ROM YAAB 2

1Tɔ, si u galn binib biken na, saan ŋma len tibaa ki nyan aabaa tibɔr ni Uwumbɔr chee; ba pu? aa mu ŋani kena la. Saah galn bi na, le ni mɔk ke saabɔr mu bii; ba pu? si u galni bi na, aa mu ŋani kena la. 2Ti nyi ke Uwumbɔr yaa daa binib bi ŋani kena na aatafal kan, ni ŋan. 3Si u ŋani kena na, le ki galni biken bi ŋani kena na, aa dak ke Uwumbɔr aan daa aatafal aa? 4U ŋa si tibulchin saakpen a, ki kpa limɔr ni suklaa aa pu. Aa lik u fam aa? Saan nyi ke Uwumbɔr ban ke aa kpeln saabimbin aa? Nima le cha u ŋa si tibulchin. 5Le aatafal pɔɔ. Saa ban ke aa kpeln aasui. Nima le Uwumbɔr ga moo daa aatafal, bundaln u ga gee liŋuul binib aanimbil ni ki ji bi tibɔr mbamɔm na. 6U ga ŋa binib mɔmɔk baatuln aah ŋeer pu na. 7Binib bi kpa limɔr ki tun lituln li ŋan na, ki ban mpakm ni nnyuŋ ni limɔfal li kaa kpa ndoon na, bima le Uwumbɔr ga tii bi limɔfal li kaa kpa ndoon na. 8Binib bi ban tibɔr, ki yii mbamɔn, ki dii nsan mu kaa ŋan na, bima le Uwumbɔr gee liŋuul saakpen bi pu. 9Binib bimɔk tun titunwambir na, bi ga kan falaa ni limukl. Njan le Juu yaab ga kan. Bin kaa ye Juu yaab na mu ga kan. 10Binib bimɔk tun lituln li ŋan na, Uwumbɔr ga nyuŋ bi, ki pak bi, ki tii bi nsuudoon. U ga tii Juu yaab njan, ki ga tii bin kaa ye Juu yaab na mu; 11ba pu? Uwumbɔr aa pak ubaa ki jer uken. 12Binib bimɔk kaa nyi Moses aakaal ki tun titunwambir na, baan kan limɔfal li kaa kpa ndoon na. Uwumbɔr aan baa bi ke bi dii Moses aakaal aan baa dii. Binib bimɔk nyi Moses aakaal ki tun titunwambir na, Uwumbɔr ga baa bi tibɔr nkaal ngbaan aah dii pu na, ki ga daa bitafal. 13Uwumbɔr aan len ke binib bi nyi waakaal kaa dii mu na aabɔr ŋan. U ga len ke binib bi dii waakaal na le aabɔr ŋan. 14Bin kaa ye Juu yaab na, baa nyi Moses aakaal. Bi yaa ŋani Moses aakaal aah len pu na baageehn pu, ki mu aa nyi nkaal ngbaan kan, baalandak le mɔk bi baah ga dii pu na. 15Baah ŋani pu na, nima le mɔk ke Moses aakaal aah len pu na bi bisui ni la. Bisui ponn ni, bi nyi ni ŋan na, ni ni kaa ŋan na. Nima le baalandak bii bi n-yoonn mbaa, ki pak bi n-yoonn mbaa mu. 16Ni ga li bi kena bundaln Uwumbɔr ga cha Yesu Kristo ji binib tibɔr, ki baa bi tibɔbɔrkaan ti bi bisui ni na aabɔr na. Maah tuk binib tibɔnyaan ti na, le mɔk kena. 17Tɔ, aa len ke aa ye Juu aanii la, ki dak ke saah nyi Moses aakaal na, nima le ga cha aa ŋmar; aa nyu baalaa ke aa nyi Uwumbɔr, 18ki nyi waah gee pu na, ki bee ni ŋan na, ni ni kaa ŋan na, ki bae Moses aakaal, 19ki dak ke aa ye usanmɔkr le ki tii bijoom, ki ga ŋma woln bin kaa likr na aanimbil, 20ki ga ŋma mɔk bijɔrb nlan, ki ga ŋma mɔk mbim mmɔkm. Saah nyi Moses aakaal mu na, aa dak ke aa nyi tiwan mɔmɔk, ki dak ke saah len pu na mɔmɔk ye mbamɔn. 21Tɔ, si u mɔk biken na, ba ŋa saa mɔk aabaa? Si u tuk binib ke bi taa su kinaayuk na, ba ŋa aa su? 22Si u len ke binib taa gɔr kidaagook na, ba ŋa aa gɔr? Si u yii ŋiwaa na, ba ŋa saa tee pak Uwumbɔr? 23Si u kpa kipupuk Uwumbɔr aakaal pu na, saah bii nkaal ngbaan pu na, saa pak u. 24Ni ŋmee Uwumbɔr Aagbaŋ ponn ni ke "Nimi Juu yaab aah ŋani titunwambir pu na, nima le cha bin kaa ye Juu yaab na sii Uwumbɔr." 25Tɔ, aa yaa joo Moses aakaal kan, lichakpangee kpa tinyoor. Aa mu yaa gii lichakpaln ki bii Moses aakaal kan, ni bi ke saa gii la. 26Bin kaa gii ŋichakpan na yaa joo Uwumbɔr aakaal kan, Uwumbɔr aan yii bi, ke baa gii ŋichakpan. 27Binib bi kaa gii ŋichakpan na yaa joo Uwumbɔr aakaal kan, bi ŋan ki jer nimi Juu yaab bi gii ŋichakpan Moses aakaal aah mɔk pu na, ki bii nkaal muken na. 28Unii u ye Juu aanii mpaan pu baanja na, waa ye Juu aanibamɔnn. Unii u gii lichakpaln kaa kpeln usui na, naa ye lichakpangee bamɔnn. 29Unii u gii lichakpaln, kaa kpeln usui na, waa piir Uwumbɔr aasui. Unii u dii Uwumbɔr usui ni na, uma le ye Juu aanibamɔnn. Unii u Uwumbɔr Aafuur nyaan bi u ni na, nima le ye lichakpangee bamɔnn. Uwumbɔr le ga pak udaan, naa ye binib.

will be added

X\