buyoonn Adam nan tun titunwambir na, Uwumbɔr nan len ke tiwan ni u naan ni na, ni ga li bi, ki bi fam la. Waageehn pu, le u len kena. Naa ye tiwan ni u naan ni na aageehn. 21 Uwumbɔr mu tii ni limakl ke ni ga ŋa tiwan ni kaan bur na, ki kan lifuur nyaan ke Uwumbɔr aabim aah kan pu na. 22 Ti bee ke dulnyaa mɔmɔk wu ke imalween aah wu pu na, ki du ki nan saa dandana. 23 Naa ye dulnyaa baanja le wu; timi bi Uwumbɔr puen tii timi Waafuur nyaan njan na, ti mu du tisui ni, ki kii bundaln Uwumbɔr ga mɔk ke ti sil ye waabim, ki ga tii timi tiwon ti kaan kpo na. 24 Taah ŋmar pu na, le ti kpa limakl. Unii yaa kpa limakl ke u ga kan tiwan kan, ni ŋmɔk ke waa kee kan la. U yaa kan ni kan, waan ki li kpa limakl ni pu. 25 Tɔ, ti yaa kpa limakl ke ti ga kan tiwan ni tinimbil aa waa ni na kan, le ti ga li kpa limɔr ki kii bundaln ti ga kan ni na. 26 Le Uwumbɔr Aafuur nyaan ter timi, timi aadabur ni. Taa nyi taah ga mee u mbamɔm pu na. Le Waafuur nyaan mee u ki tii timi, ki du, ubaa aah kaa ŋma len pu na. 27 Uwumbɔr, u lik binib aasui ni aah bi pu na, u bee Waafuur nyaan aalandak aah bi pu na; ba pu? Mfuur nyaan mee u ki tii waanib waah ban pu na. 28 Ti bee ke tiwan nimɔk pii timi na, Uwumbɔr cha ni mɔmɔk kpaln tiwan ni ŋan na ki tii binib bi gee u na. Waageehn pu le u nan yin bi. 29 U nan nyi binib bimɔk ga kii tii u na, le ki nan lee bi, ke bi li kpaln Ujapɔɔn Yesu Kristo aah bi pu na, aan u li ye njan aabo naabitiib pam ponn ni. 30 Binib bi Uwumbɔr lee bi na, le u yin bi. Binib bi u yin bi na, le u len ke baabɔr ŋan, le ki nyuŋ bi. 31 Uwumbɔr aah ŋa kena na mɔmɔk, ti ga len kinye? Uwumbɔr aah si tichaŋ ni na, ubaa aan ŋma ŋa timi nibaa. 32 Waa yii ke waan tii timi Ujapɔɔn. U nan di Ujapɔɔn di ŋa binib aaŋaal ni ke un ti kpo ti mɔmɔk aatunwambir pu la. Waah tii timi Ujapɔɔn na, u ga ki tii timi tiwan mɔmɔk ki kpee. 33 Ŋmaa ga ŋma galn Uwumbɔr aanileekaan? Uwumbɔr ubaa len ke baabɔr ŋan. 34 Nima le ubaa aan ŋma galn timi. Yesu Kristo nan kpo ti pu, ki fikr nkun ni, ki bi Uwumbɔr aaŋaaŋgii wɔb, ki mee u ki tii timi. 35 Ba ga ŋma nyan timi Kristo u gee timi na aaŋaal ni? Falaa aa? Tibɔr aa? Limukl aa? Nkon aa? Igiin aa? Linimaln aa? Kpaacha aa? Aayii. 36 Ni ŋmee Uwumbɔr Aagbaŋ ni ke "Kristo pu le bi ku timi iwiin mɔmɔk. Bi len ke ti ye ipiih i bi ga kɔr i na la." 37 Tɔ, Yesu Kristo u gee timi na aapɔɔn pu, le ti nyaŋ falaa umina mɔmɔk. 38 Tidindaan Yesu Kristo pu, le Uwumbɔr gee timi. M sil bee ke nibaa aa bi ki ga ŋma yakr ti ni waageehn. Nkun, limɔfal, Uwumbɔr aatuuntiib, Kinimbɔŋ aapɔɔn, dandana aabɔr, daalbaadaal aabɔr, mpɔɔn, paacham aawan, taab aawan, tiwan nimɔk bi na, ni mɔmɔk aan ŋma yakr ti ni Uwumbɔr aageehn.
