TIBƆKPIIRKAAN 2

1"Ŋmee kigbaŋ ki tii maanib bi bi Efesus aatiŋ ni na aatuun ke min Yesu u joo iŋmabi ilule ngbaan ŋŋaaŋgii ni na, ki chuun salmaa aakaryaa bilule aakaasisik ni na, le len tibɔr timina: 2M nyi naah tun lituln linimaln pu na, ki nyi naah kpa limɔr pu na, ki nyi ke ni yii biŋmaŋmannim, ke ni lik binib bi ŋmann ke bi ye maakpambalb kaa ye na aabimbin aah bi pu na, ki bee ke bi ye biŋmaŋmannim la. 3Ni kpa limɔr la. M pu, le ni ji falaa, kaa bakl. 4Tɔ, m mu galn nimi; ba pu? naa ki gee mi ke naah nan gee mi njan pu na. 5Teer man naah nan bi pu na kaa ki bi kena dandana wee na, ki kpeln nimi aabimbin man, ki ki li ŋani ke naah nan ŋani njan pu na. Ni yaa kaa kpeln nimi aabimbin kan, m ga dan ni chee ki chuu nyan nimi aakaryaa ngbaan, le naan ki li ye maanib. 6Tɔ, ni mu nan Nikolas aanib aah tun pu na. Naah nan baatuln na, nima le ŋan; m mu nan baah tun pu na. 7"Un kpa litafal na kan, un ŋun Uwumbɔr Aafuur nyaan aah tuk maanib pu na. "Unii umɔk nyaŋ na, m ga cha u moo limɔfal aasubil ŋi bi Uwumbɔr do na, bi yi nima chee Paradais. 8"Ŋmee kigbaŋ ki tii maanib bi bi Smina aatiŋ ni na aatuun ke min Yesu u ye mpiin ngbaan ni ndoon ngbaan, ki nan kpo ki ki fikr na, le len tibɔr timina: 9M nyi naah ji falaa saakpen pu na, ki ye bigiim pu na; ni mu ye biwankpadam le Uwumbɔr chee. M nyi binib bibaa aah sii nimi pu na. Bi len ke bi ye Juu yaab, le kaa ye; bi ye Kinimbɔŋ aanib la. 10Ni ga ji falaa dandana wee; ni taa san ijawaan man. Kinimbɔŋ ga di ni ponn ni bibaa ki di ŋa kiyondiik ni, aan ni kan ntɔŋ. Ni ga ji falaa ni yunn siib, Uwumbɔr aah siin pu na. Ni li dii maasan mbamɔm ki nan saa nkundaal man. Le m ga tii nimi lipal li ye limɔfal li kaa kpa ndoon na. 11"Un kpa litafal na kan, un ŋun Uwumbɔr Aafuur nyaan aah tuk maanib pu na. "Unii umɔk nyaŋ na, waan kan leelee aakun. 12"Ŋmee kigbaŋ ki tii maanib bi bi Pegamum aatiŋ ni na aatuun ke min Yesu u joo kpaacha u kaar ŋipepel mɔmɔk ŋilee na, le len tibɔr timina: 13M nyi naah bi nin chee na, ke ni bi kitiŋ ki ye Kinimbɔŋ aatiŋ na ponn ni la. Ni mu beenin sil nchaŋ ni la, kaa yii mi. Buyoonn bi nan ku maasiiraadaan bamɔnn Antipas nikaasisik ni, Kinimbɔŋ aah bi nin chee na, naa nan yii mi. 14Tɔ, m mu galn nimi tibɔr tibaa pu. Ba pu? Ni ponn ni bibaa joo Balaam aamɔkm, u nan tuk Ubɔr Balak waah ga ŋa pu ki tɔŋ Israel yaab bin ti ŋman libaawol aanann, ki gɔr kidaagook, aan Uwumbɔr daa bitafal. 15Binib bibaa bi ni ponn ni mu, ki ŋani kena, ki dii Nikolas aanib aamɔkm kena. 16Nima pu na, kpeln nimi aabimbin man. Ni yaa kaa kpeln nimi aabimbin kan, m ga fuu ni mala, ki di maaliin i bi ke kpaacha na ki bii binib ngbaan. 17"Un kpa litafal na kan, un ŋun Uwumbɔr Aafuur nyaan aah tuk maanib pu na. "Unii umɔk nyaŋ na, m ga tii u tijikaar nyaan paacham, bi yi ti ke mana, ki ga tii u litakpapiln li liyimbipɔln ŋmee li pu na. Ubaa aan li nyi liyimbipɔln ngbaan; un gaa li na baanja le ga li nyi. 18"Ŋmee kigbaŋ ki tii maanib bi bi Tiataira aatiŋ ni na aatuun ke min Uwumbɔr Aajapɔɔn u kpa ŋinimbil ŋi wiin ke mmii na, ni titaafar ti wiin ke baah pur tikur mmii ni na aah wiin pu na, le len tibɔr timina: 19M nyi naah tun pu na, ki gee binib pu na, ki gaa mi ki kii pu na, ki kpa limɔr pu na, ki tun lituln dandana wee ki jer naah nan tun njan pu na. 20Tɔ, m mu galn nimi; ba pu? ni ŋmin lik Jesebel, upii u len ke u ye Uwumbɔr aabɔnabpii kaa ye na. U ŋmanni maatutuliib, ki tuk bi ke bi yaa gɔr kidaagook ki ŋman libaawol aanann kan, naa bir. 21M tii u nsan ke un kpeln waabimbin, u mu aa ban un di cha kidaagook aatuln. 22U ni binib bi dii ki gɔr kidaagook na, bi yaa kaa kpeln baabimbin ki di cha waatuln kan, m ga cha bi ji falaa saakpen, 23ki ga ku waabim mu. Le maanib bi bi ni kookoo na ga bee ke min le nyi bisui ni aah bi pu na. M ga tii ni ponn ni unii mɔmɔk waatuln aah ŋeer pu na. 24"Tɔ, nimi bibaa bi bi Tiataira aatiŋ ni na aa dii Jesebel ngbaan aamɔkm, kaa bae Kinimbɔŋ aatuln li bi yi li ke 'tibɔr ti nyoo na.' Nimi le m len ke ni li joo naah kpa iliin i na, ki nan saa bundaln m ga fuu ni na. Maan bui nimi ke ni ŋa tiwan nibaa ki kpee. 26Unii umɔk nyaŋ ki tun maatuln n-yoonn mɔmɔk na, m ga tii u tininkpil u li joo dulnyaa aanib, ke maah gaa Nte Uwumbɔr chee tininkpil pu na. 27Le u ga li joo bi mpɔɔn pu, ki bii bi ki ŋa bi ke kibukpeek na. 28M ga tii u naanyuun mu. 29"Un kpa litafal na kan, un ŋun Uwumbɔr Aafuur nyaan aah tuk maanib pu na.

will be added

X\