TIBƆKPIIRKAAN 21

1Le m kan paacham pɔɔn, ni kitiŋ pɔɔn; le njan aapaacham, ni njan aatiŋ jer a. Nnyusaakpem mu aa ki bi. 2Le m kan kitinyaan, ki ye Jerusalem pɔɔn na, nyan ni Uwumbɔr chee paacham, ki gor ke usaapɔɔn u ban un kun uchal do na aah gor ubaa pu na. 3Le m ŋun nneel saakpiin libɔrjal ngbaan chee len ke "Lik, Uwumbɔr do bi binib chee, le u ga li bi bi chee. Bi ga li ye waanib. Uma ubaa ga li bi bi chee ki ga li ye Baawumbɔr, 4ki ga per bi tinyunyunn mɔmɔk. Nkun aan ki li bi; mpombiin mu aan ki li bi; iwiil mu aan ki li bi; iween mu aan ki li bi; ba pu? tiwankpok mɔmɔk jer a." 5Le un ka libɔrjal ngbaan pu na len ke "Lik, m ŋa tiwan mɔmɔk ni pɔɔn." Le Uwumbɔr aatuun len ke "Ŋmee kena; ba pu? iliin imina ye mbamɔn, ki ga sil ŋa kena." 6Le un ka libɔrjal pu na bui mi, "Ni ŋa kena la. Min le ye Alfa ni Omega, mpiin ngbaan ni ndoon ngbaan. Unii umɔk nnyunyun chuu u na, m ga tii u limɔfal aanyun, le waan pa nibaa. 7Unii umɔk nyaŋ na ga li yeh tiwan mɔmɔk. M ga li ye Waawumbɔr; u mu ga li ye maabo. 8Le bijawaandam, ni binib bi kaa gaa mi ki kii na, ni tijɔŋdam, ni binikurb, ni bidaagoob, ni bibɔɔb, ni biwaadam, ni binyamɔndam mɔmɔk, bi ga li bi cheribir aamii ni. Nima le ye leelee aakun." 9Le Uwumbɔr aatuuntiib bilule bi joo kookoo aafalaa bilule ŋisambil ŋilule ponn ni na, bi ponn ni ubaa dan m chee ki bui mi, "Dan m nan mɔk si Ubɔndinn u ye Upihbo ngbaan aapuu na." 10Le Uwumbɔr Aafuur nyaan fir m pu. Le Uwumbɔr aatuun ngbaan yoor mi ki di buen lijool saakpeln li fɔk na paab, le ki mɔk mi Jerusalem aatiŋ ki ye chain na nyan ni Uwumbɔr chee paacham, 11ki kpa waanyaan, ki wiin chain ke lichachatakpal li ye chain na aah wiin pu na. 12Ligoln saakpeln li fɔk na mann gonn kitiŋ ngbaan, ki kpa ibisamɔb kipiik ni ilee. Uwumbɔr aatuuntiib ponn ni kipiik ni bilee mu si ibisamɔb ngbaan mɔmɔk chee. Israel yaab aanibol kipiik ni ŋilee aayimbil ŋmee ibisamɔb kipiik ni ilee ngbaan mɔk pu. 13Ibisamɔb itaa bi liwipuul wɔb, itaa mu bi ŋŋaaŋgan, itaa mu bi ŋŋaaŋgii, itaa mu bi liwilir wɔb. 14Ligoln ngbaan kpa ŋidinyik kipiik ni ŋilee. Upihbo Yesu aakpambalb kipiik ni bilee aayimbil ŋmee ŋidinyik ngbaan mɔk pu. 15Uwumbɔr aatuun u len m chee na joo salmaa aadaabil un ti ŋaŋ ki lik kitiŋ ngbaan aah wiir pu na, ki ŋaŋ ki lik ligoln aabisamɔb aah waa pu na, ki ŋaŋ ki lik ligoln mu aah fɔk pu na. 16Kitiŋ ngbaan ye likpakpann la. Ŋipepel mɔk ŋinaa aah waa pu na, ni ŋak la. Le u di lidaabil ngbaan ki ŋaŋ ki lik kitiŋ ngbaan aah wiir pu na. Le ŋipepel mɔk ŋinaa ye mal ŋichur kipiik ni ŋilee, ki mu fɔk kena la. 17Le u ŋaŋ ki lik ligoln aapepeen. Ni ye ŋisaŋ nkub ni imonko ilee ni ŋinaa, binib aah ŋaŋni ŋisaŋ pu na; le Uwumbɔr aatuun ngbaan ŋaŋ kena. 18Bi nan di litakpal nyaan bi yi li ke jaspa na, ki maa ligoln ngbaan. Kitiŋ ngbaan ye salmaa u bi chain na, ki wiin ke kinimbilik ki bi chain na. 19Ligoln ngbaan aadinyik ye ŋitakpal nyaan mɔk aaboŋ. Njan aatakpal ngbaan ye litakpal nyaan bi yi li ke jaspa, lileeler ye litakpal nyaan bi yi li ke safair, litaatar ye litakpal nyaan bi yi li ke aget, linaanar ye litakpal nyaan bi yi li ke emerald, liŋmuŋmur ye litakpal nyaan bi yi li ke sadoniks, liluluub ye litakpal nyaan bi yi li ke kanelian, lilulule ye litakpal nyaan bi yi li ke krisolait, lininiin ye litakpal nyaan bi yi li ke beril, liwewae ye litakpal nyaan bi yi li ke topas, kipiik ye litakpal nyaan bi yi li ke krisopras, kipiik ni libaa ye litakpal nyaan bi yi li ke jasint, kipiik ni ŋilee ye litakpal nyaan bi yi li ke ametist. 21Le ibisamɔb kipiik ni ilee ngbaan ye ŋitakpal nyaan kipiik ni ŋilee bi yi li ke pael; i mɔmɔk ye litakpal nyaan ibaabaa. Kitiŋ ngbaan ponn ni aasan ye salmaa u bi chain ki naahn kinimbilik ki bi chain na. 22Maa kan Uwumbɔr aadichal kitiŋ ngbaan ponn ni; ba pu? Tidindaan Uwumbɔr u yeh mpɔɔn mɔmɔk na, ni Upihbo ngbaan bi kitiŋ ngbaan ponn ni, le binib dooni bi. 23Kitiŋ ngbaan aa ban nwiin ni uŋmal li wiin ki ponn ni; ba pu? Uwumbɔr aah wiin pu na woln ki ponn ni. Kaakaryaa ye Upihbo ngbaan la. 24Kaawiin ga woln ŋinibol aanib pu, ke bin chuun. Dulnyaa aabɔrb ga li joo ni baawan nyaan ki ponn ni. 25Kitiŋ ngbaan aagoln aabisamɔb kipiik ni ilee aan piin nwiin pu. Kinyeek aan li bi nima. 26Ŋinibol aanib ga li joo ni baawan nyaan ki ponn ni. 27Tiwan ni kpa tijɔŋ na nibaa aan koo ki ponn ni. Binib bi dii ŋiwaa na, bi ponn ni ubaa aan koo ni. Binib bi mɔn inyaamɔn na, bi ponn ni ubaa aan koo ni. Binib biyaayimbil ŋmee Upihbo ngbaan aamɔfal aagbaŋ pu na baanja le ga koo ni.

will be added

X\