TIBƆKPIIRKAAN 20

1Le m kan Uwumbɔr aatuun nyan ni paacham ki ŋub libuul li nyoo kaa kpa limɔk na aajaaleŋ aasaafii, ni tikululn saakpeln uŋaal ni. 2Le u chuu kipeewambiik ngbaan u ye Kinimbɔŋ na, bi yi u ke Uwaa u por na, ki ki yi u ke Defil, le ki di tikululn ngbaan ki di buu u, 3ki di ŋa libuul ngbaan ni ki di biin, ki laŋ a, ke u li bi ni ponn ni ŋibin lichur libaa, u taa ki ŋmanni binib ki ti saa buyoonn ŋibin lichur libaa ngbaan ga jer na. N-yoonn ngbaan aapuwɔb, see bin chuu buur u ki di lii ni yunn siib. 4Le m kan ŋibɔrjal, ni bin ka ŋi pu na. Le Uwumbɔr tii bi nsan ke bin ji binib tibɔr. Bin ka ŋi pu na ye binib bi nan kpo Yesu pu na. Binib nan ku bi; ba pu? bi moon Uwumbɔr aaliin, ki len binib aanimbil ni ke bi dii Yesu. Baa dii upeel ngbaan ni waawaal, kaa gaa waadaan biyigbeer pu bee biŋaal pu. Le bi ki kan limɔfal ki jin nnaan Kristo chee ŋibin lichur libaa. 5Bima le ye binib bi puen fikr nkun ni na. Bitekpiib bi gur na aan ki kan limɔfal ki nan saa buyoonn ŋibin lichur libaa ngbaan ga jer na. 6Binib bi puen fikr nkun ni na kpa mpopiin, ki bi chain. Baan ki kpo leelee. Bi ga tun lituln ki tii Uwumbɔr ni Kristo, ki ga ji nnaan u chee ŋibin lichur libaa. 7Ŋibin lichur libaa ngbaan yaa jer kan, Uwumbɔr ga cha bi nyan Kinimbɔŋ kiyondiik ni ki lii. 8Le u ga buen ki ti ŋmann ŋinibol ŋimɔk bi dulnyaa wee mɔmɔk ni na, ki ti kuun bi mɔmɔk bin ti to butɔb. Ŋinibol ngbaan aayidaan le ye Gog, u nyan Magog aatiŋ ni na. Bi wiir ke nnyusaakpem aatambol aah wiir pu na, 9ki chuun gbii dulnyaa aapepel mɔmɔk, le ki si gob Uwumbɔr aanib aah bi kitiŋ ki ponn ni na. Uwumbɔr gee kitiŋ ngbaan la. Le mmii nyan ni Uwumbɔr do ki wun bi mɔmɔk. 10Le Uwumbɔr chuu Kinimbɔŋ u ŋmann bi na, le ki di ŋa cheribir aamii ni, upeel ngbaan ni waabɔnabr aah bi nin chee na. Le bi ga ji falaa nwiin pu ni kinyeek, n-yoonn mu kaa kpa ndoon na. 11Le m kan libɔrjal pipiin saakpiln, ni un ka li pu na. Le kitiŋ ni paacham san nyan u chee, kaa ki bi. 12Le m kan bitekpiib, bin ye bipɔɔndam ni bin ye biwaatiib na, si libɔrjal ngbaan aanimbiin ni. Le u kpar tigbann, le ki kpar kigbaŋ kiken ki ye limɔfal aagbaŋ na, le ki jin bitekpiib tibɔr, baabɔr aah bi tigbann ngbaan ponn ni pu na, baah nan tun pu na. 13Le bitekpiib mɔmɔk nyan kitekpiitiŋ ni, ki si nima; bin bee nnyusaakpem ponn ni na, bi mu nyan ki si nima. Le u jin bi mɔmɔk tibɔr baatuln aah ye pu na. 14Le u di nkun ni kitekpiitiŋ ki di ŋa mmii saakpiin ponn ni. Mmii ngbaan le ye leelee aakun. 15Le bi di binib bimɔk aayimbil kaa ŋmee limɔfal aagbaŋ ni na, ki di bi ki di ŋa mmii ngbaan ponn ni.

will be added

X\