TIBƆKPIIRKAAN 6

1Kigbaŋ ki bi nan dab mfim mulule na, le m kan Upihbo ngbaan chuu dabr nibaa. Le m ŋun tiwanfuurkaan ninaa ngbaan ponn ni nibaa len ke utaal aah teeni pu na ke "Dan." 2Le m lik ki kan utaapiin. Un dik u pu na joo butɔm. Le bi tii u lifulmaln un di chiŋ. Le u buen un ti nyaŋ binib, ki sil ti nyaŋ bi. 3Le Upihbo ngbaan nan chuu dabr kigbaŋ aadam leeler. Le m ŋun tiwanfuurkaan leeler len ke "Dan." 4Le utaaman mu fuu ni. Le Uwumbɔr tii un dik utaaman pu na kpaacha saakpiin, ki tii u mpɔɔn ke u cha dulnyaa aanib to butɔb ki ku tɔb. 5Le Upihbo ngbaan chuu dabr ndam taatar. Le m ŋun tiwanfuurkaan taatar len ke "Dan." Le m lik ki kan utaanbɔn. Un dik utaanbɔn pu na le joo tiwan ni bi joo ŋaŋni tijikaar na uŋaal ni. 6Le m ŋun nneel len tiwanfuurkaan ninaa ngbaan aakaasisik ni ke "Tijikaar taa li wiir, taadaak li pɔɔ. Tɔ, taa bii nkpan ni ŋisubil aawanyukaan." 7Le Upihbo ngbaan chuu dabr ndam naanar. Le m ŋun tiwanfuurkaan naanar aaneel len ke "Dan." 8Le m lik ki kan utaanyɔnyɔn. Un dik u pu na aayimbil ye Nkun. Un bi yi u Kitekpiitiŋ na mu dii u. Le Uwumbɔr tii bi mpɔɔn bin di kpaacha, ni nkon, ni iween, ni ipeel, ki ku dulnyaa aanib lipepel naanar yaab. 9Le Upihbo ngbaan chuu dabr ndam ŋmuŋmur. Le m kan binib aawiin kitork aabimbiln taab Uwumbɔr do. Bi ye binib bi bi nan ku bi na. Bi nan dii Uwumbɔr aaliin, ki tuk binib Yesu aabɔnyaan. Nima le cha bi ku bi. 10Le binib ngbaan aawiin teen mpɔɔn pu, "Tidindaan u ye chain ki ye mbamɔn na, ni ga yunn ki ti saa kinye pu aan aa ga ji dulnyaa aanib bi ku timi na aabɔr ki daa bitafal?" 11Le Uwumbɔr peen bi mɔmɔk tikparpipiin, ki bui bi ke u siin ke binib ku bitutuŋeen aatɔtiib mɔmɔk bi dii Yesu na, ke baah nan ku bi pu na. Bi li fuur siib ki nan saa n-yoonn ngbaan. 12Le m kan Upihbo ngbaan chuu dabr ndam luluub. Le kitiŋ deŋ saakpen. Le nwiin bɔln ke tikumbubɔln na. Le uŋmal mann ke nsin na. 13Iŋmabi nyan ni paacham ki lir kitiŋ ke kibuŋ aah ker ŋisubil ŋi kuur na ki lir pu na. 14Kitaapaak kpab ki buen ke baah kpai kikaapeek pu na. Le ŋijoo ni ŋiyik mɔmɔk fii nyan. 15Le dulnyaa aayidam ni bibɔrb ni sujatiib aayidam, ni biwankpadam ni bipɔɔndam, ni binaagbiib mɔmɔk, ni bimalb mɔmɔk, bi bɔr titakpaluln ni, ni ŋitakpal saakpiin taab ŋijoo paab, 16ki bui ŋijoo ni ŋitakpal, "Lir ti pu, ki biin ti pu, Uwumbɔr u ka libɔrjal pu na taa li waa timi, Upihbo ngbaan aaŋuul taa pii timi; 17ba pu? baaŋuul aawiin saakpiin daal fuu ni a. Ŋmaa ga ŋma sil?"

will be added

X\