ROM YAAB 14

1Tɔ, unii u gaa Yesu ki kii, ki mu aa bee waasan mbamɔm na, ni gaa u man. Ni mu taa kpak u kinikpakpak waah joo beeni na pu. 2Ubaa ga pak ke tijikaar tibaa aa kɔ. Unii u kaa bee Yesu aasan mbamɔm na ga li kɔ tinann. 3Unii u kaa kɔ tijikaar tibaa na, u taa lik unii u kɔ tinann na fam. Un kɔ tinann na mu taa galn un kaa kɔ tijikaar tibaa na; ba pu? Uwumbɔr gaa u la. 4Aa ye ŋmaa ki galn uken aatutuln? U yaa sil kan, u sil ki tii uma ubaa Aadindaan la. U yaa ti ki lir kan, u lir ki tii uma ubaa Aadindaan la. Ni ye mbamɔn, u ga sil; ba pu? Tidindaan Uwumbɔr ga ŋma cha u sil. 5Unii ubaa pak nwiin mbaa ki jer iken la. Ubaa mu len ke iwiin mɔmɔk kpaan la. Cha unii mɔmɔk bee waah dak pu na, ki li ŋani kena. 6Unii u pak nwiin mbaa ki jer iken na, u pak mu ki tii Tidindaan la. Unii u kaa pak nwiin mbaa ki jer iken na, u ŋa kena ki tii Tidindaan la. Un kaa kɔ tijikaar tibaa na, u ji ti ki tii Tidindaan la; ba pu? u dooni Uwumbɔr le ki nin ji. Un kɔ tijikaar tibaa na, waa ji ti, ki tii Tidindaan, ki mu dooni Uwumbɔr. 7Unii ubaa aa bi ki tii ubaa. Ubaa mu aa kpo ki tii ubaa. 8Ti yaa bi kan, ti bi ke ti li pak Tidindaan la. Ti yaa kpo kan, ti kpo ke ti li pak Tidindaan la. Nima pu na ti yaa bi kan, ti yaa kpo kan, Tidindaan le yeh timi. 9Kristo nan kpo ki fikr nkun ni, ke u li ye binib bi kpo na, ni bin fu na mu Aadindaan. 10Sin, ba ŋa aa galn aana aabo? Sin, ba ŋa aa lik aana aabo fam? Ti mɔmɔk ga sil Uwumbɔr aanimbiin ni, le u ji timi tibɔr. 11Ni ŋmee ke Tidindaan Uwumbɔr len ke ni ye mbamɔn, binib mɔmɔk ga gbaan unimbiin ni, ki kpiir baatunwambir ki tuk u. 12Nima pu na ti mɔmɔk ga tuk Uwumbɔr taah ŋa pu na. 13Nima pu na ti taa ki galni tɔb. Ni li nyi ki taa leŋ nina aabo Uwumbɔr aasan ni. 14Maah kpaan Tidindaan Yesu chee na, le m sil bee ke tiwan nibaa aa kɔ nibaa pu. Unii mu yaa dak ke tiwan nibaa kɔ kan, ni kɔ u chee la. 15Aa yaa ji tijikaar ti kɔ aana aabo chee na, ki bii usui kan, naa ye ke aa gee u le cha aa ŋa kena. Kristo le nan kpo u pu. Aa taa ŋa u fam saajikaar pu. 16Ni taa ŋani tiwan ni ga cha binib bii nimi aasan nyaan. 17Uwumbɔr aanaan aa ye tijikaar ni tiwanyukaan. Mu ye mbimbin nyaan ni nsuudoon ni mpopiin, Waafuur nyaan aah tii timi pu na. 18Unii u dii Kristo ki bi kena na, u ga piir Uwumbɔr aasui. Binib mu ga pak u. 19Nima pu na ni li pɔɔni nibaa aan ki li kpaan kimɔbaan, aan ki ter tɔb bin dii Uwumbɔr aasan mbamɔm. 20Ni taa bii Uwumbɔr aatuln tijikaar pu. Tijikaar tibaa aa kɔ. Aa mu yaa ji tijikaar ti ga bii uken aasui na kan, nima le aa ŋan. 21Ni ŋan ke aa taa kiir aana aabo Uwumbɔr aasan ni; ni taa ŋma kitork aanann, ki taa nyu ndaan, ki taa ŋa tiwan nibaa ni ga cha aana aabo tun titunwambir ki lir na. 22Aa yaa kɔ tijikaar tibaa kan, aa yaa kaa kɔ tibaa kan, cha ni li bi aa ni Uwumbɔr chee. Unii u ji tijikaar ti waa kɔ ti na, kaa galni ubaa na, u kpa mpopiin la. 23Unii u beeni ki ji na, waabɔr bii la; ba pu? u ji ti, kaa pak ke ni ŋan. Unii yaa kaa pak ke tiwan ŋan kan, ki ŋani kan, ni ye titunwambir la.

will be added

X\