1 Min Pɔɔl le ŋmee kigbaŋ kee. M ye Yesu Kristo aatutuln la. Uwumbɔr nan yi mi ke m le ye Yesu aakpambal, ki lee mi ke m moon waabɔnyaan tee. 2 N-yaayoonn na Uwumbɔr nan puu tipuul ke u ga tii timi tibɔnyaan tee. Le waabɔnabtiib ŋmee ti waagbaŋ ki ye chain na ponn ni. 3 Tibɔnyaan tee le ye Ujapɔɔn Tidindaan Yesu Kristo aabɔr. Waah kpaln unibɔn na, bi ma u Ubɔr David aamaal ponn ni. 4 Uwumbɔr nan fikr u nkun ni, ki cha u tii timi Waafuur nyaan. Nima le mɔk ke u ye Uwumbɔr Aajapɔɔn u kpa mpɔɔn na. 5 U pu le Uwumbɔr ŋa tinyoor ki ŋa m pu, le ki ŋa mi waakpambal, ke m tuk ŋinibol mɔmɔk ke ni ŋan ke bin gaa u ki kii, ki kii waamɔb, ki nyuŋ u. 6 Nimi bi bi Rom aatiŋ ni na, Uwumbɔr yi ni mu, ke ni li ye Yesu Kristo aanib. 7 Nima le m ŋmee kigbaŋ kee m tii nimi bimɔk bi Rom aatiŋ ni na. Uwumbɔr gee nimi ki yi nimi ke ni li ye waanib. Tite Uwumbɔr ni Tidindaan Yesu Kristo ŋa tinyoor ki ŋa ni pu, ki tii nimi nsuudoon. 8 Yesu Kristo pu, le m dooni Maawumbɔr ni mɔmɔk pu; ba pu? dulnyaa aanib mɔmɔk ŋun naah gaa Yesu Kristo ki kii pu na. 9 M di nsui mɔmɔk ki tun lituln ki tii Uwumbɔr ki tuk binib Ujapɔɔn Yesu Kristo aabɔnyaan tee. Uma Uwumbɔr le nyi ke ni ye mbamɔn, m teer nibɔr maameen mɔmɔk ponn ni, 10 ki mee u n-yoonn mɔmɔk ke ni yaa ye waageehn kan, un tii mi nsan ke m buen ki ti mann nimi dandana wee. 11 M ban ke m kan nimi, ki ter nimi ni kan Uwumbɔr Aafuur nyaan aapiin i ga pɔɔk nitaakpab na. 12 Maah len pu na le ye ke m ni nimi aah gaa Yesu Kristo ki kii pu na, ti ga pɔɔk tɔb aataakpab la. 13 Nnaabitiib, m ban ke ni bee ke n-yoonn mɔmɔk m nan ban ke m dan ni chee, le kaa kee ŋma dan. M ban ke m ŋa ni mu tinyoor, ke maah ŋa bin kaa ye Juu yaab na biken mu tinyoor pu na. 14 Ni ye telai la, ke m di tibɔnyaan tee ki tuk binib mɔmɔk, biyaanimbil woln na, ni biyaanimbil kaa woln na, ni bin bae mbaen na, ni bin kaa bae mbaen na. 15 Nima le m ban ke m tuk nimi bi bi Rom aatiŋ ni na mu tibɔnyaan tee. 16 M kpa kipupuk Kristo aabɔnyaan tee pu. Tibɔnyaan tee kpa Uwumbɔr aapɔɔn la. Binib bimɔk ŋun ti ki gaa Yesu Kristo ki kii na ga ŋmar, bin ye Juu yaab na njan, ni bin kaa ye Juu yaab na mu. 17 Tibɔnyaan tee mɔk timi ke unii ubaa yaa gaa Yesu Kristo ki kii kan, Uwumbɔr ga len ke waabɔr ŋan la. Ni ŋmee Uwumbɔr Aagbaŋ ni ke "Unii yaa gaa Uwumbɔr ki kii kan, Uwumbɔr ga len ke waabɔr ŋan. Nima le u ga kan limɔfal." 18 Uwumbɔr mɔk binib ke u gee liŋuul titunwambirdam pu; bi tun lituln li kaa ŋan na kaa dii u. Baabiin pu le bi yii mbamɔn. 19 Uwumbɔr gee liŋuul bi pu la; ba pu? waabɔr ti binib ga ŋma bee ti na, ti bi mpaan pu. Uwumbɔr le di ti ki mɔk bi. 20 Buyoonn Uwumbɔr nan naan dulnyaa wee ki nan saa dandana wee na, le binib kan waabimbin aah bi pu na. Naa ye ke binimbil kan u. Bi kan tiwan ni u naan ni na la, ki kan ke u kpa mpɔɔn mu kaan doo na, ki sil ye Uwumbɔr. Nima le baan ŋma len ke baa nyi. 21 Bi nyi ke u bi, ki mu aa nyuŋ u waah ŋeer pu na, ki mu aa dooni u waaterm pu. Nima le baalandak bi yooli. Bisui ni bɔɔn la, kaa kpa nlan. 22 Bi len ke bi ye bilankpalb, ki tee ye bijɔrb la. 23 Baa ki dooni Uwumbɔr u nyuun ki bi n-yoonn mu kaa kpa ndoon na. Bi ŋa binibɔm aanaŋ, ni inyoon aanaŋ, ni iwaa aanaŋ, ki dooni ŋiwaa ngbaan. 24 Nima le Uwumbɔr cha bi, le bi dii bisui aah ban pu na, ki tun tijɔŋ aatuln, ki tun lituln li jinni baawon inimɔɔn na. Bi yii Uwumbɔr u ye mbamɔn na, ki dii ŋiwaa la. 25 Bi dooni tiwan ni Uwumbɔr naan ni na, ki dii ni, kaa dooni Uwumbɔr u naan tiwan mɔmɔk na, kaa dii u. Uma le yeh mpakm n-yoonn mu kaa kpa ndoon na. Amii. 26 Baah yii Uwumbɔr na, nima le u cha bi. Le bi tun inimɔɔn aatuln, bisui aah ban pu na. Bipiib di biŋeen aatɔtiib ki di kpaln bijab, ki doon bi chee la. 27 Bijab mu yii bipiib, ki chuun ban bijab, ki di biŋeen aatɔtiib ki kpaln bipiib ki doon bi chee. Le Uwumbɔr daa bitafal, baatuln aah ŋeer pu na, le ki cha iween chuu bi. 28 Baah kaa gee ke bi li nyi Uwumbɔr na, le u cha bi. Le bi dak ilandak i ye yooli na, ki tun lituln li kaa ŋan na, 29 ki gbii titunwambir aaboŋ mɔmɔk. Bi gɔr kidaagook ki tun bakabaka, ki kpa iniman, kaa gee tɔb, ki kpa lipiipoln, ki jaa kijaak, ki ku tɔb, ki ŋmanni tɔb, ki nan tɔb, ki bii tɔb libɔɔl ni, 30 ni mpaan pu. Bi nan Uwumbɔr, le ki seei tɔb, ki kpa kalmbaani, ki nyu baalaa. Bi po dak baah ga ŋa pu ki moo tun titunwambir na. Bi yii bite ni bina aamɔi. 31 Baa kpa nlan. Bi yaa puu tipuul kan, baa gbiin ti. Baa gee baamaal aanib, kaa cha pinn binib, kaa san binib kinimbaak. 32 Bi bee ke Uwumbɔr len ke binib bi ŋani kena na, bi ŋeer nkun la. Le bi tee beenin ŋani kena, le ki len ke binib yaa ŋani kena kan, naa bir.
