ROM YAAB 7

1Nnaabitiib, ni mɔmɔk bee nkaal aah bi pu na la. Le ni ga bee maah ga len pu na aatataa. Nkaal dii unii buyoonn u bi na baanja la. U yaa kpo kan, nkaal aa ki dii u. 2Nkaal pu, le upii u kpa chal na ye uchal yoo n-yoonn mumɔk uchal bi na. Uchal yaa kpo kan, nkaal mu len ke u ye uchal yoo na, mu aa ki dii u. 3Upii yaa kpaan uja uken chee buyoonn uchal bi na kan, bi ga len ke u ye upiidaagoor la. Uchal yaa kpo kan, nkaal ngbaan aa ki dii u. U yaa mɔn uja uken kan, waa ye upiidaagoor. 4Nnaabitiib, nimi aabɔr mu bi kena la. Kristo aah nan kpo ndɔpuinkoo pu na, ni mu nan kpo; nkaal aa ki dii nimi. Ni kpaan Kristo u fikr nkun ni na chee la, aan ni dii Uwumbɔr aasan. 5Taah kaa nan dii Uwumbɔr buyoonn na, tisui nan gee Uwumbɔr aakaal aah kɔ pu na, ki cha ti tun titunwambir ki dii nkun aasan. 6Dandana wee, taah kpo na, nkaal na aa ki dii timi, ki mu aa ki joo timi tinaagbiir. Le Uwumbɔr Aafuur nyaan tii timi mbimbipɔɔn ke ti tun lituln ki tii Uwumbɔr. Nkaal na aa ki joo timi. 7Nima pu na ti ga len kinye? Moses aakaal aa ŋan aa? Mu ŋan. Nkaal na yaa kaa ba bi kan, maa ba ga bee titunwambir. Nkaal na yaa kaa ba len ke "Taa kpa iniman" kan, maa ba ga bee ke iniman ye titunwambir. 8Nkaal aah len kena na, le titunwambir ti bi nsui ni na yii nkaal ngbaan, le ki cha m kpa iniman aaboŋ aaboŋ. Nkaal yaa kaa bi kan, ni naahn ke titunwambir mu aa bi. 9N-yoonn mbaa m nan bi, kaa bee nkaal aatataa mbamɔm. Buyoonn m bee nkaal aatataa mbamɔm na, le titunwambir fikr nsui ni. Le m bee ke m ŋeer nkun. 10Uwumbɔr nan tii timi waakaal ke ti dii mu, aan ki kan limɔfal. Le m bee ke maah kaa ŋma joo waakaal mɔmɔk na, m ŋeer nkun. 11Nkaal pu, le titunwambir ti bi nsui ni na nan kpa nsan aan ki ŋmann mi, ki cha m ŋeer nkun. 12Uwumbɔr aakaal bi chain la. Uwumbɔr aah tuk timi ke ti ŋa pu na le bi chain, ki bi mbamɔm, ki ŋan. 13Waakaal mu ŋan na le ku mi ii? Aayii. Titunwambir le ku mi. Nkaal mu ŋan na pu, le titunwambir ku mi, aan ti bee ke titunwambir aa ŋan. Nkaal na le mɔk timi titunwambir aah bir saakpen pu na. 14Ti bee ke Uwumbɔr aakaal mɔk timi Uwumbɔr aah ban pu na. M mu aa ŋani kena; ba pu? m ye titunwambir aanaagbiija la. 15Maah ŋani pu na, maa kii kena nsui ni. Maah kaa gee ke m ŋani na, m ŋani nima la. Maah nan tiwan ni na, nima le m tee ŋani. 16M yaa ŋani maah kaa gee ke m ŋani na kan, nima le mɔk ke m kii ke Uwumbɔr aakaal ŋan. 17Naa ye ke min le ŋani kena, titunwambir ti bi nsui ni na le cha m ŋani. 18M bee ke tiwan ni ŋan na aa bi maabimbikpok ni; m ban ke m tun lituln li ŋan na, kaa ŋma tun. 19Maah ban m tun lituln nyaan li na, maa tun kena. Maah kaa ban m tun titunwambir ti na, m tun tima la. 20M yaa tun maah kaa gee m tun pu na kan, naa ye ke min le tun kena, titunwambir ti bi nsui ni na le cha m tun. 21Naah ye pu na, m yaa ban m tun lituln li ŋan na kan, titunwambir bi m chee la. 22M gee Uwumbɔr aakaal nsui ni la. 23M mu kan nkaal muken maawon ni. Nkaal ngbaan jaa Uwumbɔr aakaal mu bi nsui ni na kijaak la. Nima le titunwambir aakaal ti bi maawon ni na joo mi tinaagbiir la. 24M kpa kinimbaak la. Titunwambir bi tiwon tee ni, ki ga ku mi la. Ŋmaa ga nyan mi titunwambir ngbaan ni? 25M dooni Uwumbɔr pam, Tidindaan Yesu Kristo pu, le u nyan mi. Mma kan, maalandak baanja le dii Uwumbɔr aakaal. Maabimbikpok dii titunwambir aakaal la.

will be added

X\