TIBƆKPIIRKAAN 5

1Le m kan Uwumbɔr u ka libɔrjal pu na ŋub kigbaŋ uŋaaŋgii ni. Kigbaŋ ngbaan kpa ŋŋmeen ŋipepel mɔmɔk, ki dab ŋimɔgbiln mfim mulule. 2Le m kan Uwumbɔr aatuun mpɔɔndaan len mpɔɔn pu, "Ŋmaa ŋeer un dabr kigbaŋ ngbaan ki kpar ki?" 3Le baa kan unii ubaa paacham ni kitiŋ, ni kitiŋ aataab, u ga ŋma kpar kigbaŋ ngbaan ki lik ki ponn ni na. 4Baah kaa kan unii u ŋeer un kpar kigbaŋ ngbaan ki lik ki ponn ni na, nima pu na le m wii pam. 5Le bininkpiib ponn ni ubaa bui mi, "Taa ki wii. Lik, Yesu u pɔɔ ke uchinn, ki ye Juda aanibol aanii ubaa, ki ye Ubɔr David aayabil na, uma le nyaŋ, ki ga ŋma dabr kigbaŋ ki bi dab ki mfim mulule na, ki kpar ki." 6Le m kan Upihbo si libɔrjal, ni tiwanfuurkaan ninaa, ni bininkpiib aakaasisik ni. Upihbo ngbaan kpa libuel uneen ni ke baah kɔr u le na, ki kpa iyiin ilule ni ŋinimbil ŋilule ŋi ye Uwumbɔr Aafuur nyaan mulule mu Uwumbɔr tun ni mu ni kookoo dulnyaa wee ni na. 7Le Upihbo ngbaan buen Uwumbɔr u ka libɔrjal pu na chee, ki ti gaa kigbaŋ ngbaan uŋaaŋgii ni. 8Waah gaa kigbaŋ na, le tiwanfuurkaan ninaa ngbaan, ni bininkpiib moninko ni binaa ngbaan, nan gbaan unimbiin ni. Bi mɔmɔk gbaa tibar, ki joo salmaa aasambil ŋi gbii tubalee na. Tubalee ngbaan si Uwumbɔr aanib aameen aasisiiyaan. 9Le bi gaa ilahnpɔɔn ki tii Upihbo ngbaan: "Si le ŋeer aa gaa kigbaŋ ngbaan ki dabr ki; ba pu? aa nan kpo ki di saasin ki daa binib ki tii Uwumbɔr; ki nyan bi ŋitimbol mɔmɔk aanib bi bi dulnyaa wee ni ki len iliin imɔk bi dulnyaa wee ni na, 10Aa ŋa bi saanaan ni aanib, bin ti tun lituln ki tii timi Aawumbɔr, le bi ga ji nnaan dulnyaa mɔmɔk ni." 11Le m lik ki kan Uwumbɔr aatuuntiib ŋichur ŋichur, kaa ti nyi baakahm. Bi si gob Uwumbɔr aabɔrjal ni tiwanfuurkaan ni bininkpiib ngbaan. 12Le m ŋun bi mɔmɔk len mpɔɔn pu: "Upihbo u bi nan kɔr u na le ŋeer un kan yiko, ni liwankpal, ni nlan, ni mpɔɔn, ni nnyuŋ, ni mpakm, ni idoon." 13Le m ŋun bin bi paacham na, ni bin bi kitiŋ na, ni bin bi kitiŋ aataab na, ni tiwan nimɔk bi nnyusaakpem ni na, ni Uwumbɔr aah naan tiwan nimɔk na, m ŋun bi mɔmɔk len ke "Uwumbɔr u ka libɔrjal pu na, ni Upihbo ngbaan, bima le yeh mpakm, ni lisil, ni nnyuŋ, ni mpɔɔn, n-yoonn mu kaa kpa ndoon na." 14Le tiwanfuurkaan ninaa ngbaan le kii ke "Amii." Bininkpiib ngbaan mu gbaan Uwumbɔr ni Upihbo ngbaan aanimbiin ni ki dooni bi.

will be added

X\