TIBƆKPIIRKAAN 8

1Le Upihbo ngbaan chuu dabr ndam lulule. Le Uwumbɔr do ŋmin chii chii le ni yunn siib. 2Le m kan Uwumbɔr aatuuntiib bilule bi si Uwumbɔr aanimbiin ni na. Le Uwumbɔr tii bi kaakaan mam bilule. 3Le Uwumbɔr aatuun uken dan nan sil kitork aabimbiln chee, ki ŋub salmaa aasambil li bi jɔ tubalee ŋani li ponn ni na. Le bi tii u tubalee saakpen un di kpee Uwumbɔr aanib mɔmɔk aameen pu, ki di ŋa salmaa aabimbiln li bi Uwumbɔr aabɔrjal aanimbiin ni na paab, ki di tii Uwumbɔr. 4Le tubalee ngbaan aabaan, ni Uwumbɔr aanib aameen nyan Uwumbɔr aatuun ngbaan aaŋaal ni, ki fii paacham Uwumbɔr aanimbiin ni. 5Le Uwumbɔr aatuun ngbaan di mmii mu bi kitork aabimbiln pu na ki di gbiin tubalee aasambil ngbaan, le ki di mee dulnyaa wee ponn ni. Le kifuuk faa, le utaal tar le ki moor, le kitiŋ deŋ. 6Le Uwumbɔr aatuuntiib bilule bi ŋub kaakaan mam bilule na gor bin pii. 7Le Uwumbɔr aatuun njan yoo pii waakaakaan. Waah pii waakaakaan na, le ŋitaatakpabil ni mmii ni nsin ŋmar tɔb ponn ni ki nyan paacham le ki lir ni kitiŋ. Le mmii gaa kitiŋ ligeln taatar, ni isui mu ŋigen taatar, ni timoosɔnn mɔmɔk. 8Le Uwumbɔr aatuun leeler mu pii waakaakaan. Le bi di tiwan ni naahn lijool li gaar mmii na, ki di mee nnyusaakpem ponn ni. Le nnyun ngbaan ligeln taatar kpaln nsin. 9Le tiwan nimɔk bi nnyun ligeln taatar ngbaan ponn ni na kpo. Iŋɔi ŋigen taatar mu bii a. 10Le Uwumbɔr aatuun taatar mu pii waakaakaan. Le liŋmabil saakpeln li gaar mmii ke limɔfifil na nyan paacham ki lir ŋimɔɔ ŋigen taatar ponn ni, ni inyumbun ŋigen taatar ponn ni. 11Liŋmabil ngbaan aayimbil le ye Ni To. Le laah lir nnyun ni na mu aageln taatar kpaln nnyun mu to na. Le binib pam kpo nnyun ngbaan pu; ba pu? mu to. 12Le Uwumbɔr aatuun naanar mu pii waakaakaan. Le nwiin ligeln taatar chuu gii bɔln. Uŋmal ligeln taatar, ni iŋmabi ŋigen taatar mu chuu gii bɔln. Le nwiin ligeln taatar aa wiin. Kinyeek ligeln taatar mu aa wiin. 13Le m kan libɔrwiin laani paacham, ki ŋun li teen mpɔɔn pu, "Uwumbɔr aatuuntiib bitaa bi gur kaa kee pii baakaakaan na, bi yaa pii kan, tibɔbil saakpeln ga lir dulnyaa aanib pu."

will be added

X\