ROM YAAB 3

1Lichakpangee kpa tinyoor la aa? Juu yaab jer bin kaa ye Juu yaab na aa? 2Een, bi jer bi tiwan aaboŋ ni la. Ni jer tiwan mɔmɔk na le ye ke Uwumbɔr nan di waaliin ki di ŋa biŋaal ni. 3Bi ponn ni bibaa yaa kaa gaa Uwumbɔr ki kii kan, ni ye ba? Baah kaa gaa u ki kii na, Uwumbɔr aan gbiin waa puu tipuul ti na aa? 4U ga gbiin ti la. Binib mɔmɔk yaa ye binyamɔndam kan, Uwumbɔr ye mbamɔndaan la. Ni ŋmee waagbaŋ ni ke "Bi ga kan ke waah len pu na, ni ŋan. U yaa jin bi tibɔr kan, u ga nyaŋ bi la." 5Timi aatunwambir yaa mɔk ke Uwumbɔr ŋani ni ŋan na kan, ti ga len ke Uwumbɔr yaa daa titafal kan, u ŋa ni kaa ŋan na aa? (Bin kaa dii Uwumbɔr na le baa kena.) 6U ŋa ni ŋan na la; ba pu? ni yaa kaa ŋan kan, u ga ŋa kinye ki ji dulnyaa aanib tibɔr? 7Ubaa ga baa ke "Maah gee nnyaamɔn na yaa mɔk ke Uwumbɔr ye mbamɔndaan ki ga cha binib nyuŋ u kan, ba ŋa u daa ntafal ke m ye titunwambirdaan?" 8Ti ga tun titunwambir aan ni kpaln tiwan ni ŋan na aa? Aayii. Binib bibaa sii timi ki bui ke ti len kena la. Binib ngbaan ga kan ntafadaan baah ŋeer pu na. 9Naah bi pu na, timi Juu yaab ŋan ki jer bin kaa ye Juu yaab na aa? Aayii. M nan mɔk nimi ke bin ye Juu yaab na, ni bin kaa ye Juu yaab na mɔmɔk ye titunwambirdam la. 10Ni ŋmee kena le Uwumbɔr Aagbaŋ ni ke "Unii ubaa aa ye uninyaan, 11ubaa aa bee Uwumbɔr, ubaa aa ban Uwumbɔr, 12bi mɔmɔk di cha waasan la, bi mɔmɔk bee yooli la. Ubaa aa bi ki tun lituln li ŋan na. 13Baaliin po ye iliin i bir na la. Bi geei inyaamɔn ki ŋmanni binib la. Baaliin bii binib ke ujagen aaluul aah bii binib pu na. 14Baamɔi gbiin ŋisiibil ni kinanaŋ la. 15Bi ban bin ku binib kan, naa pɔɔ. 16Bi muk binib ki ŋani bi falaa n-yoonn mɔmɔk la. 17Bi chuun ban tibɔr la. 18Baa san Uwumbɔr." 19Tɔ, ti bee ke nkaal aah len pu na mɔmɔk, mu len binib bi bi mu chee na. Nima le dulnyaa aanib mɔmɔk aabɔr bii Uwumbɔr chee. Ubaa aan ŋma len tibaa ke un nyan ubaa tibɔr ni Uwumbɔr chee. 20Ubaa aan ŋma len ke waah joo Uwumbɔr aakaal mbamɔm pu na, waabɔr ŋan Uwumbɔr chee. Uwumbɔr aakaal le mɔk binib ke bi ye titunwambirdam la. 21Dandana wee Uwumbɔr mɔk timi waah ga ŋa pu ki len ke timi aabɔr ŋan na. Waakaal ni waabɔnabtiib aaliin le bi waagbaŋ ponn ni, ki mu tuk timi kena la. Naa ye ke ti dii waakaal mbamɔm la le cha u len. 22Binib bimɔk gaa Yesu Kristo ki kii na, bima le Uwumbɔr len ke baabɔr ŋan. Baah gaa Yesu Kristo ki kii na, nima le cha Uwumbɔr len ke baabɔr ŋan. Ubaa aa bi ubaa ki cha biken; 23binib mɔmɔk tun titunwambir la, kaa gbiin Uwumbɔr aanimbil. 24Le Yesu Kristo daa timi, ki gaa timi lii. Timi bi kpaan u chee na, le Uwumbɔr len ke timi aabɔr ŋan. Waabulchin pu le u len, naa ye ke ti ŋan la. 25U nan di Yesu siin binib aanimbil ni, ke u nan kpo, aan uma Uwumbɔr taa ki gee liŋuul ti pu. Ti yaa gaa Yesu ki kii kan, waasin pu le Uwumbɔr ga di cha pinn timi. Nima le mɔk ke Uwumbɔr ŋani ni ŋan na; ba pu? u nan kpa limɔr, kaa bii binib bi tun titunwambir buyoonn Yesu Kristo aa kee dan dulnyaa wee ni na. 26Dandana wee nima le mɔk ke Uwumbɔr yaa len ke binib bi gaa Yesu ki kii na aabɔr ŋan u chee kan, Uwumbɔr ŋan. 27Naah bi pu na, ubaa ga ŋma nyu baalaa ke u ŋan aa? Aayii. Ba pu? Naa ye ke ti tun lituln li ŋan na le cha ti ŋmar. Ti gaa Yesu ki kii le ki ŋmar. 28Nima pu na le ti bee ke ti yaa gaa Yesu ki kii kan, Uwumbɔr ga len ke timi aabɔr ŋan. Naa ye ke ti joo waakaal mbamɔm le cha u len. 29Uwumbɔr ye Juu yaab baanja Aawumbɔr la aa? Waa ye bin kaa ye Juu yaab na mu Aawumbɔr aa? Een, u ye. 30Uwumbɔr ye Uwumbɔrbaan la. Juu yaab yaa gaa Yesu ki kii kan, Uwumbɔr ga len ke baabɔr ŋan. Bi mu kaa ye Juu yaab na yaa gaa Yesu ki kii kan, Uwumbɔr ga len ke baabɔr ŋan. 31Ti yaa len ke binib yaa gaa Yesu ki kii bi ga ŋmar kan, ti ŋa Uwumbɔr aakaal yooli ii? Aayii. Ti ŋa mu tibɔrkpaan la.

will be added

X\